ދުނިޔޭގެ ތިން އުމުން ގެންނަ މުދާ މިހާރު ރާއްޖެއިން އެހެން ގައުމުތަކަށް އެކްސްޕޯޓް ކުރަމުންދާ ކަމަށް މޯލްޑިވްސް ސްޓޭޓް ޝިޕިން ކުންފުނި (އެމްއެސްއެސް) މެނޭޖިން ޑިރެކްޓަރު އަދި ސީއީއޯ އަހްމަދު ޝަރީފް މިއަދު ވިދާޅުވެއްޖެ އެވެ،
ދައުލަތުގެ މީޑިއާގައި ވާހަކަދައްކަވަމުން ޝަރީފް ވިދާޅުވީ މި ހިދުމަތަކީ ކަނޑުމަގުން އަންނަ މުދާ ވައިގެ މަގުން ދުނިޔޭގެ އެކި ކަންކޮޅުތަކަށް ފޮނުވުމުގެ ހިދުމަތަކަށް ވާތީ އެ ކުންފުނީގެ ދައުރުވެސް މި ހިދުމަތުގައި ބޮޑު ކަމަށެވެ.
ރާއްޖެއިން މިހާރު ދެމުންގެންދާ ސ-ީޓު-އެއާ ކާގޯ ހިދުމަތާ ޖުމުލަ 11 އެއާލައިނަކުންވެސް ވަނީ ގުޅިފަ އެވެ.
ޝަރީފް ވިދާޅުވި ގޮތުގައި މި ހިދުމަތާ މި ސަރަހައްދުގެ ތިން ގައުމު ކަމުގައިވާ ބަނގްލަދޭޝް، ސްރީލަންކާ އަދި އިންޑިއާ މިހާރު ވަނީ ގުޅިފަ އެވެ.
ސީ-ޓު-އެއާ ކާގޯ ހިދުމަތަކީ އެމްޕީއެލް، އެމްއޭސީއެލް، ކަސްޓަމްސް އަދި އެމްއެސްއެސް އާއި އެކީގައި ގުޅިގެން ފަށާފައިވާ ރާއްޖޭގެ އިގްތިސާދު ކުރިއަރުވާނެ މުހިއްމު މަޝްރޫއެއް ކަމަށްވެސް ޝަރީފް ވިދާޅުވި އެވެ.
"މިއީ ރާއްޖެއަށް އިތުރު ބޭރު ފައިސާ ވެއްދުމަށް ވަރަށް މުހިއްމު ފުރުސަތެއް،" ޝަރީފް ވިދާޅުވި އެވެ.
ސީ-ޓު-އެއާ ކާގޯ ހިދުމަތް މިއަހަރު ފެށިފަހުން ހަތަރު މިލިއަނަށް ވުރެ ގިނަ އެމެރިކާ ޑޮލަރު ރާއްޖޭގެ އިގްތިސާދަށް އާމްދަނީގެ ގޮތުގައި ލިބިފައިވާ ކަމަށް އެމްޕީއެލް އިން މީގެކުރިން ހާމަކޮށްފައިވެ އެވެ.