ސީ ޓު އެއާ ކާގޯ ހިދުމަތް ފެށި ފަހުން 1،000 ޓަނުގެ މުދާ އެކްސްޕޯޓްކޮށްފި އެވެ.
ސީ ޓު އެއާ ކާގޯ ހިދުމަތަކީ ކަނޑު މަގުން ރާއްޖެއަށް އަންނަ މުދާ ރާއްޖޭގައި ޓްރާންސިޓްކޮށް ވައިގެ މަގުން ދުނިޔޭގެ އެހެން ގައުމުތަކަށް ފޮނުވުމުގެ ގޮތުން ދޭ ހިދުމަތެކެވެ.
ސީ ޓު އެއާ ކާގޯ ހިދުމަތް ދިނުމަށް 12 އެއާލައިން ވަނީ ހިދުމަތާ ގުޅިފަ އެވެ. މީގެތެރޭގައި ޓާކިޝް، އެމިރޭޓްސް، އިއްތިހާދު، ގަތަރު، އޭރޯފްލޮޓް، ނިއޯސް، ޑިސްކަވާ، ގަލްފް އެއާ، އޮސްޓްރިއަން، ބްރިޓިޝް އެއާވޭސް އަދި ކޮންޑޯ އެވެ.
ސީ ޓު އެއާ ކާގޯ ހިދުމަތް ރާއްޖޭގައި ފެށުމުގެ ގޮތުން މޯލްޑިވްސް ޕޯޓްސް ލިމިޓެޑް (އެމްޕީއެލް) އާއެކު ފުރަތަމަ އެއްބަސްވުމެއްގައި ސޮއިކުރީ ޓާކިޝް އެއާލައިނުން މި އަހަރުގެ މާޗް މަހު އެވެ. އެއަށްފަހު ފުރަތަމަ ކާގޯ ޝިޕްމަންޓް ފޮނުވީ މި އަހަރުގެ މެއި މަހު އެވެ.
އެމްޕީއެލްގެ ސީއީއޯ މުހައްމަދު ވަޖީހު އިސްމާއިލް ވިދާޅުވި ގޮތުގައި ކުޑަ ދުވަސްކޮޅު ތެރޭ މި ހިދުމަތުގެ ޑިމާންޑު ވަރަށް ބޮޑަށް ވަނީ އިތުރުވެފަ އެވެ.
އެގޮތުން ނިމިދިޔަ އޮކްޓޫބަރު މަހު އެކަނިވެސް 96 ކޮންޓެއިނާ (418 ޓަނުގެ މުދާ / 34946 ދާގީނާ)ގެ މުދާ ވައިގެ މަގުން ރާއްޖެއިން ބޭރަށް ފޮނުވާފައިވާ ކަމަށް އޭނާ ވިދާޅުވި އެވެ.