ރިސޯޓް މުވައްޒަފުންގެ ޝަކުވާތަކަކީ ނިމުމެއް ނެތް ޝަކުވާތަކެކެވެ. އާއިލާއާ ދުރުގައި މަސައްކަތް ކުރަންޖެހޭ އިރު މަސައްކަތް ނިންމުމަށް ފަހު އެނބުރި ގޮސް ވަންނަން ޖެހެނީ ހޮރަށެވެ. ކުޑަ ކުޑަ ތަންކޮޅެއްގައި އެތައް ބަޔަކާއެކު ދިރިއުޅެން ޖެހޭ އިރު އެއްވެސް ޕްރައިވަސީއެއް ނޯވެ އެެވެ. އޭގެ ސަބަބުން އިޖުތިމާއީ އެތައް މައްސަލަތަކެއް ކުރިމަތިވެ އެވެ. އެ ގޮންޖެހުންތަކާ ހުރެ އެތައް ބަޔަކު "ރިސޯޓް ލައިފް" ދޫކޮށް އެނބުރި ރަށަށްވެސް ބަދަލުވެ އެވެ.
ދުނިޔޭގެ މަޝްހޫރު ނޫހެއް ކަމަށްވާ "ބިޒްނަސް އިންސައިޑާ" އިން ވެސް މިކަން ވަނީ ސަމާލުކަމަށް ގެނެސްފަ އެެވެ. ރިސޯޓް މުވައްޒަފުންގެ ހިތްދަތި ދިރިއުޅުމުގެ ވާހަކަ އެ ނޫހުން ބައިނަލްއަގުވާމީ ސަމާލުކަމަށް ގެނައި އިރު އުފާވެރި ހަބަރެއް ވެސް އެ ނޫހުން ވަނީ ދީފަ އެވެ. އެއީ ރިސޯޓްތަކަށް ދާ ފަތުރުވެރިންނެކޭ އެއްފަދައިން ރިސޯޓް މުވައްޒަފުންނަށް ވެސް އުފާވެރިކަމާއެކު ވަގުތު ހޭދަކޮށްލެވޭ ފަދަ މާހައުލެއް ގާއިމް ކުރަން ސިންގަޕޫރުގެ ހޮޓެލް ޗެއިންއެއް ކަމަށްވާ ޕޮންޓެއިކް ލޭންޑް ގްރޫޕުން އަމާޒު ހިފި ވާހަކަ އެވެ.
މާލެ އަތޮޅުގައި އޮންނަ އެއް ފަޅެއްގައި އޮންނަ ހަތަރު ރަށެއްގައި ޕޮންޓެއިކް ގްރޫޕުން މިހާރު ދަނީ "ފަރި އައިލެންޑްސް" ގެ ނަމުގައި ރިސޯޓްތަކެއް ތަރައްގީ ކުރަމުން ނެވެ. އޭގެ ތެރެއިން ތިން ރަށެއްގައި ރިސޯޓް ތަރައްގީ ކުރާއިރު އަނެއް ރަށް ހާއްސަ ކުރަނީ މުވައްޒަފުން ބޭތިއްބުމަށެވެ. އެއީ "ފަރި ކެމްޕަސް" އެވެ.
އެ ތިން ރިސޯޓްގެ މަސައްކަތް ނިންމައި ހިދުމަތް ދެވެން ފަށާއިރު ޖުމްލަ 1200 ސްޓާފުން ބޭނުންވާނެކަމަށް ޕޮންޓެއިކްއިން އަންދާޒާ ކުރެއެވެ.
ޕޮންޓެއިކް އިން ބުނީ މިހާރު ރާއްޖޭގައި ރިސޯޓްތައް ތަރައްގީ ކުރާއިރު މުވައްޒަފުން ބައިތިއްބަނީ ރަށުގެ އެންމެ އެތެރޭގައި ކަމަށެވެ. އަދި އޭގެ ސަބަބުން ބަންދުވެފައި ތިބޭ ކަމުގެ އިހުސާސްތަކެއް ކުރެވޭ ކަމަށާއި އަދި ސްޓާފުންގެ ނަފްސާނީ ދުޅަހެޔޮކަމަށް އަސަރުކުރާ ކަމަށެވެ.
"ސްޓާފުން ބައިތިއްބަނީ ރަށުގެ އެންމެ އެތޭގައި. އޭގެން އެދެވެނީ ވަރަށް ނުރަނގަޅު މެެސެޖެއް. ހީވަނީ މިއީ ދެވަނަ ދަރަޖައިގެ އިންސާނުން ހެން" ފަރި އައިލެންޑްސްގައި ހިންގާ ރިސޯޓެއް ކަމަށްވާ ކެޕެއްލާ ރިސޯޓްގެ މައި ކުންފުނީގެ ސީއީއޯ ނިކޮލަސް ކްލޭޓަން ބިޒްނަސް އިންސައިޑާއަށް ވިދާޅުވި އެވެ.
ރާއްޖޭގެ ރިސޯޓްތަކުގެ މުވައްޒަފުން ކުޑަކުޑަ ތަންކޮޅެއްގައި ބަންދުވެގެން ތިބެންޖެހުމުން ދިމާވާ އެތައް މައްސަލައެއް ބިޒްނަސް އިންސައިޑާއިން ފާހަގަކޮށްފައި ވެއެވެ. އެގޮތުން މަސްތުވާތަކެތީގެ މައްސަލަތައް ފާހަގަކޮށްފައި ވެއެވެ. އަދި ރިސޯޓްތަކުގެ މުވައްޒަފުންނަށް "ޕްރައިވަސީ" އާއެކު ފޯނެއް ކޮށްލުމުގެ މިނިވަންކަން ވެސް ނޯންނަކަމަށް ބުނެފައިވެ އެވެ.
ރިސޯޓް މުވައްޒަފުން ބައިތިއްބަން "ފަރި ކެމްޕަސް" ހަދަނީ ބޮޑު ސަރަހައްދެއްގަ އެވެ. އެއީ 12 ހެކްޓަރުގެ ސަރަހައްދުގަ އެވެ. މިއީ 16 ފުޓްބޯޅަ ދަނޑާ އެއްވަރުގެ ސަރަހައްދެކެވެ. އެ ތަނުގައި ސްޓާފުން ތިބޭނީ މޫދާ ކައިރީގައި ހަދާފައި ހުންނަ ހަތަރު ބުރީގެ އިމާރާތްތަކުގަ އެވެ. އެ އިމާރާތްތައް ހުންނަނީވެސް ޖެހިޖެހިގެނެއް ނޫނެވެ. އެއާއެކު އަމިއްލަ ރަށުގައި އުޅޭފަދަ އިހުސާސެއް ސްޓާފުންނަށް ކުރެވޭނެ އެވެ.
އޭގެ އިތުރުން އެ ކެމްޕަސްގައި ޖޮގިން ޓްރެކަކާއި ބާސްކެޓް އަދި ވޮލީ ބޯޅަ ކޯޓާއެކު ލައިބްރަރީއަކާއި ކްލިނިކަކާއި އަދި ބިއުޓީ ސެލޫނަކާއި އަދި ފިހާރަ ފަދަ ތަންތަންވެސް ހިމެނޭނެ އެވެ. ފަރި ކެމްޕަސްގައި ސްޓާފުން ކާންދާ މެސް ވެސް ޑިޒައިންކޮށްފައި ވަނީ ރެސްޓޯރެންޓެއް ހެންނެވެ. ހަތަރު ސަތޭކަ ފަންސާސް މީހުންގެ ޖާގަ ހުންނަ އެ ތަނުގައި މޭޒުތައް އަތުރާފައިވަނީ ގެސްޓުން ކާންދާ ރެސްޓޯރެންޓްތަކުގައި މޭޒުތައް އަަތުރާފައި ހުންނަ ގޮތަށް ދުރުދުރުގަ އެވެ.