ރާއްޖެއަށް މިދިޔަ އަހަރު ޒިޔާރަތްކުރި ފަތުރުވެރިންގެ އަދަދު 2023 ވަނަ އަހަރާއި އަޅާބަލާއިރު 9 ޕަސެންޓް އިތުރުވެއްޖެ އެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުން މިދިޔަ އަހަރު ރާއްޖެއަށް 2،041،000 އަށްވުރެ ގިނަ ފަތުރުވެރިން ޒިޔާރަތްކޮށްފައިވެ އެވެ. 2023 ވަނަ އަހަރު ޒިޔާރަތްކުރި 1،878،543 ފަތުރުވެރިންނެވެ.
ރާއްޖެއަށް މިދިޔަ އަހަރު ޒިޔާރަތްކުރި ފަތުރުވެރިންގެ ތެރެއިން 1.3 މިލިއަން ފަތުރުވެރިން -- 64.3 ޕަސެންޓް ޒިޔާރަތްކުރީ ރާއްޖޭގެ ފަތުރުވެރިކަމުގެ މާކެޓްގެ ގަދަ 10 ގައި ހިމެނޭ ގައުމުތަކުންނެވެ.
ފަތުރުވެރިކަމުގެ ގަދަ 10 ގައުމު - ޑިސެމްބަރު 30 ގެ ނިޔަލަށް
- ޗައިނާ – 263،042
- ރަޝިއާ – 224،699
- އިނގިރޭސިވިލާތް – 180،455
- ޖަރުމަނު – 156،208
- އިޓަލީ – 144،214
- އިންޑިއާ – 130،328
- އެމެރިކާ – 69،521
- ފްރާންސް – 54،352
- ސްޕެއިން – 47،648
- ސްވިޓްޒަލޭންޑް – 40،772
ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުން މިދިޔަ ޑިސެންބަރު މަހުގައި އެވެރެޖުކޮށް ކޮންމެ ދުވާލަކު 6،796 ފަތުރުވެރިން ރާއްޖެއަށް އައިސްފައިވެ އެވެ. މުޅި އަހަރަށް ބަލާއިރު މި އަދަދު ހުރީ 5،593 ގަ އެވެ.
ފާއިތުވި ޑިސެމްބަރު މަހަކީ 2024 ގައި ދެވަނައަށް އެންމެ ގިނައިން ފަތުރުވެރިން ޒިޔާރަތްކުރި މަހެވެ.
ފަތުރުވެރިން ޒިޔާރަތްކުރި އަދަދު މަހުން މަހަށް
- ޖެނުއަރީ: 192،385
- ފެބްރުއަރީ: 217،392
- މާޗް: 194،227
- އެޕްރީލް: 168،366
- މޭ: 119,875
- ޖޫން: 123,284
- ޖުލައި: 167,528
- އޮގަސްޓް: 176,175
- ސެޕްޓެމްބަރު: 132,795
- އޮކްޓޫބަރު: 172,621
- ނޮވެމްބަރު: 172,987
- ޑިސެމްބަރު 30 ގެ ނިޔަލަށް: 203,891
ތަފާސްހިސާބުތައް ދައްކާ ގޮތުން އަހަރު ނިމުނުއިރު ރާއްޖޭގައި ފަތުރުވެރިކަމަށް 1،271 ތަނެއް ދިޔައީ ހިންގަމުންނެވެ.
މީގެ ތެރޭގައި 172 ރިސޯޓާއި 929 ގެސްޓްހައުސް އާއި 155 ސަފާރީ އަދި 15 ހޮޓާ ހިމެނެ އެވެ. މިތަންތަނުގައި ފަތުރުވެރިންނަށް ހުރި އެނދުގެ އަދަދަކީ 63،248 އެވެ.