ހިޔާ ފްލެޓް ލިބުނު މީހުންގެ ޕެޓިޝަނެއް މަޖިލީހަށް ހުށަހެޅުމަށްޓަކައި ރައްޔިތުންގެ މަޖިލީހުގެ މެޖޯރިޓީ ލީޑަރު އަލީ އާޒިމާ ހަވާލުކޮށްފި އެވެ.
ހިޔާ ފްލެޓް ލިބުނު 2،177 މީހުންގެ ސޮޔާ އެކު މި ޕެޓިޝަން އާޒިމާ ހަވާލުކުރީ މިއަދުގެ ވަގުތެއްގަ އެވެ.
ޕެޓިޝަނުގައި މައިގަނޑު ގޮތެއްގައި އެދިފައިވަނީ ހިޔާ ފްލެޓް ތަކުގެ ކުލި 5600 ރުފިޔާއަށް ކުޑަކޮށްދިނުމަށާއި، ފްލެޓްތަކުގެ އެތެރޭގެ މަސައްކަތަށް ހޭދަވާ ފައިސާ ދެއްކުމަށް އޮތް މުއްދަތު ނުވަތަ ގުރޭސް ޕީރިއެޑް 12 މަހަށް ބަދަލުކޮށްދިނުމާއި ފްލެޓްގެ ޖުމަލަ އަގުން ފްލެޓްގެ އެތެރޭގެ މަސައްކަތްތައް ނިންމަން ހޭދަވާ އެއްލައްކަ ރުފިޔާ މައާފްކޮށްދިނުމަށެވެ.
މި ޕެޓިޝަން މިދިޔަ ޖޫން މަހުގެ އެއްވަނަ ދުވަހު އެންމެ ފުރަތަމަ ހުށަހެޅީ ރައީސް އޮފީހަށެވެ.
ހިޔާ ފްލެޓް ލިބުނު މީހުންގެ ހައްގުގައި މަސައްކަތް ކުރާ ހިޔާ ޔޫނިއަނުން ބުނީ މި ޕެޓިޝަން ރައީސް އޮފީހަށް ހުށަހެޅުމަށްފަހު ކަމާ ގުޅުންހުރި އިދާރާތަކާ ވާހަކަ ދައްކައިގެން ކަންބޮޑުވުންތަކަށް ހައްލު ހޯދުމަށް މަސައްކަތް ކުރި ކަމަށެވެ. ނަމަވެސް އެއްވެސް ހައްލެއް ލިބިފައި ނުވާތީ މަޖިލީހަށް ހުށަހެޅުމަށްޓަކައި މެންބަރު އާޒިމަށް ޕެޓިޝަން ހަވާލުކުރީ ކަމަށެވެ.
ހިޔާ ޔޫނިއަނުން ބުނީ 25،000 ރައްޔިތުންނާއި ސީދާ ގޮތުން ގުޅިފައިވާ މި މައްސަލަ އަށް ހައްލެއް ލިބުމަކީ ހިޔާ ޔޫނިއަންގެ އެދުމެއް ކަމަށެވެ. ސަރުކާރާއި މަޖިލިސް ގުޅިގެން ކުރެވޭ މަސައްކަތް ތަކުން ހާސިލް ނުކުރެވޭނޭ އެއްވެސް ކަމަކަށް ޔޫނިއަނުން އެދިފައި ނުވާނެ ކަމަށްވެސް ބުނެފައިވެ އެވެ.
ހިޔާ ފްލެޓްގެ ކުލީގެ ގޮތުގައި މިސަރުކާރުން ހަމަޖައްސާފައިވަނީ ކުލީގެ ގޮތުގައި މަހަކު 7،500 ރުފިޔާއާއި މެއިންޓަނަންސް ފީގެ ގޮތުގައި މަހަކު 1،000 ރުފިޔާ އާއި އެކު ޖުމްލަ 8،500 ރުފިޔާ އެވެ.