ރާއްޖެއާ އެއްގޮތް ސިފަތަކެއް ހުންނަ، މިހާރު އިންޑިއާ އިން ބަލަހައްޓާ، މަލިކުގައި ރާއްޖޭގައި ހުންނަ ގޮތަށް ވޯޓާ ވިލާ އަޅަން ބިޑުކޮށްފި އެވެ.
އިންޑިއާގެ މައި ސަރުކާރުގެ ހުވަފެނީ މި މަޝްރޫއު އިއުލާނު ކުރުމުގެ ގޮތުން ލަކްޝަދީބް އެޑްމިނިސްޓްރޭޝަނުން ބުނެފައިވަނީ ރާއްޖޭގައި ހުންނަ ގޮތަށް މޫދުގައި އަޅާ މި ވިލާތައް އެޅުމަށް ހިންގާ މަޝްރޫ އަށް 800 ކްރޯޑް އިންޑިއަން ރުޕީސް، ނުވަތަ 10 މިލިއަން ޑޮލަރު (ގާތްގަނޑަކަށް 154 މިލިއަން ރުފިޔާ) ހަރަދުވާނެ އެވެ.
މި ވޯޓާ ވިލާތައް އަޅަން ނިންމާފައިވަނީ އެންމެ މަތީ ފަންތީގައި ވިއްކޭ ގޮތަށެވެ. އަދި މިއީ މިގޮތަށް މޫދުގައި މަލިކުގައި ކޮޓަރި ހަދާ ފުރަތަމަ ފަހަރެވެ.
މަލިކުގައި މޫދުގައި ކޮޓަރި ހަދަން ނިންމާފައިވާއިރު އިންޑިއާގެ މައި ސަރުކާރުން ހިންދީންގެ ދީނީ އެޖެންޑާއެއް ފަތުރަން މަސައްކަތް ކުރާކަމަށް ބުނެ "ސޭވް ލަކްޝަދީމް"ގެ ނަމުގައި މަލިކުގައި ކެމްޕޭނެއް ވަނީ ފަށާފަ އެވެ.
ދުނިޔޭގެ އެހެން ގައުމުތަކުގައި ވެސް ރާއްޖެ "ކޮޕީކޮށްގެން" ވޯޓާވިލާތައް މީގެ ކުރިން ހަދާފައިވެ އެވެ. ނަމަވެސް ރާއްޖޭގައި ހުންނަ ފަދަ ޕްރިމިއަމް ސިފަތަކެއް އެ ތަންތަނުގައި ނުހުރެ އެވެ. އަދި އެ ތަންތަނުގެ އަގުތައްވެސް ރާއްޖެއާ ގާތްވެސް ނުކުރެ އެވެ.