މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އިން އިންތިޒާމުކުރާ މި އަހަރުގެ އެންމެ ބޮޑު ގްލޯބަލް ކެމްޕޭން "ވޯލްޑްސް ބިގެސްޓް ގިވްއަވޭ" ރަސްމީކޮށް މިއަދު ފަށައިފި އެވެ.
އެމްއެމްޕީއާރްސީ އިން ބުނި ގޮތުގައި މި ހަރަކާތުގައި މިއަދުން ފެށިގެން މި އަހަރުގެ ކޮންމެ ހަފުތާއަކަށް އެއް ޗުއްޓީ -- މުޅި އަހަރުގެ ތެރޭގައި ޖުމްލަ 52 ޗުއްޓީ ދިނުމަށް ވަނީ ހަމަޖެހިފަ އެވެ.
މި ހަރަކާތް އިއުލާނުކުރީ ވޯލްޑް ޓްރެވަލް މާޓް (ޑަބްލިޔުޓީއެމް) ލަންޑަންގައި މިދިޔަ ނޮވެމްބަރު ފަސް ވަނަ ދުވަހު އެވެ.
ސޯޝަލް މީޑިއާ މެދުވެރިކޮށް ކޮންމެ މަހަކު ބާއްވާ މި މުބާރާތްތަކުގެ ނަސީބުވެރި ފަރާތްތަކަށް ކޮންމެ ހަފުތާއަކުވެސް ހިތްގައިމު ޗުއްޓީއެއްގެ ފުރުސަތު ލިބޭނެ ކަމަށް އެމްއެމްޕީއާރްސީ އިން ބުނެފައިވެ އެވެ.
އެމްއެމްޕީއާރްސީ އިން ބުނީ ކޮންމެ މުބާރާތެއްގައިވެސް ރާއްޖޭގެ ރީތި ގޮނޑުދޮށްތަކާއި ސާފު މޫދާއި، ގުދުރަތީ ރީތިކަމުން ފެށިގެން ރާއްޖޭގެ މުއްސަނދި ސަގާފަތާއި ތަފާތު ކަނޑުގެ ދިރުންތައް ފަދަ އެކިއެކި ކަންކަމަށް އަލިއަޅުވާލާނެ ކަމަށެވެ. އަދި ރޮމޭންސް، ލަގްޒަރީ، ފެމިލީ، ޑައިވިން އަދި އެހެނިހެން ހިތްގައިމު ތަފާތު ސެގްމެންޓްތަކަށް އަލިއަޅުވާލާނެ ކަމަށް ބުނެފައިވެ އެވެ.
މި ކެމްޕޭންގެ މައިގަނޑު މަގުސަދަކީ ސޯޝަލް މީޑިއާގެ ޒަރީއްޔާއިން ރާއްޖެއަށް ގިނަ ފަތުރުވެރިން އައުމަށް ޝައުުގުވެރި ކުރުވުން ކަމަށްވެސް އެމްއެމްޕީއާރްސީ އިން ބުނެފައިވެ އެވެ.