ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހްގެ ސަރުކާރުން، މޫސުމަށް އަންނަ ބަދަލުތަކާ ގުޅޭގޮތުން އެންމެ އިސްކަންދޭ ކަންކަމާ ބެހޭގޮތުން ބައިނަލްއަގްވާމީ ބައިވެރިންނާ އެކު މަޝްވަރާ ކުރައްވައިފި އެވެ.
މި މަޝްވަރާ ކުރިއަށް ގެންދަވާފައިވަނީ މި އަހަރުގެ ނޮވެމްބަރު 1-12 އަށް އިނގިރޭސިވިލާތުގެ ގްލޯސްގޯގައި އޮންނަ ކޮޕް 26 އަށް ތައްޔާރުވުމުގެ ގޮތުންނެވެ.
ބައްދަލުވުން ބާއްވާފައި ވަނީ ސްރީލަންކާގެ ވެރިރަށް ކޮލަމްބޯގަ އެވެ. ލައްކާގައި ގާއިމުވެ ތިބޭ ބައިނަލްއަގްވާމީ އެކިއެކި ފަރާތްތަކާއެކު ސްޕެޝަލް އެންވޯއީ ފޯ ކްލައިމެޓް ޗޭންޖް، ސަބްރާ އިބްރާހީމް ނޫރައްދީން ވަކިވަކިން ބައްދަލުކުރެއްވި އެވެ.
މި ބައްދަލުކުރެއްވުންތަކުގައި ސަބްރާ ވަނީ މޫސުމަށް އަންނަ ބަދަލުތަކާ ގުޅޭގޮތުން ވާހަކަދައްކަވާފަ އެވެ. އެގޮތުން ދުނިޔޭގެ ފިނިހޫނުމިން މަތިވާ ނިސްބަތް 1.5 ޑިގްރީ ސެލްސިއަސް އަށް ވުރެ ދަށުގައި ބެހެއްޓުމުގެ ގޮތުން ބައިނަލްއަގްވާމީ މުޖުތަމައާ ގުޅިގެން ކުރެވޭ މަސައްކަތްތަކާ ބެހޭގޮތުން ވާހަކަދެއްކެވި އެވެ.
މޫސުމަށް އަންނަ ބަދަލުތަކުން ލިބޭ ގެއްލުންތައް ކުޑަކުރުމާއި އެޑެޕްޓޭޝަންގެ ދާއިރާއިން އިންވެސްޓްކުރުމަށް ހުރި ފުރުސަތުތަކާއި އަދި މޫސުމަށް އަންނަ ބަދަލުތަކުން ކުރިމަތިވާ ގޮންޖެހުންތައް ނައްތާލުމާއި އެޑެޕްޓޭޝަނަށް ހުރި ފުރުސަތާ ގުޅޭ މައުލޫމާތު ލިބޭގޮތަށް ކަންކަން ފަހިވެފައި އޮތުމުގެ މުހިއްމު ކަމާ ގުޅޭގޮތުން މަޝްވަރާ ކުރެއްވި އެވެ.
ސްޕެޝަލް އެންވޯއީ ފޯ ކްލައިމެޓް ޗޭންޖް ސަބްރާ އިބްރާހީމް ނޫރައްދީނުގެ އަރިހުގައި މި ބައްދަލުކުރެއްވުން ތަކުގައި، ރާއްޖެއިން ސްރީލަންކާއަށް ކަނޑައަޅާފައި ހުންނަވާ ސަފީރު އުމަރު އަބްދުއްރައްޒާގު ބައިވެރިވެ ވަޑައިގެންނެވި އެވެ.
ސްޕެޝަލް އެންވޯއީ ފޯ ކްލައިމެޓް ޗޭންޖް ބައްދަލުކުރެއްވި ފަރާތްތަކުގެ ތެރޭގައި ނޭޕާލް، ނެދަލެންޑްސް، އަފްޣާނިސްތާނު، ވިއެޓްނާމް، އެމެރިކާ، ކޮރެޔާ، ޖަރުމަން، ފްރާންސް، ސްވިޒަލެންޑް، ޔޫރަޕިއަން ޔޫނިއަންގެ ޑެލިގޭޝަންގެ އިތުރުން ސްރީލަންކާގެ މިނިސްޓްރީ އޮފް އެންވަޔަރަންމަންޓުގެ ސެކްރެޓަރީ ޑރ. އަނިލް ޖަސިން ހިމެނި ވަޑައިގަންނަވަ އެވެ.