އަފްޣާނިސްތާނަށް އަތްގަދަ ކުރަން މަސައްކަތް ކުރަމުން ގެންދާ އެ ގައުމުގެ ތާލިބާން ހަނގުރާމަވެރިން ހަމަސް ތެރޭގައި ބަލިކުރާނެ ކަމުގައި އަފްޣާންގެ ރައީސް މުހައްމަދު އަޝްރަފް ޣަނީ ވިދާޅުވެއްޖެ އެވެ.
އަފްޣާން މަޖިލީހުގައި ވާހަކައްކަވަމުން ރައީސް ޣަނީ ވިދާޅުވީ އެމެރިކާ އަދި ބައިނަލްއަގުވާމީ އެހީތެރިކަމާއެކު ހަމަސް ތެރޭގައި ތާލިބާނުން ކުޑަކަކޫ ޖައްސުވާނެ ކަމަށެވެ. ޣަނީ ވިދާޅުވީ ޕްރޮގްރާމްތައް ހަލުއިކުރަން އިންޓިރިއާ އަދި ޑިފެންސް މިނިސްޓަރަށް ދަންނަވާފައިވާ ކަމަށެވެ.
ޣަނީ ވިދާޅުވީ ތާލިބާނުންނަށް އޮތީ ނަސޭހަތެއް ކަމަށާއި ގަބޫލުނުކޮށްފި ނަމަ ދެން އޮތް ގޮތަކީ ހަނގުރާމައިގެ މައިދާނުގައި ފަހު ނޭވާލުން ކަމަށެވެ. ޣަނީ އަދި ވިދާޅުވީ ސެކިއުރިޓީ ޕްލޭނެއް އެބައޮތް ކަމަށާއި ތާލިބާނުންނަކީ ނައްތާލަން ޖެހިފައި އޮތް ފިތުނައެއް ކަމަށެވެ.
އަފްޣާނިސްތާނުން ދެން އަމަލުކުރާނީ ތަފާތު އުކުޅުތަކަކަށް ކަމަށް ވިދާޅުވަމުން ޣަނީ ވިދާޅުވީ އަސްކަރިއްޔާގެ ދައުރަކީ ދިފާއުކުރުން ކަމަށާއި ނޭޝަނަލް ޑައިރެކްޓްރޭޓް އޮފް ސެކިޔުރިޓީއާ ފުލުހުން އަމަން ބަލަހައްޓާނެ ކަމަށެވެ. ތާލިބާނުންނަށް ހަމަލާދިނުމުގައި އެމެރިކާއާ ބައިވެރިން ހިއްސާވާނެ ކަމަށް ވެސް ޣަނީ ވިދާޅުވި އެވެ.
އަފްޣާނަށް ދިމާވެފައި އޮތް މާލީ ނުތަނަސްކަމަށް ލުޔެއް ލިބޭނެ ކަމަށް އުންމީދުކުރައްވާ ކަމަށް ޣަނީ ވިދާޅުވި އެވެ. އަދި ވިދާޅުވީ އަފްޣާންގެ މައްސަލަތައް އަފްޣާނުން ހައްލުކުރަން ދުނިޔެ ގޮވާލާ ކަމަށާއި ހުރިހާ މާނައެއްގައި ވެސް އެއްބާރުލުން ދޭނެ ކަމަށް ބައިވެރިން ބުނާ ކަމަށެވެ.
"އަޅުގަނޑުމެން ވެސް ގޮތެއް އިޚުތިޔާރުކޮށްފިން،" ޣަނީ ވިދާޅުވި އެވެ. "ތާލިބާނުންނާ އަދި އެ ޖަމާއަތަށް ވާގިވެރިވާ މީހުން ވެސް ގޮތެއް ނިންމަންވީ" ޣަނީ ވިދާޅުވި އެވެ.