މޮރިޝަސްގެ ރަށެއް ކަމަށްވާ އަގަލެގާގައި އިންޑިއާއިން ސިއްރު އަސްކަރީ މަރުކަޒެއް ހެދެމުގެ މަސައްކަތް ކުރަނީ ރާއްޖޭގެ އައްޑޫ ސިޓީގައި މަގު ހެދުމުގެ މަސައްކަތް ކުރަމުންދާ އިންޑިއާގެ ކުންފުނި، އެފްކޯންސް އިންފްރާސްޓްރަކްޗާ ލިމިޓެޑް ކަން ހާމަވެއްޖެ އެވެ.
އައްޑޫ ސިޓީގެ މަގުހެދުމުގެ ބިޔަ މަޝްރޫއު 1.1 ބިލިއަން ރުފިޔާއަށް އެފްކޯންސް އިންފްރާސްޓްރަކްޗާ ކުންފުންޏާ ހަވާލުކުރީ މިދިޔަ ފެބްރުއަރީ މަހު އެވެ.
އެ މަޝްރޫއުގެ ދަށުން އަައްޑޫ ސިޓީގެ 40 ކިލޯމީޓަރު މަގުގައި ތާރު އަޅާނެ އެވެ. އަދި އެ ސިޓީގެ ފެންބޮޑުވާ މައްސަލަ ހައްލުކުރަން 103 ކިލޯ މީޓަރުގެ ޑްރެއިނޭޖް ސިސްޓަމެއްވެސް ގާއިމުކުރާނެ އެވެ.
މި މަޝްރޫއު ކުރިއަށް ގެންދަނީ އިންޑިއަން އެގްޒިމް ބޭންކުގެ 800 މިލިއަން ޑޮލަރުގެ ލައިން އޮފް ކްރެޑިޓްގެ (އެލްއޯސީ) ދަށުން ވެސް މެއެވެ.
އަލްޖަޒީރާއިން އިއްޔެ އާންމުކުރި އިންވެސްޓިގޭޓިވް ރިޕޯޓްގައި ބުނީ މޮރިޝަސްގެ މައި ރަށާ 684 މޭލު ދުރުގައި އޮންނަ އަގަލެގާގައި އުމްރާނީ ވަސީލަތްތައް ތަރައްގީ ކުރުމަށް ކަަމަށް ބުނެ އިންޑިއާއިން އެ ރަށުގައި ދަނީ އަސްކަރީ މަރުކަޒެއް ގާއިމުކުރަމުން ކަމަށެވެ. އަދި އެ މަސައްކަތް ކުރަމުންދަނީ އިންޑިއާގެ ކުންފުނި އެފްކޯންސް އިންފްރާސްޓްރަކްޗާ ލިމިޓެޑުން ކަމަށެވެ. އެ މަޝްރޫއު ފަށައިފައިވަނީ 2019 ވަނަ އަހަރު އެވެ.
އަލްޖަޒީރާއިން ބުނީ އެ ރަށުގައި ތިން ކިލޯމީޓަރުގެ ބޮޑު ރަންވޭއެއް ތަރައްގީކުރަމުންދާ އިރު އެ ތަނަަށް އެންމެ އެޑްވާންސްޑް އެއާކްރާފްޓް ވެސް ޖެއްސޭނެ ކަމަށެވެ. ހަމަ އެހެންމެ ބޮޑު ދެ ބަނދަރުވެސް ތަރައްގީ ކުރަމުންދާ ކަމަށެވެ.
މި ރަށް ތަރައްގީކޮށްދެނީ އެ ރަށަކީ މައި ރަށާއި ވަރަށް ދުުރުގައި އޮންނަ ރަށަކަށް ވާތީ އެ ރަށުގައި އުމްރާނީ ވަސީލަތްތައް ތަރައްގީކުރުމުގެ ގޮތުން ކަމަށް އިންޑިއާއިން ބުނެ އެވެ. ނަމަވެސް އަލްޖަޒީރާގެ އިންވެސްޓިގޭޝަން ރިޕޯޓްގައި ބުނީ އަސްކަރީ ބޭނުމަށް ނުނީ އެ ރަށް އެހާ ފުޅާކޮށް ތަރައްގީކުރުމުގެ މާނައެއް ނެތް ކަމަށެވެ. އެކަމަކު އިންޑިއާ ސަރުކާރާއި މޮރިޝަސްގެ ސަރުކާރުން ވެސް އެކަން ދޮގުކުރެ އެވެ.
މޮރިޝަސްގައި "އަސްކަރީ މަރުކަޒު" އަޅަމުންދާ ކަމަށް ތުހުމަތުކުރެވޭ މި ދަނޑިވަޅު އިންޑިއާއިން ދަނީ އައްޑޫގައި ވެސް ބޮޑެތި މަޝްރޫއުތަކެއް ހިންގަމުން ނެވެ. އޭގެ ތެރޭގައި އިންޑިއާއިން އައްޑޫގައި ގާއިމްކުރާ ޕޮލިސް އެކެޑެމީވެސް ހިމެނެ އެވެ.
ހަމަ އެހެންމެ އިންޑިއާއިން އައްޑޫގައި ކޮންސިއުލޭޓް އޮފީހެއް ވެސް އެޅުމަށް ދާދި ފަހުން ވަނީ ނިންމާފަ އެވެ. އެ މައްސަލައިގައި ބޮޑެތި ފާޑުކިޔުންތަކެއް އަމާޒުވެފައިވާ އިރު "ސޭވް އައްޑޫ"ގެ ނަމުގައި ވެސް ބޮޑު ކެމްޕޭނެއް ހިންގަމުންދާ އިރު ރާއްޖޭގައި އިންޑިއާ ސިފައިން ތިބޭތީ "އިންޑިއާ އައުޓް"ގެ ނަމުގައި ބޮޑު ކެމްޕޭނެއްވެސް ސޯޝަލް މީޑިއާގައި ދަނީ ހިންގަމުންނެވެެ.
އޭގެ އިތުރުން އުތުރު ތިލަފަޅުގައި އިންޑިއާ ސަރުކާރުން ޑޮކްޔާޑަކާއި ބަނދަރެއް ތަރައްގީކުރުމަށް ވެސް ވަނީ އެއްބަސްވުމެއްގައި ސޮއިކޮށްފަ އެވެ. މިއީވެސް އިންޑިއާ ސިފައިން ރާއްޖޭގައި ގާއިމުވެ ތިބުމަށް ކުރާ މަސައްކަތެއް ކަމަށް ގިނަ ބަޔަކު ދަނީ ތުހުމަތުކުރަމުންނެވެ.