- މަންޒަރުތައް ނަގަނީ ލ. ބަރެސްދޫގައި
- 270 ކްރޫއިން ހަރަކާތްތެރިވޭ
- ފިލްމް ނަގަން ފަށަނީ އަންނަ މަހު
ހޮލީވުޑްގެ އެކްޝަން ފިލްމެއްގެ މަންޒަރުތަކެއް ނަގަން ބޮޑު ފިލްމު ކްރޫއެއް ރާއްޖެ އައިސް މަސައްކަތްތައް ފަށައިގެންފި އެވެ.
"އަވަސް" އަށް އެނގިފައިވާ ގޮތުގައި ހޮލީވުޑްގެ ފިލްމެއްގެ މަންޒަރުތަކެއް ނެގުމުގެ ގޮތުން އެކަމަށް ބޭނުންވާ އިކްއިޕްމަންޓްތަކާއެކު ކްރޫއެއް ދަނީ ލ. އަތޮޅުގައި ހަރަކާތްތެރިވަމުންނެވެ. އަދި މި ފިލްމުގެ މަންޒަރުތައް ނެގުމަށް ހަމަޖެހިފައިވަނީ ގެސްޓް ހައުސް އައިލެންޑް ތަރައްގީ ކުރާ ލ. ބަރެސްދޫގައި ކަމަށް ވެސް އެނގިފައިވެ އެވެ. އަދި މީގެ މަންޒަރުތަކެއް ލ. ގަމުގައި ވެސް ބައެއް މަންޒަރުތައް ނެގުމަށް ހަމަޖެހިފައިވާ ކަމަށް ވެސް ވެ އެވެ.
އެހެން ނަމަވެސް މިއީ ކޮން ފިލްމެއް ކަމެއް އަދި ނޭނގެ އެވެ. އެހެން ނަމަވެސް މިއީ ހޮލީވޫޑްގެ ބައެއް މަޝްހޫރު ތަރިން ހިމަނައިގެން ހަދާ އެކްޝަން ފިލްމެއް ކަމަށް މައުލޫމާތު ލިބެ އެވެ. އެއީ ކޮން ތަރިންނެއް ކަމެއް ވެސް އަދި ނޭނގެ އެވެ.
މި ފިލްމުގެ މަންޒަރުތައް ނެގުމުގައި ކުރަންޖެހޭ ބައެއް ކަންތައްތަކުގައި އެހީވުމަށް ލ. އަތޮޅުގެ އެކި ރަށްރަށުން ވަނީ 200 އެއްހާ މީހުން ނަގާފައި އެވެ. މި ފިލްމުގެ މަންޒަރުތައް ނެގުމަށް ރާއްޖެ އައި ފިލްމް ކްރޫގައި ގާތްގަނޑަކަށް 270 ވަރަކަށް މީހުން ހިމެނެ އެވެ. އަދި އެންމެ ފަހުގެ ޒަމާނީ އާލާތްތައް އެ މީހުން ވަނީ ސީދާ ފިލްމަށް ހާއްސަކޮށް ރާއްޖެއަށް ގެނެސްފަ އެވެ. އެނގިފައިވާ ގޮތުގައި ފިލްމްގެ ޝޫޓިން ފަށާނީ އަންނަ މަހުގެ ތެރޭގަ އެވެ.
ފިލްމް ކްރޫއަށް ރައްކާތެރިކަން ދިނުމަށާއި އެކްޝަން އެކި މަންޒަރުތައް ނެގުމަށް ބޭނުން ކުރާ ބައެއް ތަކެތި ބެލެހެއްޓުމުގައި ސިފައިންނާއި ފުލުހުން ވެސް އެޓީމަށް އެހީތެރިވެދެމުން އާދެ އެވެ.
ރާއްޖޭގައި މީގެ ކުރިން ހޮލީވުޑްގެ ބޮޑު ފިލްމެއްގެ މަންޒަރެއް ނަގާފައެއް ނުވެ އެވެ. ނަމަވެސް ބޮލީވުޑްގެ ބައެއް ފިލްމުތަކުގެ މަންޒަރުތައް ނަގާފައިވެ އެވެ. އެގޮތުން އެންމެ މަޝްހޫރު ވެގެން ގޮސްފައިވަނީ 1980 އަހަރުތަކުގައި ރިލިޒް ކުރި ސަނީ ޑިއޯލް އާއި ޕޫނަމް ކުޅެފައިވާ "ސަމަންދަރު" އެވެ.