ހިޔާ މަޝްރޫއުގެ ދަށުން އަޅާފައިވާ ފްލެޓްތަކުގެ ކުލި ކުޑަކުރަން މަޝްވަރާ ނުކުރާ ކަމަށް އެޗްޑީސީގެ އެމްޑީ އަހުމަދު ސުހައިލް ވިދާޅުވެއްޖެ އެވެ.
ހިޔާ ފްލެޓްތަކާ ބެހޭ އެންމެ ފަހުގެ މައުލޫމާތުތައް ހިއްސާކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި ސުހައިލް ވިދާޅުވީ ފްލެޓްތަކުގެ ކުއްޔާ ގުޅޭ ގޮތުން އިތުރު މަޝްވަރާތައް ނުކުރައްވާ ކަމަށެވެ. ކުއްޔަކީ ހަމަ މިހާރުވެސް ކަނޑައަޅާފައިވާ ކުލި ކަމަށާއި އެ އަދަދު ބަދަލުކޮށް ނުދެވޭނެ ކަމަށެވެ.
ސުހައިލް ވިދާޅުވީ ހުރިހާ ކަމެއްގައި ލުއި ނުދެވޭނެ ކަމަށާއި ލުއި ދެވެން ހުރި ކަންކަމުގައި ލުއިތައް ދެމުންދާ ކަމަށެވެ. އިތުރަށް ވިދާޅުވީ ފްލެޓްތަކަށް ވަންނައިރު އަސާސީ ހިދުމަތްތައް ވެސް ލިބޭނެ ކަމަށެވެ.
ހިޔާ ފްލެޓް ލިބުނު މީހުން އިއްޔެ ވަނީ ކުލި ކުޑަކުރަން ގޮވާލައި ހިމޭން އިހުތިޖާޖެއް ވެސް ކޮށްފަ އެވެ. ހިޔާ ފްލެޓް ލިބުނު މީހުން ހިންގާ "ހިޔާ ޔޫނިއަން" އިން އިންތިޒާމު ކޮށްގެން ބޭއްވި މުޒާހަރާގައި ފްލެޓް ލިބުނު މީހުން ގެންގުޅުނު ބޯޑުތަކުގައި ލިޔެފައިވަނީ ފްލެޓަކަށް މަހަކު ދައްކަން ސަރުކާރުން ކަނޑައަޅާފައިވާ 7،500ރ. ގެ ކުއްޔާއި ސާވިސް ފީގެ ގޮތުގައި މަހަކު ދައްކަން ޖެހޭ 1،000ރ. އަކީ ފްލެޓް ލިބުނު އާއިލާތަކަށް ލިބޭ އާމްދަނީން ދެކޮޅު ޖެއްސޭ ވަރަށް ވުރެ ބޮޑު އަދަދެއް ކަމަށެވެ.
ފްލެޓްތަކުގެ އަގުގެ ގޮތުގައި މަހަކު 5،000ރ. އަދި ސާވިސް ފީގެ ގޮތުގައި 600ރ. ނަގާ ގޮތަށް ބަދަލުކުރަން އެމީހުން ވަނީ ގޮވައިލާފަ އެވެ.
ސަރުކާރުން މިހާރު ވަނީ ފްލެޓުގެ ފިނިޝިން މަސައްކަތް ނިންމުމަށްޓަކައި ޑިސެމްބަރު މަހާ ހަމައަށް ކުލި ނުނަގަން ނިންމައިފަ އެވެ. ކުރިން ނިންމާފައި ވަނީ ތިން މަސް ދުވަހުގެ މުއްދަތެއް ފިނިޝިންގެ މަސައްކަތަށް ދިނުމަށެވެ.
ސަރުކާރުން ކުރިން ބުނެފައި ވަނީ ރައީސް އަބްދުﷲ ޔާމީންގެ ސަރުކާރުން ކުރިއަށް ގެންދިޔަ އެ މަޝްރޫއު ހަވާލުކޮށްފައި ވަނީ އެންމެ ބޮޑު އަގު ހުށަހަޅާފައިވާ ކުންފުންޏަށް ކަމަށެވެ.
އަގުތައް ކަނޑައަޅާފައި ވަނީ ހަމައެކަނި ކޮންސްޓްރަކްޝަން މަސައްކަތާއި ކޮންސްޓްރަކްޝަން މަސައްކަތުގެ އިންޓްރެސްޓް އެކަނި ހިމަނާފައި ކަމަށާއި އެހެން ހަރަދުތައް ވެސް ހުންނާނެ ކަމަށް ސަރުކާރުން ކުރިން ވަނީ ބުނެފަ އެވެ. ނަމަވެސް އެ އަދަދުތައް ހިމަނައިފިނަމަ މިހާރު ފްލެޓްތަކުގެ ކުލި ކަނޑައަޅާފައިވާ އަގަށް ވުރެ ބޮޑުވާނެ ކަމަށް ވެސް ވަނީ ބުނެފަ އެވެ.