މަރާލައި ހުޅުމާލޭގެ ފަޅުތެރެއަށް އެއްލާލާފައި އޮއްވާ ފެނުނު އުމުރުން 13 އަހަރުގެ ކުއްޖާގެ މައްސަލައިގައި ނިންމުންތަކެއް ނިންމާފައިވާތީ އެކަމުގެ މައުލޫމާތު ހިއްސާކުރުމަށް ޕްރޮސެކިއުޓާ ޖެނަރަލް އޮފީހުން ހާއްސަ ނޫސްވެރިންގެ ބައްދަލުވުމެއް ބާއްވަން ނިންމައިފި އެވެ.
ޕީޖީ އޮފީހުން މިއަދު ބުނީ 13 އަހަރުގެ ކުއްޖާ މަރާލި މައްސަލައާއި ގުޅޭ މައުލޫމާތު ދިނުމަށް ޕްރޮސެކިއުޓާ ޖެނަރަލް ހުސައިން ޝަމީމް ނޫސްވެރިންނާ ބައްދަލުކުރައްވާނީ މާދަމާ މެންދުރު ފަހު 2:00 އިރު ކަމަށެވެ.
ކުއްޖާގެ މަރާ ގުޅިގެން 17 އަހަރުގެ ދިވެހި ފިރިހެން ކުއްޖަކާއި 27 އަހަރުގެ ދިވެހި ފިރިހެނަކު ވަނީ ހައްޔަރު ކޮށްފަ އެވެ. ހަތާވީސް އަހަރުގެ މީހާ އަކީ ނ. ލަންދޫ، ބަގީޗާގޭ، އިބްރާހިމް ޒިހާނެވެ.
ކުޑަކުއްޖާ ރަހީނު ކޮށްގެން ގެންގުޅުމަށްފަހު އޭނާ މަރާލާ އެއްލާލާފައި އޮއްވާ ފެނުނީ މިދިޔަ ޖޫން މަހުގެ 22 ވަނަ ދުވަހުގެ ރޭ މެންދަމުގެ ވަގުތެއްގަ އެވެ.
އުމުރުން 13 އަހަރުގެ ކުއްޖާގެ މަރުގެ ފުނަށް ވާސިލްވުމަށް ކުއްޖާގެ ޕޯސްޓްމޯޓަމް ހެދުމަށްފަހު މިދިޔަ މަހުގެ 12 ވަނަ ދުވަހު އެ ކުއްޖާގެ ހަށިގަނޑު ވަނީ ވަޅުލާފަ އެވެ.
މިކުއްޖާގެ މަރުގެ މައްސަލައާއި ގުޅުން ހުރި މައްސަލަތަކެއް ރައްޔިތުންގެ މަޖިލީހުންނާއި ހިއުމަން ރައިޓްސް ކޮމިޝަނުން ވެސް ދަނީ ބަލަމުންނެވެ.