ޕްރޮގްރެސިވް ކޮންގްރެސް ކޯލިޝަނުން "މަވެސް ޕީޕީއެމް"ގެ ނަމުގައި އަތޮޅުތަކަށް ކުރާ ސިލްސިލާ ދަތުރު ތަކުގެ ތެރެއިން ގދ. އަތޮޅަށާއި އައްޑޫ އަތޮޅަށް ޕީޕީއެމްގެ ޓީމުތައް މިއަދު ފުރައިފި އެވެ.
އައްޑޫއާއި ގދ. އަތޮޅަށް މިއަދު ޕީޕީއެމްގެ ދެ ޓީމެއް ފުރުމުގެ ކުރިން ވެލާނާ އިންޓަނޭޝަނަލް އެއާޕޯޓުގައި ނޫސްވެރިންނަށް މައުލޫމާތު ދެއްވަމުން ނައިފަރު ދާއިރާގެ މެންބަރު އަހްމަދު ޝިޔާމް ވިދާޅުވީ މިފަހަރުގެ ދަތުރުގައިވެސް ކުރީގެ ދަތުރެކޭ އެއްގޮތައް ރައްޔިތުންނާއި ބައްދަލުކޮށް ރައްޔިތުންގެ ކަންބޮޑުވުންތައް އޮޅުންފިލުއްވާނެ ކަމަށެވެ. އަދި ޕީޕީއެމްއަށް މެމްބަރުން އިތުރުކުރުމަށް ހާއްސަ މަސައްކަތްތަކެއް މިދަތުރުތަކުގައި ކުރައްވާނެ ކަމަށްވެސް ވިދާޅުވި އެވެ.
ޝިޔާމް ވިދާޅުވީ ގދ. އަށް ދަތުރުކުރާ ޕީޕީއެމްގެ ޓީމުން އެ އަތޮޅުގެ ދެ ދާއިރާ އަކަށް ދަތުރު ކުރާނެ ކަމަށެވެ. އެގޮތުން މިފަހަރު ދަތުކުރާނީ ގައްދޫ އާއި ފަރެސްމާތޮޑާ ދާއިރާ ކަމުގައި ވިދާޅުވި އެވެ. އަދި އައްޑޫއަށް ދަތުުރުކުރާ ޕީޕީއެމްގެ ޓީމުގައި ހިމެނޭ ބޭފުޅުން އެ ސިޓީގެ ހުރިހާ ރަށަކަށް ވަޑައިގަންނަވާނެ ކަމުގައިވެސް ވިދާޅުވި އެވެ.
ގދގެ ބައެއް ރައްތައް އަރާ ފޭބުން މަނާކޮށްފައިވާތީ އެފަދަ ރަށްތަކަށް މިވަގުތު ނުދެވުނު ނަމަވެސް ފަހުން އަދި އެ ރަށްތަކަށް ޕީޕީއެމްގެ ޓީމުތަކުން ޒިޔާރާތް ކުރާނެ ކަމުގެ ޔަގީންކަން ވެސް ޝިޔާމް ވަނީ ދެއްވާފަ އެވެ.
ޕީޕީއެމްގެ ޓީމުތަކުން އަތޮޅުތަކަށް ކުރަމުން ގެންދާ މިދަތުރުތަކުގައި ކުރިއަށް އޮތް ރިޔާސީ އިންތިހާބަށް އެ ޕާޓީން އެކުލަވާލާ މެނިފެސްޓޯ އަށް ރައްޔިތުންގެ ހިޔާލު ހޯދުމަށްވެސް ނިންމާފައިވެ އެވެ. މީގެއިތުރުން ޕީޕީއެމްގެ ރައީސް އަދި ކުރީގެ ރައީސް އަބްދުﷲ ޔާމީން މިނިވަންކުރުމަށް ޕީޕީއެމުން ކުރާ މަސައްކަތްތައް އިތުރަށް ވަރުގަދަކުރުމަށް ރައްޔިތުންގެ އެހީތެރިކަމަށް އެދުމަށްވެސް ނިންމާފައިވެ އެވެ.
ޕީޕީއެމުން ބުނީ ގއ. އަތޮޅާއި އައްޑޫ އަށް ޕީޕީއެމްގެ ދެ ޓީމުން ކުރާ ދަތުރުތައް ނިންމާލުމަށްފަހު ޓީމުގެ ބޭފުޅުން މާލެ ވަޑައިގަންނަވާނީ އަންނަ އާދިއްތަ ދުވަހު ކަމަށެވެ.
ޕްރޮގްރެސިވް ކޮންގްރެސް ކޯލިޝަނުން "މަވެސް ޕީޕީއެމް"ގެ ނަމުގައި ކުރާ ސިލްސިލާ ދަތުރުތަކުގެ ފުރަތަމަ ދަތުރު މިއަހަރު ކޮށްފައިވަނީ މިދިޔަ ހަފްތާގެ ތެރޭގައި ހއ. އަތޮޅުގެ ރަށްތަކަށެވެ.