ރާއްޖޭގެ މިނިވަންކަމަށް ފަންސާސް އަހަރު ފުރުމުގެ ރަން ޔޫބީލާ ގުޅިގެން ތާރީހީ ރަމްޒެއްގެ ގޮތުގައި އާންމުންނަށް ފެންނަ ގޮތަށް ބާއްވަން ސަރުކާރުން ބަންނަންފެށި ނަމޫނާ "ކަޅުއޮއްފުންމި" ބަނދެ ނިންމާލައިފި އެވެ.
ކަޅުއޮއްފުންމި ބަންނަން މޯލްޑިވްސް މެރިޓައިމް އެންޑް އަންޑަވޯޓާ ހެރިޓޭޖް ސޮސައިޓީއާ ސަރުކާރުން ހަވާލު ކުރީ މީގެ ދެ މަސްދުވަސް ކުރިންނެވެ. ހެރިޓޭޖްގެ ބެލުމުގެ ދަށުން ކަޅުއޮއްފުންމި ބަނދެފައިވަނީ ހދ ނޭކުރެންދޫގަ އެވެ.
"އަވަސް" އަށް މައުލޫމާތުދެއްވަމުން ނޭކުރެންދޫ ކައުންސިލްގެ ރައީސް މުހައްމަދު ސިޒާން ވިދާޅުވީ، ނަމޫނާ ކަޅުއޮއްފުންމި މިހާރު ބަނދެ ނިމިފައިވާ ކަމަށެވެ. ދޯނި މިހާރުވެސް އޮތީ މޫދަށް ބާލަން ތައްޔާރަށް ކަމަށާ އެކަމަކު ދޯނި ރީތިކުރަން ކުރަން ހުރި ކުދި ކުދި މަސައްކަތްތައް އަދިވެސް ކުރަމުންދާ ކަމަށެވެ.
"ދޯނީގެ މަސައްކަތް އެއްކޮށް ނިމިއްޖެ މިހާރު. އަންނަ މަހު އެކެއް ހިސާބުގައި މޫދައް ބާލާނެ ކަމަށް ލަފާކުރެވޭ. ޔަގީނަށް ވެސް ޑިސެންބަރު މަހުގެ ފުރަތަމަ ހަފުތާގައި ދޯނީގެ ޓެސްޓް ދަތުރުތައް ކުރާނެ. އެގޮތަށް މިނިސްޓްރީއާ ވެސް ވަނީ ވާހަކަ ދެކެވިފަ މިހާރު،" ސިޒާން ވިދާޅުވި އެވެ.
އޭނާ ވިދާޅުވީ ޑިސެމްބަރު އެކެއްގައި ދޯނި ބާލާނެ ކަމަށް ލަފާކުރެވޭ ކަމަށެވެ. ކަޅުއޮއްފުންމި މޫދަށް ބޭލުމަށްފަހު އެންމެ ފުރަތަމަ ގެންދަން ހަމަޖެހިފައިވަނީ ނޭކުރެންދޫއާ ކައިރީގައި އޮންނަ އެއަތޮޅު ކުޅުދުއްފުއްޓަށެވެ. އެއީ ދޯނީގެ ހުރިހާ ކަމެއް ރަނގަޅުތޯ ޔަގީންކުރަން ކުރާ ޓެސްޓް ދަތުރެކެވެ. ދޯނީގައި މައްސަލައެއް ނެތް ނަމަ ހަފްތާއެއްހައި ދުވަހުގެ ތެރޭގައި ކަޅުއޮއްފުންމި މާލެ ގެންނާނެ އެވެ.
ކަޅުއޮއްފުންމި އަކީ ޕޯޗުގީޒުންގެ އަތްދަށުން ރާއްޖެ މިނިވަންކުރުމަށް އުތީމު ތިން ތަކުރުފާނުން ކުރެއްވި ޖިހާދުގައި ބޭނުންކުރެއްވި އުޅަނދެވެ. 15 ރިޔަނު ހުންނަ އެ އުޅަނދުގައި ތިން ރިޔާ ހުންނަ ކަމަށް ތާރީހީ ފޮތްތަކުގައި ސިފަކޮށްފައިވެ އެވެ. ނަމޫނާ ކަޅުއޮއްފުންމި އަކީ އެ ހުރިހާ ސިފަތަކެއް ހިމެނޭ ގޮތަށް "އަސްލު" ކަޅުއޮއްފުންމިއާ އެއްގޮތަށް ބަނދެފައިވާ ދޯންޏެއް ކަމަށް ނޭކުރެންދޫ ކައުންސިލުން ބުންޏެވެ.
ނަމޫނާ ކަޅުއޮއްފުންމި: މިހާރު ވަނީ ބަނދެ ނިމިފައި --