ސާފް ޗެމްޕިއަންޝިޕް މުބާރާތަށް ރާއްޖެ ތައްޔާރު ވަމުން އަންނައިރު، ހުރިހާ ގޮތަކުން ވެސް އެންމެ ފައިދާ ބޮޑީ ރާއްޖެއަށް ކަމަށް ގައުމީ ޓީމުގެ ކޯޗު އަލީ ސުޒޭން ބުނެފި އެވެ.
ސުޒޭން ބުނީ އަމިއްލަ ގައުމުގައި ސަޕޯޓަރުންގެ ކުރިމަތީގައި މުބާރާތް ކުޅެން ލިބުމަކީ ޓީމަށް ލިބޭ އެންމެ ބޮޑު ހިތްވަރު ކަމަށެވެ. އަދި މެޗުތައް ތަރުތީބުވެފައިވާ ގޮތުން ވެސް އެންމެ ބޮޑު ފައިދާއެއް އޮތީ ރާއްޖެއަށް ކަމަށެވެ.
"އަޅުގަނޑު ގަބޫލުކުރާ ގޮތުގައި ސާފް ޗެމްޕިއަންޝިޕްގައި މިއޮތް ފަސްޓީމުން ކުރެ އެއްވެސް ޓީމަކަށް ފައިދާވާ ގޮތަކަށް ޝެޑިއުލް އޮތް ކަމަށް ވަންޏާ އެފައިދާ އޮތީ ރާއްޖެއަށް. އެއީ ފަށަން އޮތް ގޮތާއި، ދޭތެރެ މެދުގައި އޮތް ގޮތާއި އެހުރިހާ ގޮތަކަށްބަލާއިރު, އަދި އެންމެ ފަހުގައި އިންޑިއާ އޮތުމުން،" ސުޒޭން ބުންޏެވެ.
ކޮންމެ ދެ މެޗެއްގެ ދޭތެރޭގައި ތިން ދުވަސް ރެސްޓް ކުރަން ލިބޭއިރު މުބާރާތުގެ ފުރަތަމަ މެޗުގައި ރާއްޖެ ވާދަ ކުރަން ޖެހޭނީ ނޭޕާލާ އެވެ. އެ މެޗަށް ފަހު ދެން ރާއްޖޭގެ މެޗެއް އޮންނާނީ އޮކްޓޫބަރު ހަތްވަނަ ދުވަހު އެވެ. އެމެޗުގައި ވާދަ ކުރާނީ ރާއްޖެ އާއި ބަންގްލަދޭޝް އެވެ. އޭގެ ފަހުން 10 ވަނަ ދުވަހު ސްރީލަންކާ އާއި ވާދަ ކުރުމަށް ފަހު އެންމެ ފަހު މެޗުގައި ވަރުގަދަ އިންޑިއާ އާއި ރާއްޖެ ބައްދަލު ކުރާން ޖެހޭނީ 13 ވަނަ ދުވަހު އެވެ.
ސުޒޭން ބުނީ މުބާރާތުގައި ރާއްޖެއަށް އެންމެ އުނދަގޫ ވާނީ އިންޑިއާ އާއި ބައްދަލުކުރާ މެޗު ކަމަށެވެ. ނަމަވެސް މުބާރާތުގެ އެންމެ ފަހު މެޗުގައި އިންޑިއާ އާއި ބައްދަލު ކުރަން ޖެހުމުން އެއީ ލިބޭ ވަރަށް ބޮޑު ހިތްހަމަޖެހުމެއް ކަމަށެވެ.
އަދި ރާއްޖޭގެ ފުޓުބޯޅައިގެ ތާރީހުގައި މިހާތަނަށް ސްޕޯޓަރުންނާއި ނުލައި އެއްވެސް ކާމިޔާބެއް ހޯދިފައި ނުވާކަން ފާހަގަކޮށް ސުޒޭން ބުނީ މިފަހަރުގެ ސާފް ޗެމްޕިއަންޝިޕްގައި ވެސް ސަޕޯޓަރުންގެ ފަރާތުން އެސަޕޯޓު ބޭނުންވާ ކަމަށެވެ.
"ދިވެހިރާއްޖޭގެ 12 ވަނަ ކުޅުންތެރިޔާ ނުލައި މިހާތަނަށް ރާއްޖެއަށް ހޯދުނު އެއްވެސް ކާމިޔާބެއް ނޯންނާނެ. ކޮރެއާ އާއި އެއްވަރު ކުރުމުން ފެށިގެން 2008 ގެ ސާފް ޗެމްޕިއަންޝިޕް ހޯދުން، 2018 ގެ ސާފް ޗެމްޕިއަންޝިޕް ހޯދުން ކަމަށްވިޔަސް ބޮޑު ކާމިޔާބެއް ރާއްޖެއަށް ހޯދިފައެއް ނޯންނާނެ. އަދި ކްލަބަކަށް ވެސް އޭއެފްސީ ކަޕްގައި ކާމިޔާބެއް ހޯދިފައެއް ނޯންނާނެ ރާއްޖޭގެ 12 ވަނަ ކުޅުންތެރިޔާ އާއި ނުލައި،" ސުޒޭން ބުންޏެވެ.
ރާއްޖެއިން ފުރަތަމަ ފަހަރަށް 2008 ވަނަ އަހަރުގައި ސާފް ޗެމްޕިއަންޝިޕް ކާމިޔާބު ކުރި އިރު، މުބާރާތް ބޭއްވީ ރާއްޖެއާއި ސްރީލަންކާގަ އެވެ. ފައިނަލު މެޗު ލަންކާގައި ކުޅުނު އިރުވެސް ގިނަ އަދަދެއްގެ ސަޕޯޓަރުން ވަނީ ރާއްޖެ ޓީމަށް ސަޕޯޓު ކުރުމަށް ލަންކާއަށް ގޮސްފަ އެވެ.
މުބާރާތާއި ދިމާކޮށް ޓީމުގެ އެސިސްޓެންޓް ގޯލްކީޕަރު ކޯޗު ކަމާއި ހަވާލުވި ކުރީގެ ގައުމީ ގޯލުކީޕަރު އިމްރާން މުހައްމަދު ބުނީ އެންމެ ބޮޑު އުއްމީދަކީ 2008 ވަނަ އަހަރު ރާއްޖޭގައި ސާފް ޗެމްޕިއަންޝިޕް ހޯސްޓް ކުރިއިރު އޮތްވަރުގެ ފޯރިއެއް މި ފަހަރު ވެސް ގެނައުން ކަމަށެވެ.
މިއަހަރު ރާއްޖޭގައި އޮންނަ 13 ވަނަ ސާފް ޗެމްޕިއަންޝިޕް ފުޓްބޯޅަ މުބާރާތް އޮންނާނީ އޮކްޓޫބަރު އެކަކުން 16 އަށް ރާއްޖޭގަ އެވެ. މިފަހަރުގެ މުބާރާތުގައި ބައިވެރިވީ ފަސް ގައުމަކުންނެވެ. އެއީ ދިވެހިރާއްޖެ، ނޭޕާލް، އިންޑިއާ، ބަންގްލްދޭޝް އަދި ސްރީލަންކާ އެވެ.
ޕާކިސްތާނަށް މުބާރާތުގައި ބައިވެރި ނުވެވެނީ ފީފާގެ ސަސްޕެންޝަނެއްގައި އެގައުމު އޮތުމުންނެވެ. ބޫޓާނުން މުބާރާތުގައި ބައިވެރި ނުވަނީ އެގައުމުގައި ކޮވިޑްގެ ހާލަތު ގޯސްވުމުގެ ސަބަބުން ޒަރޫރީ ބޭނުންތަކުގައި ފިޔަވައި ގައުމުން ބޭރަށް ދަތުރު ކުރުން މަނާކޮށްފައި ވާތީ އެވެ.