ދިރި ނޫޅެވޭ ކުދި ބިންކޮޅުތަކާއި ކުދި ކުދި ފްލެޓްތަކުގައި ދިރިއުޅޭ ފަރާތްތަކަށް އެ މީހުން އިހުތިޔާރުކުރާ އެހެންތަނަކުން އެކަށީގެންވާ ވަރުގެ ގޯއްޗެއް ދޭނެ ކަމަަށް މި ސަރުކާރުން ވައުދުވެފައި އޮތް ނަމަވެސް އެ ވައުދު ނުފުއްދާތީ އެ މައްސަލަ މަޖިލީހަށް ހުށަހަޅައިފި އެވެ.
އެ މައްސަލަ މަޖިލީހަށް ހުށަހެޅުއްވީ އެމްޑީޕީއަށް ނިސްބަތްވާ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) އެވެ.
ގޯތި ގެދޮރުގެ މައްސަލަައާއި ބޯހިޔާވަހިކަމުގެ މައްސަލަ ހައްލު ކުރުމަށް އެމްޑީޕީއާއި ސަރުކާރުގެ މެނިފެސްޓޯގައި ހިމަނައިފައިވާ ގޮތަށް ވައުދު ނުފުއްދާތީ ބޮންޑޭ ވަނީ ސަރުކާރަށް ވަރަށް ބޮޑަށް ފާޑު ވިދާޅުވެފަ އެވެ. އަދި މާލޭގެ އާބާދީ ތޮއްޖެހުމުގެ މައްސަލަތަކަށް ހައްލެއް ހޯދާދޭނެ ކަަމަށް ރައީސް އިބްރާހިމް މުހައްމަދު ސޯލިހު ވައުދުވެފައިވާ ގޮތަށް އެ ވައުދު ފުއްދުމަށް ވެސް އޭނާ އެދިވަޑައިގަތެވެ.
"އެ ވައުދުތަކަކީ ރައީސް އޮފީހުގެ ވެބްސައިޓުން ވެސް އެއްމެހާ ރައްޔިތުންނަށް ފެންނަ ގޮތަށް އާންމު ކޮށްފައިވާ ވައުދުތަކެއް" ބޮންޑޭ ހުށަހެޅުއްވި މައްސަލައިގައި ބުނެފައި ވެއެވެ.