މާލޭގެ ރައްޔިތުންނަށް ގޯތި ދޫކުރަން ސަރުކާރަށް ދީފައިވާ މުއްދަތުގެ ތެރޭގައި އެކަން ނުކޮށްފިނަމަ ސަރުކާރު ބަދަލުކުރަން ނިކުންނާނެ ކަމަށް މާލޭ ގޯތި ހަރަކާތުގެ ފައުންޑާ އަދި އެމްޑީޕީ އުފެއްދުމުގައި ވެސް އިސްކޮށް އުޅުއްވި ޝުއައިބް އަލީ (ފުރަހަނި ޝުއައިބް) ވިދާޅުވެއްޖެ އެވެ.
އަވަސްގެ ފޭސް ޓު ފޭސް ޕްރޮގްރާމްގައި ވާހަކަދައްކަވަމުން ޝުއައިބް ވިދާޅުވީ ކޮންމެ ސަރުކާރަކުން ވެސް އަދި މަޖިލީހަށް މާލޭގެ ދާއިރާތަކުން ހޮވޭ މެމްބަރުން ވެސް ގޮނޑިއަށް އިންތިހާބު ވަނީ ގޯތި ހޯދައިދޭނެ ކަމުގެ ވައުދާ އެކުގައި ކަމަށެވެ. އެކަމަކު އިންތިހާބުވުމަށްފަހު އެކަން ހަނދާނުގައި ނުހުންނަ ކަމަށެވެ.
މި ސަރުކާރުން ވެސް މާލޭގެ ރައްޔިތުންނަށް ގޯތި ހޯދައިދޭނެ ކަމުގެ ވައުދުވެފައިވާ ކަމަށާއި އެކަމަކު އެ މަސައްކަތް ކުރިއަށް ނުދާ ކަމަށް ޝުއައިބް ވިދާޅުވި އެވެ. މަދަނީ ހަރަކާތެެއްގެ ގޮތުގައި ގޯތި ހަރަކާތް ފެށީ ވެސް މި ސަރުކާރަށް އެކަން ނުވާނެ ކަމުގެ ޔަގީންކަން ލިބުމުން ކަމަށް ވިދާޅުވި އެވެ.
ގޯތި ހަރަކާތުން މީގެ ކުރިން ވަނީ ރައީސް އިބްރާހިމް މުހައްމަދު ސޯލިހާއި އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދާ ވެސް ބައްދަލުކޮށް މާލެ ސަރަހައްދުން ގޯތި ދޫކުރެވޭނެ ޕްލޭންތައް ހިއްސާކޮށްފަ އެވެ. ރައީސް ސޯލިހާއި އެކު ބޭއްވި ބައްދަލުވުމުގައި މި އަހަރުގެ ޑިސެމްބަރުގެ ނިޔަލަށް މާލޭގެ ރައްޔިތުންނަށް ގޯތި ދޫކުރުމަށް މުހުލަތެއް ވަނީ ދީފަ އެވެ.
"އަޅުގަނޑުމެންނަށް މިހާރުވެސް ކޮންމެވެސް ވަރަކަށް މުޒާހަރާ ކުރެވިއްޖެ. ކޮވިޑާ ގުޅިގެން މަޑުޖެހުނީ. އަޅުގަނޑުމެން ދީފައިވާ މުހުލަތަށް އެކަން ނުކުރެވިއްޖެ ނަމަ ދެން ނިކުންނާނީ ސީދާ ސަރުކާރު ބަދަލުކުރަން. ކުރިއަށް އޮތް ރިޔާސީ އިންތިހާބުގައި ބަލާނަން މިކަން ކޮށްދެވޭނީ ކޮންބަޔަކަށްތޯ. ބެލުމަށްފަހު އެބަޔަކާ އެކީގައި އަޅުގަނޑުމެން ކޯލިޝަން ހަދާނަން. އެ ކޯލިޝަނަކީ ކެބިނެޓް ބަހާ ސިޔާސީ މަގާމުތައް ހޯދަން ހަދާ ކޯލިޝަނެއް ނޫން. އިންޑިވިޖުއަލީ ގާނޫނީ ގޮތުން ކޮން ގޮތެއްގެ މަތިންތޯ ބަލައި ކޯލިޝަން ހަދާނީ. އަޅުގަނޑުމެންނަށް ގާނޫނުން މިކަން ކުރާނެ ގޮތްތައް ވަނީ ފެނިފައި. އަޅުގަނޑުމެން ހަދާނީ ގޯތި ކޯލިޝަނެއް. ނޯ ގޯތި، ނޯ ވޯޓް އަޅުގަނޑުމެންގެ ސްލޯގަން އަކީ،" ޝުއައިބް ވިދާޅުވި އެވެ.
އޭނާ ވިދާޅުވީ އެ ހަރާކާތުން ސަރުކާރުގައި އެދެމުން ދަނީ ގުޅިފަޅާއި ފުށިދިއްގަރުފަޅުން މާލޭގެ ރައްޔިތުންނަށް ގޯތި އަޅަން ބިން ދޫކޮށްދިނުމަށް ކަމަށެވެ. ގުޅިފަޅު ލިބިއްޖެނަމަ ދައުލަތުގެ ބަޖެޓަށް ބަރޯސާ ނުވެ 1500 އަކަފޫޓުގެ 10،000 ގޯތި ހިލޭ ދެވެން އެބައޮތް ކަމަށްވެސް ވިދާޅުވި އެވެ.
ޝުއައިބް ވިދާޅުވީ ސަރުކާރުން ބިން ދިނީމާ އެ ބިންތަކުގައި ނިކަމެތިންނަށް ކުޑަ އިންޓްރެސްޓެއްގައި އިމާރާތެއް ހެދޭނެ ޕްލޭނެއް ވެސް އެމީހުންގެ އަތުގައި އެބަ އޮތް ކަމަށެވެ. އެ ޕްލޭން ސަރުކާރަށް ހުށަހަޅައިފައި ވާނެ ކަމުގައިވެސް ވިދާޅުވި އެވެ. މީގެ އިތުރުން އިންޑިއާ ސަރުކާރަށް ދީފައިވާ އުތުރުތިލަފަޅަކީ ކުނި އަންދާ ތަނަކަށް ހެދުމަށާއި ގުޅިފަޅުގައި އަޅާ ޕޯޓު ތިލަފުއްޓަށް ބަދަލުކޮށްދިނުމަށް ސަރުކާރުގައި އެދިފައިވާނެ ކަމަށްވެސް ވިދާޅުވި އެވެ.
"ސަރުކާރުން ވައުދުތަކެއް ވެގެން އައިސް ގަސްދުގައި ރައްޔިތުން ބިކަކޮށްލަނީ. މިއީ ބަލައިގަނެވޭނެ ކަމެއް ނޫން. ފްލެޓަކީ ހައްލެއް ނޫން. މާލޭގެ ރައްޔިތުން ބޭނުންވަނީ އެމީހުންގެ އަމިއްލަ ބިމެއް. އަމިއްލަ ގޯއްޗެއް،" ޝުއައިބް ވިދާޅުވި އެވެ.
ޝުއައިބް އިތުރަށް ވިދާޅުވީ މިހާރުގެ މާލެ ސިޓީ ކައުންސިލުންނާއި މާލޭގެ ރައްޔިތުންގެ ފަރާތުން ގޯތި ހަރަކާތުން ކުރާ މަސައްކަތަށް އެއްބާރުލުން ލިބޭ ކަމަށެވެ. އަދި މާލޭގެ ރައްޔިތުންގެ ހައްގުގައި ސިޓީ ކައުންސިލުން ކުރަމުންދާ މަސައްކަތްތަކަށް ޝުއައިބް ވަނީ ތައުރީފް ވެސް ކުރައްވާފަ އެވެ.