އިންތިގާލީ އިންސާފުގެ އޮފީހުން 400 އަށްވުރެ ގިނަ މައްސަލަ ބަލަން ނިންމައިފި އެވެ.
އިންތިގާލީ އިންސާފުގެ އޮފީހުން ވަނީ މިދިޔަ ޖޫން މަހުގެ 13 ވަނަ ދުވަހުން ފެށިގެން ސެޕްޓެމްބަރު 13 ވަނަ ދުވަހުގެ ނިޔަލަށް އެ އޮފީހަށް މައްސަލަ ހުށަހެޅުމަށް ފުރުސަތު ހުޅުވައިލާފަ އެވެ. އެ ފުރުސަތުގައި ޖުމްލަ 487 މައްސަލަ ހުށަހެޅި ކަމަށް އެ އޮފީހުން ބުންޏެވެ. ނަމަވެސް ބަލަން ނިންމާފައި ވަނީ 449 މައްސަލަ އެވެ.
އިންސާފު ހޯދަން އެންމެ ގިނައިން ހުށަހަޅާފައި ވަނީ ބޯހިޔާވަހިކަމާ ގުޅުންހުރި މައްސަލަތަކެވެ. އެގޮތުން ބޯހިޔާވަހިކަމުގެ 172 މައްސަލައެއް ވަނީ ހުށަހަޅާފަ އެވެ. ދެން އެންމެ ގިނައިން ހުށަހަޅާފައި ވަނީ މަސައްކަތް ކުރުމުގެ ހައްގާ ގުޅޭ މައްސަލަތަކެވެެ. އޭގެ 156 މައްސަލައެއް އެ އޮފީހަށް ވަނީ ހުށަހަޅާފަ އެވެ.
މީގެ އިތުރުން އަދުލުވެރިކަމާއި ހަމަހަމަކަމާއެކު ޝަރީއަތްކުރުމާ ގުޅޭ 26 މައްސަލަ އާއި، ލާއިންސާނީ އަދަބު ނުދިނުމާ ގުޅޭ 24 މައްސަލަ ހިމެނެ އެވެ.
އެ އޮފީހަށް ހުށަހަޅާފައިވާ މައްސަލަތަކުގެ ތެރެއިން 26 މައްސަލައެއް ނުބެލޭނެ ކަމަށް ވަނީ ކަނޑައަޅާފަ އެވެ. އޭގެތެރެއިން ފަސް މައްސަލައެއް ނުބަލަން ނިންމާފައި ވަނީ ޝަރުއީ މަރުހަލާ ކުރިއަށްދާތީ އެވެ.
އިންތިގާލީ އިންސާފުގެ އޮފީހުގެ މައިގަނޑު މަސައްކަތަކީ ރައީސް މުހައްމަދު އަމީންގެ ވެރިކަމުން ފެށިގެން ރައީސް އަބްދުﷲ ޔާމީންގެ ވެރިކަމާ ހަމައަށް ނިޒާމީ ގޮތެއްގައި ރޭވިގެން ދައުލަތުގެ އިދާރާއަކުން ނުވަތަ އެތަނުގެ ވެރިޔަކު މީހެއްގެ އިންސާނީ ހައްގަށް އަރައިގެންފައިވާނަމަ، އެ މައްސަލައެއް ބެލުމެވެ.
