ލުބްނާންގެ އިންފޮމޭޝަން މިނިސްޓަރު ޖޯޖް ކަރުދާހީ އިސްތިއުފާ ދެއްވަން އެއްބަސްވެ ވަޑައިގެންފި އެވެ. އޭނާ ވިދާޅުވީ އޭނާގެ ސަބަބުން އެއްވެސް ބައެއްގެ މެދުގައި އޮތް ގުޅުމެއް ކަނޑައިގެންދާން އެދިވަޑައި ނުގަންނަވާ ކަމަށެވެ.
ލުބްނާންއާ އަރަބި ގައުމުތަކާ މެދު ރަނގަޅު ގުޅުމެއް ދެމެހެެއްޓުމަކީ އެދިވަޑައިގަންވާ ކަމެއް ކަމަށް ވެސް ކަރުދާހީ ވިދާޅުވި އެވެ. އިސްތިއުފާ ދެއްވުމުން ކުރިއަށް ވުރެ ގުޅުން ރަނގަޅުވުމަށް ވެސް އެދިވަޑައިގެންނެވި އެވެ.
އަރަބި ގައުމުތަކުން ލުބްނާން ތަފާތުކުރި ސަބަބަކީ ޖޯޖް ކަރުދާހީ ހޫތީންނަށް ތާއީދު ކުރައްވައި އަދި ސައޫދީ ކޯލިޝަނަށް ބަދުބަސް ވިދާޅުވުމެވެ.
ކަރުދާހީ ދެއްކެވި ވާހަކަތަކަށް ނުރުހުން ފާޅު ކުރުމުގެ ގޮތުން ސައުދީއާ ޔުނައިޓެޑް އަރަބް އެމިރޭޓްސް އާއި ކުވައިތު އަދި ބަހްރޭނުން ވަނީ ލުބުނާނުގައި ތިބި އެ ގައުމުތަކުގެ ސަފީރުން އަނބުރާ ގައުމަށް ގެންގޮސްފަ އެވެ.
ކަރުދާހީ ވިދާޅުވީ ޔަމަނުގައި ހޫތީން އެކުރަނީ ހައްގު ޖިހާދެއް ކަމަށާއި އެއީ އަމިއްލަ ނަފުސާއި ވަތަންގެ ދިފާއުގައި ހޫތީންވާ ގުރުބާނީއެއް ކަމަށެވެ. އަދި ސައުދީއާ ޔުނައިޓެޑް އަރަބް އެމިރޭޓްސް އަދި ބަހްރޭނުން ކުރަނީ ބޭކާރު ހަނގުރާމައެއް ކަމަށެވެ.
އަރަބި ގައުމުތަކުން ލުބްނާންއާ މެދު ދެކޭ ގޮތްު ސާފުކޮށް ގުޅުން ދެމެހެއްޓުމުގެ ނިޔަތުގައި އަރަބި ލީގުގެ ވަފުދެއް ވެސް ވަނީ ލުބްނާންއަށް ދަތުރުކޮށްފަ އެވެ. އަދި ލުބްނާންގެ ރައީ މިޝޭލް އައުން އާއި ބޮޑުވަޒީރު ނަޖީބު މިގާތީއާ ވެސް ވަފުދުން ބައްދަލުކޮށް މަޝްވަރާ ކުރެއްވި އެވެ.
އަރަބި ގައުމުތަކުން ދެކޭ ގޮތުގައި ލުބްނާންގެ ވެރިންގެ މައްޗަށް ހިޒްބުﷲއިން ގޮތްފޮތް ކިޔާހާ ހިނދު ރަނގަޅު ގުޅުމެއް ދެމެހެއްޓުން އުނދަގޫވާނެ އެވެ. އަދި ލުބްނާންއަށް ކުރިމަތިވެފައި އޮތް ދަތި ހާލަކީ ވެސް އިރާންއާ ހިޒްބުﷲގެ ސަބަބުން މެދުވެރިވެފައި އޮތް ހާލަތެކެވެ.