މިއީ ކުދި ގައުމުތަކުގެ ސަލާމަތަށް އޮތް ހަމައެކަނި ފުރުސަތު: ތޯރިގް

މޫސުމަށް އަންނަ ބަދަލުތައް ކުޑަކުރުމަށް ހުރިހާ ގައުމުތަކުން ގާނޫނީ އެއްބަސްވުމަކަށް ދާން އޮތް ހަމަ އެކަނި ފުރުސަތަކީ މިހާރު ފްރާންސްގައި ކުރިއަށްދާ ކޮޕް21 ބައްދަލުވުން ކަމަށް ތިމާވެއްޓާ ބެހޭ މިނިސްޓަރު ތޯރިގް އިބްރާހިމް ވިދާޅުވެއްޖެ އެވެ.

ކޮޕް21ގައި އެލަޔަންސް އޮފް ސްމޯލް އައިލަންޑް ސްޓޭޓް (އެއޮސިސް) ގެ ޗެއާގެ ހައިސިއްޔަތުން މިނިސްޓަރު ތޯރިގް ދެއްވި ތަގުރީރުގައި ވިދާޅުވީ، މޫސުމަށް އަންނަ ބަދަލުތަކުން ސަލާމަތްވާން ބޭނުންނަމަ، އެކަމަށް އޮތް ހަމައެކަނި ގޮތަކީ މިހާރުން މިހާރަށް ހަރުދަނާ ފިޔަވަޅުތަކެއް އެޅުން ކަމަށެވެ. މީގެ ކުރިން ދުވަހަކުވެސް އަސަރު ނުކުރާ ވަރަށް މޫސުމަށް އަންނަ ބަދަލުތަކުގެ ސަބަބުން ކުދި ޖަޒީރާ ގައުމުތަކަށް ނޭދެވޭ އަސަރުކުރަމުންދާ ކަމަށާއި، މިހާރުން މިހާރަށްވެސް އެ އަސަރުތައް ކުޑަކުރަން ފިޔަވަޅު އަޅާން ޖެހޭ ކަމަށް ތޯރިގު ވިދާޅުވި އެވެ.

ތޯރިގް ވިދާޅުވީ ރެކޯޑް އަދަދަކަށް ތޫފާނާއި، ސައިކްލޯން، ޕެސިފިކް ގައުމުތަކަށް އަރަމުންދާ ކަމަށެވެ. އަދި އިންޑިއާ ކަނޑުގެ ގައުމުތަކަށް މީގެ ކުރިން ދުވަހަކުވެސް ފެން ބޮޑު ނުވާ ވަރަށް ފެންބޮޑުވެ، އުދަ އެރުން ފަދަ ކަންކަން ދިމާވަމުންދާ ކަން މިނިސްޓަރު ފާހަގަ ކުރެއްވި އެވެ. ވުމާއެކު ދުނިޔޭގެ ފިނި ހޫނުމިން ދެ ޑިގްރީއަށް އުފުލެންދެން މަޑުން ތިބުމަކީ ނުރައްކާތެރިކަމެއް ކަމަށް ތޯރިގް ވިދާޅުވި އެވެ. މިނިސްޓަރު ވިދާޅުވީ އަލަށް އެކުލަވާލާ ގާނޫނީ އެއްބަސްވުމުގައި ފިނިހޫނުމިން 1.5 ޑިގްރީ އަށް ވުރެ ދަށްކުރަން މަސައްކަތްކުރުން ލާޒިމް ކުރަންޖެހޭ ކަމަށެވެ.

"ޕެރިސް އެގްރިމެންޓްގެ ދިގު މުއްދަތުގެ އަމާޒަކަށް ވާންޖެހޭނީ ދުނިޔޭގެ ފިނި ހޫނުމިން 1.5 ޑިގްރީއަށް ވުރެ ދަށްކުރުން. އެއަށް މަގުފަހިވާގޮތަށް ކުރު، އަދި މެދު ރާސްތާގެ އަމާޒުތައް އެކުލަވާލަންޖެހެނީ،" މިނިސްޓަރު ވިދާޅުވި އެވެ.

މޫސުމަށް އަންނަ ބަދަލުތައް ކުޑަކުރުމަށް ފައިސާ ހޯދާނެ ގޮތްތަކާ ބެހޭގޮތުން ތޯރިގް ވިދާޅުވީ، 2020 އިން ފެށިގެން އަހަރަކު 100 ބިލިއަން ޑޮލަރުުގެ ފަންޑެއް އެކުލަވާލަންޖެހޭ ކަމަށެވެ. އަދި އެ ފަންޑަކީ ކުދި ގައުމުތަކަށް މާލީ އެހީ ފޯރުކޮށްދޭން އިސްކަންދޭ ފަންޑަކަށް ވާންޖެހޭ ކަމަށް ވެސް ތޯރިގް ވަނީ ވިދާޅުވެފަ އެވެ.

މޫސުމަށް އަންނަ ބަދަލުތައް ކުޑަކުރުމާ ބެހޭ އދގެ މުއާހަދާއެއްގެ ދަށުން އެކުލަވާލި ކިޔޫޓޯ ޕްރޮޓޮކޯލްގެ މުއްދަތު 2020 ވަނަ އަހަރު ހަމަވާތީ، ކިޔޯޓޯގެ ބަދަލުގައި އަމަލުކުރާނެ އައު ގާނޫނީ އެއްބަސްވުމެއް ކޮޕް21 ބައްދަލުވުމުގައި އެކުލަވާލާނެ އެވެ.