- ރަށްތައް ދޫކުރުމާއި ޕްރޮޖެކްޓްތަކުގެ ކަންކަން ކުރާނީ ޓޫރިޒަމުން
- ހުރިހާ ފޯކަސްއެއް ރާއްޖެ މާކެޓް ކުރުމަށް
- ހިޔާނާތާ ގުޅިގެން ފިޔަވަޅެއް އެޅޭނީ ތަހުގީގު ނިމުމުން
މުޅި ދުނިޔޭގައި ރާއްޖެ ޕްރޮމޯޓް ކުރުމުގެ މަސައްކަތް ކުރާ ދައުލަތުގެ ކުންފުނި، އެމްއެމްޕީއާރުސީ އިން ކުރަމުން އައި ޓޫރިޒަމް އިންވެސްޓްމަންޓްތަކާ ގުޅޭ މުއާމަލާތްތައް ކުރުން ހުއްޓާލައި އެ މަސައްކަތްތައް މިނިސްޓްރީގެ ދަށުން ކުރާ ގޮތަށް ހަމަޖައްސައިފި އެވެ.
ކުރީގެ ނައިބު ރައީސް އަހުމަދު އަދީބު ޓޫރިޒަމް މިނިސްޓަރަކަށް ހުންނެވި ދުވަސްވަރު، ރާއްޖޭގެ ރަށްތަކާއި ފަޅުތައް އެކި ކުންފުނިތަކަށް ދިނުމާއި ޓޫރިޒަމް އިންވެސްޓްމަންޓާ ގުޅުން ހުރި ޕްރޮޖެކްޓްތައް ހިންގުމުގެ މަސައްކަތް ވަނީ މިނިސްޓްރީގެ ދަށުން ހިންގާ އެމްއެމްޕީއާރުސީ އިން ކުރާ ގޮތަށް ހަމަޖައްސައިފަ އެވެ. އަދި އެކަމުގެ ހިންގި އެއް ބިލިއަން ރުފިޔާއާ ގާތް ކުރާ އަދަދަކެއްގެ ފައިސާގެ ހިޔާނަތްތަކެއް ވަނީ މިފަހުން ފަޅާ އަރައިފަ އެވެ.
އެ ކުންފުނީގެ އެކްޓިން އެމްޓީ އަކަށް މިފަހުން ހަމަޖެއްސި، ހާރިސް މުހައްމަދު މިއަދު، "އަވަސް" އަށް ވިދާޅުވީ ތަހުގީގު ކުރަމުން ދާ މައްސަލަތަކެއް ވެސް ހުރުމާ އެކު އެމްއެމްޕީއާރުސީ އިން ރަށްތައް އެކި ފަރާތްތަކަށް ކުއްޔަށް ދިނުމާއި ޓޫރިޒަމްގެ އެކި މަޝްރޫއުތައް ހިންގުމުގެ ކަންކަން ކުންފުނިން ނުކުރާ ގޮތަށް ނިންމާފައިވާ ކަމަށެވެ. އަދި އެ ހުރިހާ މަސައްކަތްތަކެއް ކުރާނީ ހަމަ ސީދާ ޓޫރިޒަމް މިނިސްޓަރުގެ ބެއްލެވުމުގެ ދަށުން އެ މިނިސްޓްރީ އިން ކަމަށް ވެސް ހާރިސް ވިދާޅުވި އެވެ.
"ސަރުކާރުގެ ސިޔާސަތުގެ ދަށުން، އަދި ރައީސްގެ ވެސް އިރުޝާދުގެ ދަށުން އިންވެސްޓްމަންޓް ރިލޭޓެޑް ހުރިހާ ކަމެއް އަޅުގަނޑުމެން ކުރުން ހުއްޓާލާފައި ވަނީ. އެކަހަލަ ކަމެއް އަޅުގަނޑުމެން ނުކުރާނެ. ރަށްތައް ދޫކުރުމާއި އެކި ޕްރޮޖެކްޓްގެ ކަންކަން މިނިސްޓްރީ އިން ކުރިއަށް ގެންދަވާނީ މި ކުންފުނި މެދުވެރި ނުވެ. އަޅުގަނޑުމެން ދެން ހަމަ ކުރާނީ ރާއްޖޭގެ ޓޫރިޒަމް ދުނިޔޭގައި ޕްރޮމޯޓް ކުރުމުގެ ކަންކަން. އެ މަސައްކަތްތައް ވަރަށް ބާރަށް ކުރިއަށް ގެންދާނަން،" ހާރިސް ވިދާޅުވި އެެވެ.
އޭނާ ވިދާޅުވީ ކުންފުނީގެ ތެރެއިން ވަރަށް ގިނަ ނޭދެވޭ ކަންތައްތަކެއް ހިނގައިގެން ގޮސްފައިވާ ކަމަށެވެ. އަދި ކުންފުނިން މިހާރު ފޯކަސް ކުރަނީ ކުންފުނީގެ އަސްލު މަސައްކަތް ކަމަށްވާ ދުނިޔޭގެ އެކި ކަންކޮޅުތަކުގައި ރާއްޖެ ޕްރޮމޯޓްކޮށް ރާއްޖެ އަންނަ ޓޫރިސްުޓުން އިތުރު ކުރުމުގެ މަސައްކަތްތައް ކަމަށް ހާރިސް ވިދާޅުވި އެވެ. އަދި އެ މަސައްކަތްތަކުގެ ނަތީޖާ ވަގުތުން ނުފެނުނު ނަމަވެސް ކުރިއަށް އޮތް ދެތިން މަހެއްގެ ތެރޭގައި އޭގެ ތަފާތު ފެންނާނެ ކަމަށް އޭނާ ވިދާޅުވި އެވެ. ހާރިސް ވިދާޅުވީ ޕްރޮމޯޝަންގެ ކަންކަން ކުރިއަށް ވުރެ މާބާރަށް ގެންދާނެ ކަމަށް ވެސް ހާރިސް ވިދާޅުވި އެވެ.
"ޕްރޮމޯޝަންގެ ކަންކަމަށް އަޅުގަނޑުމެން ކުރިއަށް މި އޮތް ދުވަސްތަކުގައި ހަމަ އެކީގައި ފޯކަސް ކުރާނެ. އެކި ގައުމުތަކުގައި ރޯޑް ޝޯތަކާއި ފެއާތައް އިވެންޓްތަކުގައި ރާއްޖެ ބައިވެރިވާނެ ކުރިއަށް ވުރެ މާ ބޮޑަށް. އެ ކަންތައްތައް ހުއްޓައެއް ނުލާނަން ހަމަ އެއްވެސް ގޮތަކަށް،" ހާރިސް ވިދާޅުވި އެވެ.
އޭސީސީ އިން ބަލާ ކުންފުނީގެ ހިޔާނާތާ ގުޅޭ ގޮތުން ހާރިސް ވިދާޅުވީ، އެކަމާ މެދު އެއްވެސް ފިޔަވަޅެއް އެޅޭނީ ވެސް ތަހުގީގުތައް ނިމުމުން ކަމަށެވެ. އަދި ކުންފުނީގެ ތެރެއިން އިންވެސްޓަރުންނާ މެދު ގޯސްކޮށް ކަމެއް ހިނގާފައި އޮތް ނަމަ، މިނިސްޓްރީ އާއި ކުންފުނިން ވާހަކަ ދައްކައިގެން ސުލްހަވެރި ގޮތަކަށް ކަންކަން ކުރެވޭތޯ ބައްލަވާނެ ކަމަށް ވެސް ހާރިސް ވިދާޅުވި އެެވެ.