އަބަދުވެސް މީހުން ބުނާތީ އަޑުއިވެ އެވެ. ފެހިކަން ގަދަ ތަރުކާރީ އާއި މޭވާ ގައި ހަށިގަނޑަށް އެންމެ ބޭނުންވާ ގިނަ މާއްދަތަކެއް ހިމެނެ އެވެ.
ގްރީން ޓީ އަކީ ވެސް އޭގެއިން ގިނަ ފައިދާތަކެއް ލިބޭ ބުއިމެކެވެ. ގްރީން ޓީ އަކީ އާންމުގޮތެއްގައި ހާއްސަ ޑައިޓްތަކުގައި އުޅޭ މީހުން ހިކެން ކަމަށް ބުނެ ބޯ އެއްޗަކަށް ވިޔަސް މިއީ ބަނޑުތެރެ ސާފުކުރަން ބޯން ރަނގަޅު އެއްޗަކަށް ވުމުގެ އިތުރަށް މިއީ ހަންގަނޑަށާއި އިސްތަށިގަނޑަށް ވސް ވަރަށް ގިނަ ފައިދާތައް ލިބޭ އެއްޗެކެވެ.
އެގޮތުން ގްރީން ޓީ ސައިފަތް ބޭނުންކޮށްގެން ގޭގައި ފަސޭހައިން ހަންގަނޑަށާއި އިސްތަށިގަނޑަށް މި ފަރުވާ ދެވިދާނެ އެވެ.
ތިން މޭޒުމަތީ ސަމުސާ ކާށިތެލާ، ތިން މޭޒުމަތީ ސަމުސާ އާމަންޑް ތެޔޮ ތެރެއަށް ފެންކޮޅަކަށްލައި، ތެންމާފައިވާ ދެ ޕެކެޓް ގްރީން ޓީގެ ސައިފަތް އަޅާށެވެ. އެއަށްފަހު ޕޭސްޓް ގަނޑަކަސް ވަންދެން ސަމުސަލަކުން ރީތިކޮށް މިކްސްކުރާށެވެ. ޕޭސްޓް ގަނޑެއްހެން ތައްޔާރުވުމުން ބޭނުންކަމަށްވާނަމަ މީގެތެރެއަށް އެސެންޝިއަލް އޮލް ދެތިން ތިކި ވެސް އެޅިދާނެ އެވެ. މޫނު ރީތިކޮށް ސާފުފެނުން ދޮވެލައި ފެން ހިއްކާލުމަށްފަހު ތައްޔާރުކުރި ޕޭސްޓްގަނޑު މޫނުގައ އުނގުޅާލާށެވެ. ފަނަރަވަރަކަށް މިނިޓް ވަންދެން ބެހެއްޓުމަށްފަހު، މޫނު ދޮވެލާށެވެ. މިޕޭސްޓް ހަފްތާއަކު ދެދުވަހު މޫނުގައި އުނގުޅިދާނެ އެވެ. ހަންގަނޑު މަޑުވެފައި ތާޒާކަމަށް ފާހަގަކުރެވޭނެ އެވެ.
މޫނުގައި ހުންނަ ލައް ފިލުވަން
އަހަރުމެންގެ ތެރެއިން ގިނަ މީހުންނަކީ މޫނުގައ ބިހި ނެގުމުގެ މައްސަލަ ދިމާވާ މީހުންނެވެ. މިހެން މޫނުގައި ނަގާ ބިއްސެއް ރަނގަޅުވުމުން އެހިސާބުން ނިމުނީކީ އެއް ނޫނެވެ. އެބިއްސެއް ރަނގަޅުވުމުން ލަފަކަށް ބަދަލުވެފައި ހުރެދާނެ އެވެ. ލަތްތައް މިހެން މޫނުމަތީގައ ހުރުމުން އެފިލުވާނެ ގޮތެއް ނޭނގިގެން ބާޒާރުން ލިބެން ހުންނަ ހުރިހާ ވައްތަރެއްގެ ކްރީމްތައް އުނގުޅި ނަމަވެސް މިކަމުން އެދެވޭ ނަތީޖާއެއް ގިނަފަހަރު ނުނިކުމެ އެވެ. ނަމަވެސް ގްރީންޓީ ސައިފަތުން މިކަން ހައްލުކުރެވިދާނެ އެވެ. ދެތިން ޕެކެޓް ގްރީންޓީ ސައިފަތް ޖޯޑެއްގެ ހޫނު ފެން ތެރެއަށް އަޅާފައި ހިހޫ ވަންދެން ބަހައްޓާށެވެ. އެއަށްފަހު، މޫނުދޮންނަން އާދައިގެ ފެން ބޭނުންކުރުމުގެ ބަދަލުގައި، ކުރިން ތައްޔާރުކުރި ގްރީންޓީ ސައިފަތް ފެނުން މޫނު ދޮވެލާށެވެ. އަދި މޫނު ދޮވުމަށްފަހު، ފެން ފުހުމުގެ ބަދަލުގައި މޫނުގައި އަމިއްލައަށް ހިކެންދެން ބަހައްޓާށެވެ. އެންމެފަހަރަކު މިފެނުން މޫނު ދޮވުނަސް ލައްތަކަށް މާބޮޑު ބަދަލެއް އަންނަތަނެއް ނުފެންނާނެ އެވެ. ނަމަވެސް ގަވާއިދުން ދެތިން ހަފްތާ ވަންދެން ކޮންމެ ދުވަހަކު ބޭނުންކުރުމުން ލައްތަކުގެ ކުލަ އަލިވާކަން ފާހަގަވާނެ އެވެ.
މީގެއިތުރުންވެސް ގްރީންޓީ ސައިފަތް ބޭނުންކޮށްގެން މޫނުގައ އުނގުޅާނެ މޮއިސްޓަރއިޒާއެއް ވެސް ތައްޔާރުކުރެވިދާނެ އެވެ.
ލޮލުގެ މައްސަލަތަކަށް ހައްލެއް
ދުވާލުގެ ގިނަ ވަގުތު ހޭދަވެގެން ދަނީ އޮފީހުގައި ކޮމްޕިއުޓަރު ކައިރީ މަސައްކަތުގައި ހުރެ އެވެ. ގިނަވަގުތު މިގޮތަށް ކޮމްޕިއުޓަރު ކައިރީގއި ހޭދަކުރެވުމުގެ ސަބަބުން، ލޮލުގައި ރިއްސައި، ހިރުވައި ގޮތްގޮތްވެ އެވެ. ބައެއް ފަހަރު ލޯރަތް ވުމުގެ އިތުރުން ލޮލުން ފެން އަންނަ ފަހަރުވެސް އާދެ އެވެ. މީގެއިތުރުންވެސް ބައެއް ފަހަރު، ބޭނުންކުރެވޭ މޭކަޕްތަކުގެ ސަބަބުން ވެސް ލޯކައިރި ދުޅަވުމާއި ރަނގަޅަށް ނިދި ނުލިބުމުގެ ސަބަބުން ލޯކައިރި ކަޅުވުމުން ވެސް ބޭނުންކުރަނީ ބަޒާރުން ލިބެން ހުންނަ ފައުންޑޭޝަންތަކާއި ލޮލަށް އަޅާ ބޭހެވެ. ނަމަވެސް މިކަމަށް ހައްލެއް ގްރީންޓީ ސައިފަތުން ވެސް ލިބިދާނެ އެވެ.
ބޭނުންކޮށްފައި ހުންނަ ގްރީން ޓީ ސައިފަތް ޕެކެޓް އެއްލާލުމުގެ ބަދަލުގައި، ސައިފަތް ޕެކެޓް އައިސްއަލަމާރީގ ގަނޑުކުރާ ބަޔަށް ލައި، ފިނިކޮށްގެން 20 މިނިޓް ވަންދެން ލޯމަތީގައ އަޅާފައި ބަހައްޓާށެވެ. މިގޮތަށް ހެދުމުން ގްރީން ޓީ ގައި ހުންނަ އެންޓި އޮކްސިޑެންޓްގެ ސަބަބުން ލޯ ސާފުކޮށްދިނުމުގެ އިތުރުން، ލޯކައިރި ވަށާ ހުންނަ ނާރުތައް ރިލެކްސް ވެސް ކޮށްދޭނެ އެވެ. އަދި ބުރަ ދުވަހަކަށް ފަހު ލޯމަތީގއި ގްރީންޓީ ބޭގެއް އަޅާލުމުން ވަރުބަލިކަން ފިލައި، ވރަށް ބޮޑަށް ރިލެކްސް ވެސް ވާނެ އެވެ.
ރީތި ނަލަ އިސްތަށިގަނޑެއް ލިބޭނެ
ކޮންމެ އަންހެން ކުއްޖަކީ ވެސް ރީތި އިސްތަށިގަނޑެއްގެ ވެރިޔަކަށް ވާން ބޭނުންވާނެ އެވެ. އެގޮތުން ބާޒާރުން ލިބެން ހުންނަ އެކި ބްރޭންޑްތަކުގެ ޝޭމްޕޫ އާއ ކޮންޑިޝަނާ އުނގުޅައިގެން ވެސް ބޮލުން އިސްތަށި ފައިބާވަރު މަދުނުކުރެވޭއިރު، ގިނަ އަދަދަކަށް ކެމިކަލް އެކުލެވޭ މިފަދަ ތަކެތި ބޭނުންކުރުމުން ވެސް އިސްތަށިގަނޑު އިތުރަށް ހަލާކުވެ އެވެ. އެގޮތުން އިސްތަށިގަނޑު ކުރަކިވެ، މާގިނައިން އިސްތަށި ފޭބުން ހިމެނެ އެވެ. މިގޮތަށް އިސްތަށިގަނޑަށް ވުމުން، ގިނަމީހުން ސެލޫންތަކަށް ގޮސް ޓްރީމަންތްތައް ނަގާއިރު، މިފަދަ ޓްރީޓްމަންޓްތައް ހަދަނީ ގްރީން ޓީ ސައިފަތް އަޅައިގެން ހަދާފައި ހުންނަ އެއްޗިހިންނެވެ. އެހެންކަމުން ގޭގައި ސައިފަތް ބޭނުންކޮށްގެން މާރނގަޅު ޓްރީޓްމަންޓެއް ނެގިދާނެ އެވެ.
ރީތިކޮށް ޝޭމްޕޫ ލައިގެން ބޯ ދޮވުމަށްފަހު ކޮންޑިޝަނާ ލުމުގެ ބަދަލުގައި ގްރީންޓީ ސައިފަތް ފެނަށް އަލައިގެން ހަދާފައިހުރި ސައިފަތް ފެން ބޮލަށް އަޅާށެވެ. މިއީ އިސްތަށި ފޭބުން މަދުކޮށް އިސްތަށިގަނޑު ވަރުގަދަ ވެސް ކޮށްދޭ އެއްޗެކެވެ. މީގެއިތުރުން ވެސް ގްރީންޓީ ސައިފަތް ބޭނުންކޮސްގެން ބޮލުގައި އުނގުޅާނެ ޕެކެއް ވެސް ތައްޔާރުކުރެވިދާނެ އެވެ. އެގޮތުން އެއް ފެކެޓް ގްރީން ޓީ ސައިފަތުގެ ތެރެއަށް އެއް ކުކުޅު ބިސް އަދި އެއް ތަށި އާދައިގެ ޔޯގަޓް އަޅައި އެއްކުރާށެވެ. ޕޭސްޓް ތައްޔާރުކުރެވުމުން އިސްތަށިގަނޑުގެ ބުޑުގަޔާއި އަދި ބޮލުގެ ހަންގަނޑުގައި އުނގުޅާފައި ބައިގަޑިއިރު، ބެހެއްޓުމަށްފަހު ތާފަނާ ފެނުން ދޮވެލާށެވެ.
އެހެންކަމުން ގްރީން ޓީ އަކީ ހަމައެކަނި ބަނޑުގައ ޖަހާފައި ހުންނަ ސަރުބީ ވިރުވާލަދޭ އެއްޗެއް ނޫނެވެ. އޮމާން ރީތި ހަންގަނޑަކާއި ރީތި ވަރުގަދަ އިސްތަށިގަނޑެއް ވެސް ގްރީން ޓީ ސައިފަތުން ލިބިދާނެ އެވެ.