ނެޝަނަލް ސެންޓާ ފޮ ދި އާޓްސް އާއި މޯލްޑިވިއަން އާޓިސްޓް ކޮމިއުނިޓީ ގުޅިގެން ބާއްވާ "އަންވެއިލިން ވިޝަންސް 2021" ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް މިއަދު ހުޅުއްވައިދެއްވައިފި އެވެ.
މި މައުރަޒު ކުރިއަށް ދާނީ މިއަދުން ފެށިގެން މި މަހުގެ 14 ވަނަ ދުވަހުގެ ނިޔަލަށެވެ.
ނެޝަނަލް އާޓް ގެލެރީގައި މިއަދު ހަވީރުން ފެށިގެން ކުރިއަށްދާ މައުރަޒަށް ރައީސް ސޯލިހް ކުރެއްވި ޒިޔާރަތުގައި މައުރަޒުގައި ދައްކާލުމަށް ބަހައްޓާފައިވާ ކުރެހުންތައް ބައްލަވާލެއްވި އެވެ. އަދި އެމަނިކުފާނު ވަނީ "މޯސްޓް ވައިބްރަންޓް އާޓިސްޓްސް" އަށް ހޮވުނު ފަސް ކުރެހުންތެރިންނަށް އިނާމު ހަވާލުކޮށްދެއްވާފަ އެވެ.
މި ރަސްމިއްޔާތުގައި ހެރިޓޭޖް މިނިސްޓަރު ޔުމްނާ މައުމޫނު ވަނީ ނެޝަނަލް އާޓް ގެލެރީގެ ވާޗުއަލް ގެލެރީ އިފްތިތާހްކޮށްދެއްވާފަ އެވެ.
މޯލްޑިވްސް ކޮންޓެމްޕޮރަރީ އާޓް އެގްޒިބިޝަން -- އަންވެއިލިންގ ވިޝަންސް އަކީ މި އަހަރު ރާއްޖޭގައި ބާއްވާ އެންމެ ބޮޑު މައުރަޒެވެ. މި މައުރަޒުގައި މިފަހަރު 67 ކުރެހުންތެރިންގެ ކުރެހުންތައް ދައްކުވައިދެ އެވެ.
މި ފަހަރުގެ މައުރަޒުގެ އަމާޒަކީ ރާއްޖޭގެ އެކި ސަރަހައްދުތަކުން ހުނަރުވެރި ފަންނާނުން އެއްތަނަކުން ބައްދަލުވެ، އެމީހުންގެ ހުނަރު ދައްކާލައި، އެމީހުންގެ ތަސައްވުރުގެ ތަންކޮޅެއް ހާމަކުރުން ކަމަށް ހެރިޓޭޖު މިނިސްޓްރީން ބުނެ އެވެ.
މި ރަސްމިއްޔާތުގައި މޯލްޑިވިއަން އާޓިސްޓް ކޮމިއުނިޓީގެ ފަރާތުން ވަނީ ރައީސް ސޯލިހަށް ކުރެހުމެއް ވެދުމަށް އަރުވާފަ އެވެ.