ހުޅުމާލޭގައި ޖަލްސާއެއް ބޭއްވުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހޯދަންޖެހޭ ހުއްދައެއް ނޯންނާނެ ކަމަށް އިދިކޮޅު ޕްރޮގްރެސިވް ކޮންގްރެސް ކޯލިޝަން ބުނެފި އެވެ.
އަވަސް އަށް މައުލޫމާތު ދެއްވަމުން އިދިކޮޅު ކޯލިޝަންގައި ހިމެނޭ ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ ލާމަރުކަޒީ ގާނޫނުގެ ދަށުން ހުޅުމާލެ އަކީ މާލެ ސިޓީ ކައުންސިލްގެ އިހްތިސާސްގައި އޮތް ތަނެއް ކަމަށާއި އެހެންކަމުން އެތަނުގައި ޖަލްސާއެއް ބާއްވާނަމަ އެޗްޑީސީން ހުއްދަ ހޯދަންޖެހޭ އެއްވެސް ސަބަބެއް ނޯންނާނެ ކަމަށެވެ.
"އަޅުގަނޑު މިދަންނަވަނީ ލާމަރުކަޒީ ގާނޫނުގެ ދަށުންނޭ އެ އޮތީ ހުޅުމާލެ، ސިޓީ ކައުންސިލްގެ އިހްތިސާސްގެ ދަށަށް ގެނެސްފައި. ރައީސުލްޖުމްހޫރިއްޔާގެ ސިޓީ އަކަށް ވުރެ ނުވަތަ މީހަކު ބުނާ ބުނުމަކަށް ވުރެ ގާނޫނަކުން ނިންމާފައި އޮންނަ ގޮތް އެއީ މާވަރުގަދަ ނިންމުމެއް. މިހެން އޮތް ކަމެއްގައި ހުޅުމާލޭގައި ޖަލްސާ ނުބޭއްވޭނެ ކަމަށް އެޗްޑީސީން ބުނުމަކީ ފިޝަރީޒް މިނިސްޓްރީން އައިސް ހުޅުމާލޭގައި ޖަލްސާ ނުބޭއްވޭނެ ހަމަ ބުނުން ކަހަލަ ކަމެއް،" އަބްދުއްރަހީމް ވިދާޅުވި އެވެ.
ފާއިތުވެ ދިޔަ ދެ އަހަރު އިދިކޮޅު ކޯލިޝަން ހިންގުމާ ހަވާލުވެވަޑައިގެން ހުންނެވި އަބްދުއްރަހީމް ވިދާޅުވީ އިދިކޮޅު ޖަލްސާ ހުޅުމާލޭގައި ބާއްވަން ނިންމާ އެކަން އިއުލާންކުރީ މާލެ ސިޓީ ކައުންސިލްގެ ހުއްދަ ހޯދުމަށްފަހު ކަމަށެވެ. ހުޅުމާލޭގައި ޖަލްސާ ބާއްވާނަމަ އެޗްޑީސީގެ ހުއްދަ ހޯދަންޖެހޭނެ ކަމަށް އެ ކުންފުނިން ބުނި ނަމަވެސް އެޗްޑީސީގެ ހުއްދަ އަށް ނޭދޭނެ ކަމަށްވެސް ވިދާޅުވި އެވެ.
އަބްދުއްރަހީމް ވިދާޅުވި އިދިކޮޅު ކޯލިޝަނުން ރާވާފައިވާ ގޮތަށް ހުޅުމާލޭގައި ޖަލްސާ ބާއްވާނެ ކަމަށާއި ޖަލްސާ ކެންސަލް ނުކުރާނެ ކަމަށެވެ. އެހެންކަމުން ހުޅުމާލޭގެ ދެވަނަ ފިޔަވަހީގައި ހިޔާ ފްލެޓްތައް ހުރި ސަރަހައްދުގައި ހުކުރު ދުވަހުގެ ރޭ ބާއްވާ ޖަލްސާ އަށް ވީހާވެސް ގިނަ ބަޔަކު ހާޒިރުވުމަށްވެސް އަބްދުއްރަހީމް އެދިވަޑައގެންފައިވެ އެވެ.
ކުރީގެ ރައީސް އަބްދުﷲ ޔާމީނާ އެކު އިދިކޮޅު ކޯލިޝަނުން މިދިޔަ ހުކުރު ދުވަހުގެ ރޭ ކާނިވާ ސަރަހައްދުގައި ބޭއްވި ބޮޑު ޖަލްސާއަށް ފަހު ސަރުކާރުގެ އިސްވެރިންނަށް ކަންކަން ހަޖަމު ނުވާ ކަމަށްވެސް އަބްދުއްރަހީމް ވިދާޅުވި އެވެ. އިދިކޮޅު ޖަލްސާ ހުއްޓުވަން މަސައްކަތް ކުރަނީ ރައީސް ޔާމީނަށް އޮތް ތާއީދު ފެނި ބިރުން ކަމަށްވެސް ވިދާޅުވި އެވެ.
"ހުޅުމާލޭގައި ބާއްވަން މިއުޅޭ ޖަލްސާ ހުއްޓުވަން މިއުޅެނީ ހަގީގަތުގައި އެޗްޑީސީގެ އެމްޑީއެއް ނޫން. އެއީ ސީދާ ރައީސް އިބްރާހީމް މުހައްމަދު ސޯލިހާއި ސަރުކާރުގެ އިސްވެރިން އަޑީގައި ތިބެގެން އެޗްޑީސީ އަށް ފިއްތުންތައް ފިއްތައިގެން ކުރާ ކަމެއް. އެކަމަކު މިޖަލްސާ ކުރިއަށްދާނެ،" އަބްދުއްރަހީމް ވިދާޅުވި އެވެ.
އިދިކޮޅު ކޯލިޝަނުން ހުޅުމާލޭގައި ބާއްވަން ތައްޔާރުވަމުންދާ ޖަލްސާ އަކީ މިދިޔަ ނޮވެމްބަރު 30 ވަނަ ދުވަހު ރައީސް ޔާމީން ޖަލުން މިނިވަންވުމަށްފަހު ހުޅުމާލޭގައި ބާއްވާ ފުރަތަމަ ޖަލްސާ އެވެ. ހުޅުމާލޭގެ ދެވަނަ ފިޔަވަހީގެ ބިން ހިއްކާ އެތަނުގައި މިހާރު އަޅާފައިވާ ހުރިހާ ފްލެޓަކީ ވެސް ރައީސް ޔާމީންގެ ވެރިކަމުގައި އަޅާފައިވާ ފްލެޓްތަކެކެވެ.