އިންޑިއާގެ ޓެމިލް ނާޑޫގެ މަދުރާއީގެ ބަސް ޑްރައިވަރަކު ހާޓް އެޓޭކެއް ޖެހި މަރުވުމުގެ ކުރިން އޭނާ ދުއްވި ބަހުގައި ތިބި 30 މީހުންގެ ފުރާނަ ސަލާމަތް ކޮށްދީފި އެވެ.
ބަސް ދުއްވަމުން ދަނިކޮށް ކުއްލިއަކަށް ހާޓް އެޓޭކެއް ޖެހި ނޭވާ ނުލެވިގެން އުޅުނުއިރުވެސް އޭނާ ވަނީ ބަސް މަގެއްގެ އެއް ފަރާތަށް މަޑުކޮށް އެންމެންގެ ރައްކާތެރިކަން ކަށަވަރުކޮށްފަ އެވެ. އަދި ބަސް މަޑުކުރިތާ އިރުކޮޅެއް ވެސް ނުވަނީސް ޑްރައިވަރު ވަނީ މަރުވެގެން ވެއްޓިފަ އެވެ.
އަރުމުގަމް ކިޔާ 44 އަހަރުގެ މި ޑްރައިވަރު މިދިޔަ ބުރާސްފަތި ދުވަހު ބަހުގައި 30 ފަސިންޖަރުން ގޮވައިގެން ދަތުރުކުރަމުން ދިޔައީ އަރައްޕަލަމް ކިޔާ ރަށަކުން ކޮޑައިކެނަލް އަށެވެ. ބަސް ދުއްވަމުން ދަނިކޮށް އޭނާގެ މެޔަށް ތަދެއް އެރީ ހަމަ ކުއްލި އަކަށެވެ.
އޭނާގެ މެޔަށް ތަދެއް އަރައިފި ކަމަށް ބަސް ކޮންޑަކްޓަރު ކައިރީގައި ޑްރައިވަރު ބުންޏެވެ. އަދި ބަސް މަޑުކުރަމުން ގޮސް މަގުގެ އެއް ފަރާތަކަށް މަޑުކުރި ތަނާ ޑްރައިވަރު މަރުވެގެން ވެއްޓުނީ އެވެ.
ބަސް ކޮންޑަކްޓަރު ބުނި ގޮތުގައި އޭނާ ވަގުތުން އެމްބިއުލެންސަށް ގުޅައިގެން އެމްބިއުލެންސް ގެނައި އިރުވެސް ޑްރައިވަރުގެ ފުރާނަ ނެތެވެ.
ކޮޑައިކެނަލް އަކީ އުސް ފަރުބަދައެއްގެ މަތީގައިވާ ރަށަކަށް ވާތީ އެ ރަށަށް އަރަން ދާއިރު ކުޑަނަމަވެސް އެކްސިޑެންޓެއް ހިނގައިފިނަމަ ބަސް ފުރޮޅާލައިގެން ފަރުބަދަމަތިން ވެއްޓުމުގެ ފުރުސަތު އޮވެ އެވެ.
މި ޑްރައިވަރަކީ ބަސް ދުއްވުމުގެ 12 އަހަރުގެ ތަޖުރިބާ ހުރި މީހަކަށް ވާތީ އޭނާއަށް އޭގެ ނުރައްކާ ވަޒަން ކުރެވޭތީ އަވަހަށް މަސް މަޑުކުރީ ކަމަށް ބެލެވެ އެވެ.