މާލެ ސިޓީ ކައުންސިލުން ހުޅުމާލޭގެ ރަޖިސްޓްރީ ބާތިލުކުރުމާ ގުޅިގެން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ސިވިލް ކޯޓަށް ހުށަހަޅާފައިވާ މައްސަލަ ޝަރީއަތަށް ފޮނުވައިފި އެވެ.
ސިވިލް ކޯޓަށް މައްސަލަ ހުށަހެޅުމުން އެ ކޯޓުން މިހާރު އަމަލުކުރާ އާންމު އުސޫލަކީ ޑިސްޕިއުޓް ރިޒޮލިއުޝަން މަރުހަލާގައި މައްސަލަ ހައްލުކުރުމުގެ މަސައްކަތް ކުރުމެވެ. އެއީ މައްސަލަ ޝަރީއަތަށް ނުގެންގޮސް ދައުވާ ކުރާ ފަރާތާއި ދައުވާ ލިބޭ ފަރާތުން ކޯޓުގެ ގާޒީއެއްގައި ހާޒިރުގައި މަޝްވަރާކޮށްގެން ހައްލެއް ލިބޭތޯ މަސައްކަތް ކުރާ މަރުހަލާ އެކެވެ.
ޑިސްޕިއުޓް މަރުހަލާގައި އެއްބަސްވުމަކަށް އާދެވިފައި ނުވާތީ ޝަރީއަތުން މައްސަލައިގައި ގޮތެއް ނިންމުމަށް އެ މައްސަލަ އިއްޔެ ވަނީ ޝަރީއަތަށް ފޮނުވާފަ އެެވެ. އެޗްޑީސީގެ އޮފިޝަލަކު ވަނީ އަވަސް އަށް އެކަން ޔަގީންކޮށްދެއްވާފަ އެވެ.
ހުޅުމާލޭގެ ދެވަނަ ފިޔަވަހީގައި ކުރީގެ ރައީސް އަބްދުﷲ ޔާމީންގެ ވެރިކަމުގައި އަޅާފައިވާ ހިޔާ ފްލެޓްތައް ހިމެނޭ ސަރަހައްދުގައި މިދިޔަ ހުކުރު ދުވަހުގެ ރޭ ޖަލްސާއެއް ބޭއްވުމަށް އިދިކޮޅު ކޯލިޝަނުން ހުއްދައަށް އެދުމުން މާލެ ސިޓީ ކައުންސިލުން ވަނީ ހުއްދަ ދީފަ އެވެ. ނަމަވެސް ހުޅުމާލޭގެ ބިމުގެ މިލްކުވެރި ފަރާތަކީ އެޗްޑީސީ ކަމަށް ބުނެ އެ ކުންފުނިން ވަނީ ފުލުހުން މެދުވެރިކޮށް ޖަލްސާ އަށް ހުރަސް އަޅާފަ އެވެ.
އެޗްޑީސީން އެގޮތަށް އަމަލުކުރުމާ ގުޅިގެން އިދިކޮޅު ކޯލިޝަންގެ މެޖޯރިޓީ އޮންނަ މާލެ ސިޓީ ކައުންސިލުން މިމަހުގެ އަށްވަނަ ދުވަހު ވަނީ އެޗްޑީސީއަށް ހަދައިދީފައިވާ ހުޅުމާލޭގެ ރަޖިސްޓްރީ ބާތިލްކުރުމަށް ނިންމާފަ އެވެ. ލާމަރުކަޒީ ގާނޫނުގެ ދަށުން މާލެ ސިޓީ ކައުންސިލްގެ އިހްތިސާސް ރައީސް އިބްރާހީމް މުހައްމަދު ސޯލިހް ކަނޑައެޅުއްވިއިރު ހުޅުމާލެ ވަނީ މާލެ ސިޓީ ކައުންސިލްގެ އިހްތިސާސްގައި ހިމަނާފަ އެވެ. އެހެންވެ ސިޓީ ކައުންސިލްގެ ނިންމުން އެ ކައުންސިލުން ވަނީ ލިޔުމަކުން ރަސްމީކޮށް އެޗްޑީސީ އަށް އަންގާފަ އެވެ.
ސިޓީ ކައުންސިލްގެ ނިންމުމާ ގުޅިގެން އެޗްޑީސީން މީގެކުރިން ނެރުނު ބަޔާނެއްގައި ބުނެފައިވަނީ ކައުންސިލްގެ ނިންމުމަކީ މުދާ ހޯދުމާއި މުދާ ލިބިގަތުމުގެ އަދި ބިމާ ބެހޭ ގާނޫނާއި ލާމަރުކަޒީ ގާނޫނާވެސް ހިލާފު ނިންމުމެއް ކަމަށެވެ. އަދި އެހެން ބައެއްގެ އަތުގައި އޮތް ބިމެއްގެ ބެލެނިވެރިކަން ދެވޭނީ ޝަރުއީ ކޯޓަކަށް ކަމަަށް ވަނީ ބުނެފަ އެވެ.
ސިޓީ ކައުންސިލްގެ ނިންމުމާ ގުޅިގެން އެޗްޑީސީ އަށް ލިބޭ ގެއްލުމުގެ ބަދަލު ހޯދަން ސިޓީ ކައުންސިލުގެ މައްޗަށް ދައުވާ ކުރާނެ ކަމަށް ބުނެ އެ މައްސަލަ ސިވިލް ކޯޓަށް ހުށަހެޅީ އެޗްޑީސީންނެވެ.