ރާއްޖޭގައި ކުނިން ހަކަތަ އުފެއްދޭ ގޮތަށް ހިންގާ ބޮޑު މަޝްރޫއަކަށް އަބޫދާބީ ފަންޑު ފޯ ޑިވެލޮޕްމެންޓް (އޭޑީއެފްޑީ) އިން 14 މިލިއަން ޑޮލަރުގެ ލޯނެއް ދިވެހި ސަރުކާރަށް ހަމަަޖައްސައިދީފި އެވެ.
މިކަމާ ގުޅޭ އެއްބަސްވުމުގައި ރާއްޖޭގެ ފަރާތުން ސޮއިކުރައްވާފައިވަނީ ފައިނޭންސް މިނިސްޓަރު އިބްރާހީމް އަމީރެވެ. އަދި އޭޑީއެފްޑީގެ ފަރާތުން ސޮއިކުރެއްވީ ފަންޑުގެ ޑިރެކްޓާ ޖެނެރަލް މުހައްމަދު ސައިފް އަލްސުވައިދީ އެވެ.
މިއީ މިއަހަރު ސްކޮޓްލޭންޑުގެ ގްލާސްގޯގައި ބޭއްވުނު ކޮޕް 21 ސަމިޓުގެ ބައެއްގެ ގޮތުގައި ކުރިއަށް ގެންދިޔަ މަޝްވަރާތަކެއްގެ ތެރެއިން ރާއްޖެ އަށް ހަމަޖައްސައިިދިން ލޯނެކެވެ. މިމަޝްރޫއުގެ މައިގަނޑު މަސައްކަތްތައް ކުރިއަށްދާނީ އައްޑޫ ސިޓީގަ އެވެ.
މަޝްރޫއުގެ ދަށުން ކުނި، ހަކަތައަށް ބަދަލުކޮށް 1.5 މެގަވޮޓް ކަރަންޓް އުފައްދާ، 6،000 ގޭބިސީއަކަށް ކަރަންޓުގެ ހިދުމަތް ދިނުމާއެކު ކުނި އުފައްދާ މިންވަރު 10 އިންސައްތަ މަދުކުރާނެ އެވެ.
ކުނިން ހަކަތަ އުފެއްދޭ ގޮތަށް ހިންގާ މި މަޝްރޫއަށް ޖުމްލަ 28 މިލިއަން ޑޮލަރު ހަރަދުކުރާނެ ކަމަށް އެނގިފައިވެ އެވެ.
ފިނޭންސް މިނިސްޓަރު އަމީރު ވިދާޅުވާ ގޮތުގައި ކުނިން ހަކަތަ އުފެއްދުމަކީ ޖައްވަށް ބޭރުކުރާ ވިހަ ގޭސް މަދުކުރުމަށް ސަރުކާރުން ގެންގުޅޭ ސިޔާސަތުގެ ތެރެއިން ކުރިއަށް ގެންދާ މަޝްރޫއެއް ކަމަށެވެ. މިމަޝްރޫއުގެ ތެރެއިން 100 އެއްހާ ވަޒީފާ އުފެއްދޭނެ ކަމަށްވެސް ސަރުކާރުން ބުނެ އެވެ.