އިންޑިއާގެ އެހީގައި އައްޑޫ ސިޓީގައި ހިންގާ އިކޯ ޓޫރިޒަމްގެ މަޝްރޫއުތަކަށް 11.4 މިލިއަން ރުފިޔާ ހަމަޖައްސައިދީފި އެވެ.
މިއީ އައްޑޫ ސިޓީ ގައި ހިންގާ "ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސް"ގެ ފަސް މަޝްރޫއަކަށް ބޭނުންވާ ފައިސާގެ ތެރެއިން ތިން ވަނަ އިންސްޓޯލްމަންޓްގެ ދަށުން ދޫކުރި ފައިސާ އެވެ.
އިންސްޓޯލްމަންޓްގެ ދަށުން މިދިޔަ އަހަރުގެ ޖުލައި އަދި މާޗު މަހުގައި ވެސް 11.5 މިލިއަން ރުފިޔާ ދޫކޮށްފައިވެ އެވެ.
އިކޯ ޓޫރިޒަމްގެ ފަސް މަޝްރޫއެއް އައްޑޫ ސިޓީގައި ހިންގަން އިންޑިއާ އާއި އެކު ރާއްޖެއިން ސޮއިކުރީ މިދިޔަ އަހަރުގެ ފެބްރުއަރީ މަހު އެވެ.
އައްޑޫގައި އިކޯ ޓޫރިޒަމްގެ މަޝްރޫއުތައް ހިންގަން ނިންމާފައިވަނީ ފޭދޫ، މީދޫ، ހިތަދޫ، ހުޅުދޫ އަދި މަރަދޫގަ އެވެ. އެގޮތުން ޖުމްލަ 2.49 މިލިއަން އެމެރިކާ ޑޮލަރު -- 38 މިލިއަން ރުފިޔާ ވަނީ ހިލޭ އެހީގެ ގޮތުގައި ހަމަޖައްސާދީފައިވެ އެވެ.
މި މަޝްރޫއުތަކުގެ ސަބަބުން އައްޑޫގައި ވަޒީފާގެ އިތުރު ފުރުސަތު ހުޅުވި، އިކޯ ޓޫރިޒަމްގެ ފުރުސަތު ފުޅާވެގެންދާނެ އެވެ.
ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސް ދަށުން މިހާރުވެސް ގިނަ މަޝްރޫއުތަކެއް ދަނީ ހިންގަމުންނެވެ. މީގެތެރޭގައި އައްޑޫ ސިޓީގެ މަރަދޫ، ހިތަދޫ، ހުޅުދޫ އަދި ނ. ކެނދިކުޅުދޫގައި ފިޝްޕްރޮސެސިން ޕްލާންޓް ހެދުމާއި، ހޯރަފުށީގައި ފެން ބަންދުކުރާ ޕްލާންޓް، އައްޑޫ ސިޓީ ހުޅުދޫގައި ޑްރަގް ޑިޓޮކްސް ސެންޓަރެއް ގާއިމްކުރުން ހިމެނެ އެވެ. އަދި ހަނިމާދޫގައި ގާއިމްކުރެވިފައިވާ އެގްރިކަލްޗަރަލް ރިސާޗް ސެންޓަރުގައި ސޮއިލް ޓެސްޓިން ލެބެއް ގާއިމުކުރުން ވެސް ހިމެނެ އެެވެ.