އިންޑިއާގެ މަޝްހޫރު ޓްރެވަލް އެޖެންސީއެއް ކަމަށްވާ "އީޒް މައި ޓްރިޕް" އިން އަނެއްކާވެސް ރާއްޖެއަށް ބުކިންތައް ހަދައިދޭން ފަށައިފި އެވެ.
އީޒް މައި ޓްރިޕް އިން ރާއްޖެއަށް ބުކިން ހެދުން މެދުކަނޑާލީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވިތާ ކުރީކޮޅު އިންޑިއާ އާއި ރާއްޖޭގެ ގުޅުން ގޯސްވުމާ ގުޅިގެން މިއަހަރުގެ ޖެނުއަރީ މަހުގެ ތެރޭގައެވެ.
ދެ ގައުމުގެ ގުޅުން އޭރު އެންމެ ބޮޑަށް ގޯސްވީ ރާއްޖޭގައި ތިބި އިންޑިއާ ސިފައިން ބޭލުމުގެ މައްސަލައިގައި ދެ ގައުމުގެ ދެމެދުގައި މަޝްވަރާތަކެއް ކުރިއަށް ދަނިކޮށް ސަރުކާރުގެ ޑެޕިއުޓީ މިނިސްޓަރުންތަކެއް އިންޑިއާގެ ބޮޑުވަޒީރު ނަރެންދުރަ މޯދީއަށް އަމާޒުކޮށް ބޭއަދަބީ ބަސްތަކަކުން ފާޑުވިދާޅުވުމާ ގުޅިގެންނެވެ.
އީޒް މައި ޓްރިޕްގެ ސީއީއޯ ނިޝާންތު ޕިއްޓީ އޭރު ވިދާޅުވި ގޮތުގައި އޭރު ރާއްޖެއަށް ބުކިން ހެދުން މެދުކަނޑާލީ ދެ ގައުމުގެ ގުޅުން ގޯސްވުމުން ގައުމީ ރޫހެއްގައި ކަމަށެވެ.
އެކަމަކު ނިޝާންތު މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ އެ އެޖެންސީ އިން އަލުން ރާއްޖެއަަށް ބުކިން ހަދައިދޭން ފެށީ ދެ ގައުމުގެ ގުޅުން އަލުން ރަނގަޅުވަމުން އަންނާތީއާއި ރާއްޖޭގެ ޓޫރިޒަމް މިނިސްޓްރީގެ ޓީމަކުން އޭނާއާ ބައްދަލުކޮށް ކުރެއްވި މަޝްވަރާތަކަކަށްފަހު ކަމަށެވެ.
އިންޑިއާ އާއި ރާއްޖޭގެ ގުޅުން ގޯސްވުމާ ގުޅިގެން އޭރު އިންޑިއާގައި ރާއްޖޭގެ ޓޫރިޒަމް ބޮއިކޮޓް ކުރުމަށް ވަރުގަދަ ކެމްޕޭނެއްވެސް ކުރިއަށް ގެންދިޔަ އެވެ. މި ކެމްޕޭންގައި އިންޑިއާގެ ނުފޫޒު ގަދަ ސިޔާސީ ބައެއް ބޭފުޅުންނައި ބޮލީވުޑްގެ ބައެއް މަޝްހޫރު ތަރިންވެސް ބައިވެރިވި އެވެ.
މިކެމްޕޭންގެ އަސަރު ރާއްޖޭގެ ފަތުރުވެރިކަމަށް ކޮށްފައިވާކަން ތަފާސްހިސާބުތަކުން އެނގެ އެވެ. ޓޫރިޒަމް މިނިސްޓްރީގެ ތަފާސްހިސާބުތަކުން އެނގޭ ގޮތުގައި މިދިޔަ އަހަރުގެ ސެޕްޓެމްބަރު 24ގެ ނިޔަލަށް އިންޑިއާއިން ރާއްޖެއަށް 146،057 ޓޫރިސްޓުން ޒިޔާރަތްކުރި އެވެ. ނަމަވެސް މިއަހަރުގެ ސެޕްޓެމްބަރު މަހުގެ 24 ވަނަ ދުވަހުގެ ނިޔަލަށް އިންޑިއާ އިން ރާއްޖެއަށް އައީ 88،202 ޓޫރިސްޓުންނެވެ. މިއީ 57،855 ޓޫރިސްޓުންގެ ދަށްވުމެކެވެ.