ކޮމަންޑޫ ދާއިރާ މަޖިލީސް އިންތިހާބުގެ ބައި އިލެކްޝަންގައި އެމްޑީޕީން ވާދަކުރާ ކެންޑިޑޭޓް ކަނޑައަޅައިިފި އެވެ.
އެމްޑީޕީން ބުނީ ކޮމަންޑޫ ދާއިރާ މަޖިލީސް އިންތިހާބުގެ ބައި އިލެކްޝަންގައި އެމްޑީޕީން ވާދަކުރާ ކެންޑިޑޭޓް ކަނޑައެޅުމަށް ޕްރައިމަރީއަށް ހުޅުވާލުމުން ކުރިމަތިލީ އެންމެ ކެންޑިޑޭޓެއް ކަމަށެވެ. ޕްރައިމަރީއަަށް ކުރިމަތިލީ މުހައްމަދު ރާޝިދު އެވެ. އޭނާއަކީ ށ.ފޯކައިދޫއަށް ނިސްބަތްވާ މީހެކެވެ.
ޕްރައިމަރީއަށް އިތުރު މީހަކު ކުރިމަތި ނުލާތީ އެމްޑީޕީގެ ޕްރައިމަރީ ނޯންނާނެ އެވެ.
އިންތިހާބާ ގުޅޭގޮތުން އިލެކްޝަންސް ކޮމިޝަނުން ގެޒެޓްކުރި އިއުލާނުގައި ބުނެފައިވަނީ ފެބުރުވަރީ ފަސްވަނަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަން އަށް ވޯޓު ދިނުމުގެ ހައްގު ލިބިފައިވާ މީހުންގެ ލިސްޓުއާންމުކޮށްފައިވާ ކަމަށާ މި ރަޖިސްޓަރީ ދިވެހި ސަރުކާރުގެ ގެޒެޓާއި އިލެކްޝަންސް ކޮމިޝަނުގެ ވެބްސައިޓްގެ އިތުރުން ކޮމަންޑޫ ދާއިރާގެ ރަށްތަކަށް ކަމަށްވާ ށ.ކޮމަންޑޫ އާއި ފޯކައިދޫ އާއި މަރޮށިގެ ކައުންސިލުގެ އިދާރާއިން އާންމުކޮށް ފެންނަން ހުންނާނެ ކަމަށެވެ.
މި ރަޖިސްޓަރީއަށް ޝަކުވާ ހުށަހަޅާނީ ޑިސެންބަރު 22 ވަނަ ދުވަހުން ފެށިގެން ޖަނަވަރީ ދެވަނަ ދުވަހުގެ ނިޔަލަށެވެ.
ޝަކުވާ ބަލައިގަތުމަށް ހަމަޖެހިފައިވަނީ އިލެކްޝަންސް ކޮމިޝަންގެ އީމެއިލް މެދުވެރިކޮށެވެ. އަދި ޝަކުވާ ފޯމު ކޮމިޝަންގެ ވެބްސައިޓުންނާއި ކައުންސިލުގެ އިދާރާތަކުން ލިބޭނެ ކަމަށްވެސް ބުންޏެވެ.
ކޮމަންޑޫ ދާއިރާގެ ބައި އިލެކްޝަންގައި ވޯޓް ނެގުން އޮންނާނީ ފެބްރުއަރީ ފަސްވަނަ ދުވަހުގެ ހެނދުނު 8 އިން ހަވީރު ހަތަރަކަށެވެ. އަދި ވޯޓު ގުނަން ފަށާނީ ހަމަ އެ ދުވަހު ވޯޓު ނަގާ ނިމޭތާ 30 މިނެޓުގެ ތެރޭގައެވެ. މި އިންތިހާބުގެ ރަސްމީ ނަތީޖާ އިއުލާން ކުރުމަށް ހަމަޖެހިފައިވަނީ ފެބުރުވަރީ 10 ވާ ބުރާސްފަތި ދުވަހުގައެވެ.
އެ ދާއިރާގެ ބައި އިލެކްޝަން ބާއްވަން ޖެހެނީ މެންބަރު ހުސައިން ވަހީދު އަވަހާރަވުމާއި ގުޅިގެންނެވެ.