ކުރިއަށް އޮތް ރިޔާސީ އިންތިހާބުގައި ވާދަކުރެއްވުމާ މެދު އަދި ގޮތެއް ނުނިންމަވާ ކަމުގައި ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީން އަބްދުލްގައްޔޫމު ވިދާޅުވެއްޖެ އެވެ.
ދިޔަރެސް ނޫހަށް ދެއްވި އިންޓަވިއުއެއްގައި ރައީސް ޔާމީން މިރޭ ވިދާޅުވީ ރިޔާސީ އިންތިހާބުގެ ވޯޓަށް ދިއުމަށް ދޮޅު އަހަރު ދުވަހަށް ވެފައިވީ ނަމަވެސް އެމަނިކުފާނު އަދި އެކަމުގައި ވަކި ގޮތެއް ނުނިންމަވާ ކަމަށެވެ. ގޮތެއް ނުނިންމަވާ ވަކި ސަބަބެއް ހިއްސާކުރައްވާފައެއް ނުވެ އެވެ.
ކުރިއަށް އޮތް ރިޔާސީ އިންތިހާބުގައި ވާދަކުރެއްވުމަށްޓަކައި ރައީސް ޔާމީނަށް ޓިކެޓް ދިނުމަށް ޕީޕީއެމްއާއި ޕީއެންސީން ވަނީ ނިންމާފަ އެވެ. އަދި އެމަނިކުފާނަށް އިންތިހާބުގައި ވާދަނުކުރެއްވޭ ހާލަތެއް އަތުވެއްޖެނަމަ އިންތިހާބު ބޮއިކޮޓް ކުރުމަށްވެސް އެ ދެ ޕާޓީން ކުރިން ނިންމާފައިވެ އެވެ.
ނަމަވެސް ރައީސް ޔާމީން މިރޭ ވިދާޅުވީ އެމަނިކުފާނު އިންތިހާބުގައި ވާދަނުކުރާ ހާލަތެއް އަތުވެއްޖެނަމަ ޕީޕީއެމުން ނެރޭ ކެންޑިޑޭޓަކު އިންތިހާބު ކާމިޔާބު ކުރުމަށްޓަކައި ފުރިހަމައަށް އެއްބާރުލުން ދެއްވާނެ ކަމަށެވެ. ޕީޕީއެމްގެ މެނިފެސްޓޯ އެކުލަވާލުމުގައިވެސް އެމަނިކުފާނު އެހީތެރިވެވަޑައިގަންނަވާނެ ކަމުގެ ޔަގީންކަން ދެއްވެވި އެވެ.
ރައީސް ޔާމީން ވިދާޅުވީ ޕީޕީއެމުން މެނިފެސްޓޯ ތައްޔާރުކުރާއިރު އެންމެ ބޮޑު އިސްކަމެއް ދޭނީ ބޯހިޔާވަހިކަމުގެ މައްސަލަ ހައްލުކުރުމަށް ކަމަށެވެ. އަދި އެމަނިކުފާނު 2018 ވަނަ އަހަރު ތައްޔާރުކުރި މެނިފެސްޓޯގައި ވެސް އަދިވެސް ކުރަންހުރި ކަންކަން ހުރުމުން އެބައިތަކާ އެކު އާ ކަންތައްތަކެއް ވެސް ދެން އެކުލަވާލާ މެނިފެސްޓޯގައި ހިމަނާނެ ކަމަށެވެ.
ރައީސް ޔާމީން ވިދާޅުވީ ރައީސުލްޖުމްހޫރިއްޔާ ކަމުގެ މަގާމުގައި އެމަނިކުފާނު ކުރެއްވި ހިދުމަތާ ހަމައަށް ވާދަވެރިން އައުމަށް ހިދުމަތުގެ ބޮޑު ޖާގައެއް އެބައޮތް ކަމަށެވެ. އެހެންވެ އެމަނިކުފާނު އިންތިހާބުގައި ވާދަކުރާނަމަ ވާދަވެރިންނަށް އުދަގޫވާނެ ކަަމަށާއި ނިމިގެންދިޔަ ރިޔާސީ އިންތިހާބު އެމަނިކުފާނަށް ގެއްލުވާލީ ވެސް ޖަރީމާތަކެއްގެ ތެރެއިން ކަމުގައި ވިދާޅުވި އެވެ.
"މިހާރު މި ނިކުންނަ މައްސަލަ އަކީ އަނެއްކާ ވެސް ރައީސް ޔާމީން ވޯޓަކާ ހަމައަކަށް ގޮސްފިކަމަށްވަންޏާ ތިމަންނަމެންގެ ފުރުސަތު މި ގެއްލެނީއޭ. އެ އުދަގޫ ނޫންތޯ މި މީހުންނަށް އައިސްގެން މިއުޅެނީ. އެހެން ނޫންތޯ؟ އެމީހުންނަށް އުދަނގޫ ކޮށްލަން ނަމަވެސް ނިކުންނަންޖެހޭ ކަންނޭނގޭ. އެކަމަކު ވެސް އަދިވެސް އަޅުގަނޑަކަށް ގޮތެއް ނުނިންމޭ،" ވާދަވެރިން އެމަނިކުފާނާ މެދު ޖެހިލުންވާކަން ހާމަކުރައްވަމުން ވިދާޅުވި އެވެ.
ވެރިކަމާ ދެން ހަވާލުވާ ބަޔަކަށް ޖެހޭނީ މިސަރުކާރުން ހާވާފައިވާ ހަޑިތައް ފިލުވަން ވެރިކަމުގެ ފުރަތަމަ ތިން އަހަރު އެކަމުގައި ހޭދަކުރަން ކަމުގައިވެސް ރައީސް ޔާމީން ވިދާޅުވި އެވެ. އެމަނިކުފާނު 2018 ގައި ވެރިކަމާ ހަވާލުވެވަޑައިގަތުމަށްފަހު ވެސް އުޅުއްވަންޖެހުނީ އެމްޑީޕީގެ ކުރީގެ ވެރިކަމުގައި ހިންގާފައިވާ ހަޑިތައް ފިލުވުމުގައި ކަމަށް ވިދާޅުވި އެވެ.
މިސަރުކާރަށް ވަރަށް ބޮޑަށް ފާޑު ވިދާޅުވަމުން ރައީސް ޔާމީން ވިދާޅުވީ ގައުމު އޮތީ "ކޮލެޕްސް" ވެފައި ކަމަށެވެ. އަދި މިގައުމު މިއަދު އޮތީ ބޮޑު ކާރިސާއެއްގެ ތެރޭގައި ކަމަށާއި އެއީ ދެން އަންނަ ބަޔަކަށް ކުރިމަތިވާނެ ވަރަށް ބޮޑު ގޮންޖެހުމަކަށް ވާނެ ކަމުގައިވެސް ވިދާޅުވި އެވެ.