ޖަމިއްޔަތުލް އިއްތިހާދުގެ ނަމުގައި ދިވެހި ފުލުހުންގެ ހިދުމަތަށް ހުށަހަަޅާފައިވާ ސިޓީގައި ބަޔާންކޮށްފައިވާ ކަންތައްތައް ބެލިބެލުމުން ޖިނާއީ ތަހުގީގެއް ހިންގަން ޖެހޭފަދަ ކަމެއް ފާހަގަކުރެވިފައި ނުވާތީ އެ ސިޓީގައި ބަޔާންކޮށްފައިވާ ކަންކަމާ ގުޅިގެން ފުލުހުން ތަހުގީގެއް ކުރިއަށް ނުގެންދާ ކަމަށް މިރޭ ބުނެފި އެވެ.
ރައީސް މުހައްމަދު ނަޝީދު ޣައިރު ދީންތަކުގެ ޝިއާރުތައް ފަތުރާ ކަމަށް ބުނެ "ރައްޔިތުންގެ އިއްތިހާދު" އިން ފުލުހަށް މައްސަލައެއް ހުށަހަޅާފައިވާތީ އެކަމާއި ގުޅިގެން މަޖިލީސް އިދާރާއިން މިރޭ ބަޔާނެއް ނެރެފައިވަނިކޮށް ފުލުހުން ދެންމެ ބުނީ ޖަމިއްޔަތުލް އިއްތިހާދުގެ ނަމުގައި ދިވެހި ފުލުހުންގެ ހިދުމަތަށް ހުށަހަަޅާފައިވާ ސިޓީގައި ބަޔާންކޮށްފައިވާ ކަންތައްތައް ބެލިބެލުމުން ޖިނާއީ ތަހުގީގެއް ހިންގަން ޖެހޭފަދަ ކަމެއް ފާހަގަކުރެވިފައި ނުވާތީ އެ ސިޓީގައި ބަޔާންކޮށްފައިވާ ކަންކަމާ ގުޅިގެން ފުލުހުން ތަހުގީގެއް ކުރިއަށް ނުގެންދާ ކަމަށެވެ.
އަދި ފުލުހުން ބެލިބެލުމުން ސިޓީ ހުށަހަޅާފައިވަނީ ދައުލަތުގެ އެއްވެސް އިދާރާއެއްގައި ރަޖިސްޓްރީކުރެވިގެން ހިންގާ ގާނޫނީ ސަހުސަކުންކަމުގައި ނުވާތީ އެ ސިޓީއާމެދު އަމަލުކުރި ގޮތް އެ ސިޓީ ފޮނުވި ފަރާތަށް އަންގާފައި ނުވާނެ ކަމަށެވެ. އެ ސިޓީއާމެދު މި ހިދުމަތުން އަމަލުކޮށްފައި ވާނީ މި ހިދުމަތާ ހިއްސާކުރާ މައުލޫމާތުތަކާމެދު އަމަލުކުރަމުންދާ އުސޫލުން ކަމަށްވެސް ބުންޏެވެ.
"އިސްލާމްދީނާއި ހިލާފަށް ދިވެހިރާއްޖޭގައި ބައެއް ފަރާތްތަކުން ހިންގާ ކަންކަމަކީ މި ހިދުމަތުން ވަރަށް އިސްކަމެއްދީގެން ތަހުގީގުކުރަމުންދާ އަދި މުސްތަގުބަލުގައިވެސް ތަހުގީގު ކުރާނެ މައްސަލަތަކެެއްކަމުގައި ދަންނަވަމެވެ. ނަމަވެސް އެ ސިޓީގައި ފާހަގަކޮށްފައިވަނީ މިފަދަ ކަމެއްގެ މައުލޫމާތެއް ނޫންކަންވެސް ފާހަގަކުރަމެވެ،" މީޑިއާތަކަށް ފުލުހުން ފޮނުވި މެސެޖެއްގައި ބުނެފައިވެއެވެ.
މަޖިލީސް އިދާރާއިން ނެރުނު ބަޔާނެއް މެދުވެރިކުރައްވާ ނަޝީދު ވިދާޅުވީ ރާއްޖޭގައި ޙަރަކާތްތެރިވާ ސިޔާސީ ފަރާތްތަކުން ދޭ ބަހުގެ ޙަމަލާތަކާއި، މީޑިޔާގެ ރިޕޯޓުތަކުގައި، އެމަނިކުފާނަކީ އިސްލާމް ދީނުގެ އަސާސްތަކާ ޚިލާފަށް އުޅޭ ބޭފުޅެއްގެ ގޮތުގައި ތަޞައްވުރެއް ކުރަހަން މަސައްކަތް ކުރާތާ މިހާރު އަހަރުތަކެއް ވެއްޖެ ކަމަށެވެ. އަދި ސިޔާސީ މަސްރަހުގައި، މިފަދަ ބަސްމަގުން އެމަނިކުފާނުގެ ޒާތަށް ކުޑައިމީސް ބަސް ރައްދުކުރުމަކީ، އެ ފަދަ ތައުހީނަކާ ނުލައި ސިޔާސީ ބަހުސެއް ނުކުރެވޭ ދަރަޖައަށް ގޮސްފައިވާ ކަމެއް ކަމަށެވެ. މީގެ އިތުރުން އެމަނިކުފާނާ ދެކޮޅަށް އެއްލާ އެތިފަހަރުތަކުގެ ބަސްމަގު، ހަރުކަށި ފިކުރުގެ މީހުން ހިތާވާ ރާގަށް އަނބުރަމުން ދާތީ ކަންބޮޑުވާތާ ދުވަސްކޮޅެއް ވެއްޖެ ކަމަށްވެސް ވިދާޅުވިއެވެ.
އަދި އެ ފަދަ ވާހަކަތައް، އިންތިހާއަށް ނުރައްކާތެރި ވެފައި، އޭގެ ހަމައެކަނި މަޤްޞަދަކީ އެމަނިކުފާނު ޖާނަށް ނުރައްކާ ދިނުން ކަމަަށްވާތީ ލާދީނީ މީހެއްކަމަށް ބުނެ، ފަތުރާ އިލްޒާމުތަކަށް ފިޔަވަޅު އަޅާނެކަމުގެ އުންމީދުގައި ހުންނެވި ކަމަށް އެ ބަޔާނުގައި ނަޝީދު ވިދާޅުވިއެވެ.
އަދި މިފަދަ މައްސަލަތައް ފުލުހަށް ހުށަހަޅަނީ ދިވެހިރާއްޖޭގެ ޤާނޫނުލްޢުޤޫބާތަށް އިޞްލާޙު ގެނައުމުގެ ބިލު، މެއި 25، 2021 ގައި ހުށަހެޅިގޮތަށް މަޖިލީހުން ފާސްނުކުރުމުން ކަމަށްވެސް އެމަނިކުފާނު ވިދާޅުވިއެވެ.