އިސްލާމީ ލަޝްކަރުގައި ސިފައިން ބައިވެރިކުރުމުގެ މަޝްވަރާތައް ފަށައިފި

ސައުދީ އަރަބިއްޔާ އިސްވެ އޮވެ އެކުލަވާލި އިސްލާމީ ލަޝްކަރުގައި ރާއްޖޭގެ އަސްކަރިއްޔާގެ ދައުރާ ބެހޭ ސީދާ ނިންމުމެއް އަދި ނެތް ކަމަށާއި، އެކަމާ ގުޅޭގޮތުން ސައޫދީއާ އެކު މަޝްވަރާ ކުރަމުންދާ ކަމަށް ފޮރިން މިނިސްޓްރީން ބުނެފި އެވެ.

ފޮރިން މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެއްގައި ޕާމަނަންޓް ސެކެރެޓަރީ ޑރ.އަލީ ނަސީރު ވިދާޅުވީ، ފައުޖުގައި ރާއްޖެއިން ބައިވެރިވާން ނިންމި ނަމަވެސް، އެ ފައުޖުގައި ރާއްޖެއިން އަދާކުރަންޖެހޭ ދައުރާމެދު އަދި ގޮތެއް ނިންމާފައި ނުވާ ކަމަށެވެ. އަދި އެކަމާ ގުޅޭ މަޝްވަރާތައް ސައޫދީ ސަރުކާރާއެކު މިހާރު ކުރަމުންދާ ކަމަށް އަލީ ނަސީރު ވިދާޅުވި އެވެ.

"އަޅުގަނޑުމެން މިދަނީ މަޝްވަރާކުރަމުން، ސައުދީން ހިންގާ އޮޕަރޭޝަން ތަކުގައި އެގައުމަށް ރާއްޖެއިން އެހީތެރި ވެ ދެވޭނީ ކޮންކޮން ގޮތްތަކަކަށްތޯ،" އަލީ ނަސީރު ވިދާޅުވި އެވެ.

ރާއްޖޭގެ ސިފައިންގެ ދައުރަކީ ކޮބައިކަން އަދި ކަނޑަ ނޭޅި ނަމަވެސް، އެ ލަޝްކަރުގައި ރާއްޖެ ބައިވެރިވުމާ ގުޅޭ ގޮތުން ޑިފެންސް މިނިސްޓަރު އާދަމް ޝަރީފް ވިދާޅުވީ، ލަޝްކަރުގައި މިހާތަނަށް ރާއްޖެއިން ދެ ގޮތަކަށް ބައިވެރިވުމަށް ނިންމާފައިވާ ކަމަށެވެ. އެގޮތުން ޓެރަރިޒަމާ ގުޅޭ ގޮތުން ރާއްޖެއިން އެއް ކުރާ އިންޓެލިޖެންސް މައުލޫމާތުތައް އެ ލަޝްކަރާ ހިއްސާ ކުރުމާ އެކު ރާއްޖޭގައި ހެދިފައިވާ ގާނޫނުތަކުގެ ތެރެއިން ދިވެހި ސިފައިން އެ ލަޝްކަރުގެ ހަރަކާތްތަކުގައި އަމަލީ ގޮތުން ބައިވެރި ކުރާނެ ކަމަށް މިނިސްޓަރު ވަނީ ވިދާޅުވެފަ އެވެ.

ޓެރަރިސްޓް ޖަމާއަތްތަކުން ހިންގާ އަމަލުތަކާއި، ކުށެއް ނެތް މީހުންގެ ތެރޭގައި ބިރުވެރިކަން ފެތުރުން ހުއްޓުވައި އިސްލާމީ އުއްމަތް އެފަދަ ކަންކަމުން ހިމާޔަތް ކުރުމުގެ މަގުސަދުގައި ސައޫދީ ސަރުކާރުން އިސްނަގައިގެން އުފައްދާފައިވާ މި ކޯލިޝަނުގައި ރާއްޖެއާއެކު 34 ގައުމަކުން ވަނީ ބައިވެރިވެފަ އެވެ.