ކޮމަންޑޫ ދާއިރާގެ ބައި-އިލެކްޝަންގައި މޯލްޑިވްސް ނެޝަނަލް ޕާޓީ (އެމްއެންޕީ) ގެ ޓިކެޓްގައި ވާދަކުރާ އަބްދުލް ހަންނާން އިދުރީސް ދާއިރާއަށް ކޮށްދެއްވާނެ މުހިންމު ކަންކަމުގެ ވައުދު ލޯންޗުކުރުން މިރޭ އޮންނާނެ ކަމަށް އެ ޕާޓީ އިން ބުނެފި އެވެ.
ހަންނާންގެ ވައުދުތައް ލޯންޗުކުރުމަށް މިރޭ ހާއްސަ ރަސްމިއްޔާތެއް ބޭއްވުމަށް ވަނީ ހަމެޖެހިފަ އެވެ. މި އިވެންޓް އޮންނާނީ ހަންނާންގެ މާލެ ކެމްޕޭން ޖަގަހައިގައި މިރޭ 9:00 ގައެވެ. ހަންނާންގެ މާލެ ޖަގަހަ ހުންނަނީ ސިއްތިމާވާ ހިނގުމުގައި، އެމްޓީސީސީ ރެންޓަލްސްގެ ހުޅަނގުންނެވެ.
ހަންނާންގެ ކެމްޕެއިން ބާރަށް ކުރިއަށްދާއިރު ކޮމަންޑޫ ދާއިރާގެ ތިން ރަށުގައި މިހާރު ވަނީ ކެމްޕޭނު ޖަގަހަތައް ހުޅުވައިފަ އެވެ. މާލޭގެ އިތުރުން ހުޅުމާލޭގައި ވެސް ވަނީ ޖަގަހައެއް ހުޅުވައިފަ އެވެ.
ހަންނާންގެ ކެންޑިޑެންސީ އިލެކްޝަންސް ކޮމިޝަނުން ބަލައިގެންފައި ވަނީ މިދިޔަ މަހުގެ 26 ވަނަ ދުވަހު އެވެ.
ތައުލީމީ ދާއިރާގައި ހަންނާން ވަނީ 2013 އިން 2019 އަށް ވިލާ ކޮލެޖުގެ ޝަރީއާ އެންޑް ލޯ ފެކަލްޓީގެ މެނޭޖަރެއްގެ މަގާމު އަދާކުރައްވާފަ އެވެ. މީގެއިތުރުން ހދ. ހަނިމާދޫ ސުކޫލާއި، ރ. އިނގުރައިދޫ ސޫކޫލާއި، ނ. މާފަރު ސުކޫލާއި، ރ. ހުޅުދުއްފާރު ސުކޫލުގެ އިތުރުން ށ. އަތޮޅު ތައުލީމީ މަރުކަޒުގެ ޕްރިންސިޕަލް ކަން ކުރައްވާފައިވެ އެވެ.
އެމްއެންޕީ އުފެއްދުމަށް އެންމެ ފުރަތަމަ ސޮއި ކުރެއްވި ބޭފުޅުންގެ ތެރޭގައި ވެސް ހަންނާން ހިމެނެ އެވެ.