ޔުނައިޓެޑް އަރަބް އެމިރޭޓްސްގެ އެންމެ ބޮޑު އެއާލައިން ކަމަށްވާ އެމިރޭޓްސް އިން ތައްޔާރުކޮށް މިދިޔަ އަހަރު ނެރުނު އިޝްތިހާރަކަށް މުޅި ދުނިޔޭގެ ސަމާލުކަން ހުއްޓުނެވެ. މި އިޝްތިހާރު ބަލާފައި ބައެއް މީހުން ބިރުން ގޮސް ފިތްކަނޑައިގެން ދާވަރުވީއިރު އަނެއް ބަޔަކު ބުނީ މިއީ ދުވަހަކު ނުދެކޭ ވަރުގެ މޮޅު އިޝްތިހާރެއް ކަމަށެވެ.
އިޝްތިހާރުގައި ފެންނަނީ ޔޫއޭއީގައި ހުންނަ ދުނިޔޭގެ އެންމެ އުސް އިމާރާތް ކަމަށްވާ ބުރްޖް ޚަލީފާގެ އެންމެ ކުރީގައި އަންހެނަކު އިށީނދެ އިންދަ އެވެ. މިއީ ފޮޓޯ ޝޮޕްކޮށްގެން ހަދާފައިވާ އިޝްތިހާރެއް ނޫނެވެ. ހަގީގަތުގައި ވެސް އަންހެންމީހާ އިނީ އެ އިމާރާތުގެ ކުރީގަ އެވެ.
އެ އިޝްތިހާރަށް ލިބުނު ބޮޑު ތަރުހީބުގެ ސަބަބުން މީގެ އާ އިޝްތިހާރެއް އުފައްދާ އެމިރޭޓްސް އިން މިހާރު ވަނީ ނެރެފަ އެވެ. މިފަހަރު އަންހެންމީހާ ބުރުޖް ޚަލީފާ މަތީގައި ހުރިއިރު އޭނާގެ ވަރަށް ކައިރިން ލާފައި އެމިރޭޓްސް އޭ380 ގެ މަތިންދާބޯޓެއް ދާ މަންޒަރު ފެނެ އެވެ.
އެމިރޭޓްސްގެ މި އާ އިޝްތިހާރުގައި އެމިރޭޓްސް ކުރޫންގެ ޔުނިފޯމް ލައިގެން ހުންނަނީ ޕްރޮފެޝަނަލް ސްކައިޑައިވިން އިންސްޓްރަކްޓެއް ކަމަށްވާ ނިކޯލް ސްމިތު-ލުޑްވިކް އެވެ. އޭނާގެ އަތުގައިވާ ބޯޑެއްގައިވާ ލިޔުމުގައި ދުނިޔޭގެ އެންމެ ވަރުގަދަ ޝޯ، "އެކްސްޕޯ 2020 ޑުބާއީ އަށް ޒިޔާރަތް ކުރުމަށް ދައުވަތު ދީފައިވާ ލިޔުމެއް ވެއެވެ.
އެއް މިނިޓްގެ މި އިޝްތިހާރު ރިލީޒް ކުރުމާއެކު ތޫފާނެއް ލައިގެން ކަހަލަ އެވެ. ސަބަބަކީ އިޝްތިހާރު ނަގާފައިވާލެއް މޮޅުކަމުންނެވެ. އެމިރޭޓްސް ކުރޫއަކަށް ވެގެން ކުރޫން ލާ ޔުނީފޯމްގައި ނިކޯލް ހުރިއިރު އޭނާގެ ކައިރިން ލާފައި އޭ380 ގެ މަތިންދާބޯޓު ދަތުރު ކޮށްފައިވާ ދެއެވެ. އަދި ޔޫއޭއީގެ މަޝްހޫރު އުސް ގިނަ އިމާރާތްތަކެއް ވެސް މި ވީޑިއޯގައި ފެނެ އެވެ.
މި އިޝްތިހާރު ތައްޔާރުކުރި ގޮތުގެ "ބިހައިންޑް ދަ ސީން" ވީޑިއޯ އެއްވެސް މިހާރު ވަނީ ރިލީޒްކޮށްފަ އެވެ. މި ވީޑިއޯގައި ނިކޯލް ބުރުޒް ޚަލީފާއަށް އަރަން ތައްޔާރުވީ ގޮތާއި އެތަނަށް އަރާ އޭނާ ހުރި ގޮތް އަދި ބުރުޖް ޚަލީފާ ވަށައިގެން ވަރަށް ތިރިން މަތިންދާބޯޓު ދަތުރުކުރާ ތަނާއި ބޯޓުގެ ޕައިލެޓުން މި މަންޒަރުތައް ނަގަން ވީ ތައްޔާރީތައް ހިމެނެ އެވެ.
މި ވީޑިއޯގައި ބުނާ ގޮތުން އެ މަންޒަރު ފުރިހަމައަށް ނެގުނީ ބުރުޖް ޚަލިފާ ވަށައިގެން މަތިންދާބޯޓު 10 ވަރަކަށް ބުރު އެޅި ފަހުންނެވެ. މިހާ ގިނަ ބުރު އަޅަން ޖެހެނީ އެކި ސަބަބުތައް ދިމާވުމުންނާއި ޓައިމިން ދިމާ ނުވާތީ އެވެ.