ރާއްޖޭގައި މިހާތަނަށް ހުޅުވާ އެންމެ ބޮޑު ސުޕަ މާކެޓް ހިނގުމަށް ރެޑް ވޭވް ޕްރައިވެޓް ލިމިޓަޑްއާ ހަވާލުކޮށްފި އެވެ.
މިއީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުމާލޭގައި ހަދާފައިވާ ސުޕަ މާކެޓެކެވެ.
ހުޅުމާލޭގެ ޗައިނާ ފްލެޓްތައް ހިމެނޭ ހިސާބުގައި، ސުޕަމާކެޓެއްގެ ގޮތު އެޗްޑީސީން ހެދި "އެން3" ބިލްޑިންގައި ގާތްގަނޑަކަށް 9000 އަކަފޫޓު ހުރެއެވެ. އަދި މިދިޔަ ބުދަ ދުވަހު އެކުންފުނިން ވަނީ އެ އިމާރާތުގައި ފުޅާކޮށް ސުޕަމާކެޓެއް ހިނގުމަށް ރެޑްވޭވްއާ ހަވާލުކޮށްފަ އެވެ.
އެޗްޑީސީގެ މެނޭޖިން ޑިރެކްޓަރު މުހައްމަދު ސައިމަން މިއަދު ވިދާޅުވީ ޗައިނާ ފްލެޓް އޭރިއާގައި ގާއިމް ކޮށްފައިވާ 8917 އަކަފޫޓުގެ ސުޕަމާކެޓް ރަނގަޅު ފެންވަރުގައި ހިނގާނެ ބަޔަކު ހޯދަން އިއުލާންކުރުމުން ހުށަހެޅި ފަރާތްތަކުގެ ތެރެއިން އެންމެ މަތިން ޕޮއިން ލިބުނީ ރެޑްވޭވް އަށް ކަމަށެވެ. އަދި މިހާރު ރެޑް ވޭވް ޕްރައިވެޓް ލިމިޓެޑާ އިމާރާތް ހަވާލުކޮށްފައިވާ ކަމަށެވެ.
"މި އިމާރާތުގައި ރަނގަޅު ފެންވަރެއްގެ ސުޕަމާކެޓެއް ހިނގުމަށް ރެޑް ވޭވް ޕަރައިވެޓް ލިމިޓެޑަށް މިހާރު ވާނީހަވާލުކޮށްފައި. އިމާރާތުގައި ކެފޭ އޭރިޔާއަކާއިއެކު ރަނގަޅު ޝޮޕިން އެކްސްޕީރިއަންސެއް ލިބޭނެ ގޮތައް ހިނގަން ވަނީ ނިންމާފައި. މިތަން ވެގެންދާނީ ރާއްޖޭގައި މިހާތަނަށް ހުޅުވޭނެ އެންމެ ބޮޑު ސުޕަމާކެޓަށް،" ސައިމަން ވިދާޅުވި އެވެ.
ސައިމަން ވިދާޅުވީ ގޮތުގައި އެތަން ހިނގުމަށް ރެޑްވޭވްއާ ކޮންޓްރެކްޓެއް ހަވާލު ކުރީ ކުލީގެ ގޮތުގައި ކޮންމެ މަހަކު 200000 ރ. އެޗްޑީސީއަށް ދައްކާ ގޮތަށް ކަމަށެވެ.
ރެޑްވޭވް އިން ބުނެފައި ވަނީ އެން3 ގައި އެކުންފުނިން ސުޕަ މާކެޓް ފެންވަރަށް ހިނގާ ރެޑްވޭވް، ތިން މަސް ދުވަސް ތެރޭގައި ހުޅުވާ ހިދުމަތް ދޭން ފަށާނެ ކަމަށާއި އަދި އެތަނުން މުދާ ވިއްކާނީ މާލޭގައި ވެސް އެއްޗެހި ހުންނަ އަގަށް ކަމަށެވެ.
އެޗްޑީސީ އެމްޑީ މުހައްމަދު ސައިމަން އަދި ރެޑްވޭވް ވެރިޔާ އަހުމަދު ސަލީމް އެއްބަސް ވުމުގައި ސޮއި ކުރެއްވުމަށްފަހު ލިޔުން ހަވާލު ކުރަނީ -- ފޮޓޯ: އެޗްޑީސީ