ގދ. ތިނަދޫގައި ފިރިމީހާ ޖިންސީ އަނިޔާ ކޮށްގެން ސީރިޔަސް ހާލުގައި އިން އަންހެންމީހާ އަށް އިންސާފު ހޯދައި ދިނުމަށް ގޮވާލައި ހިނގާލުމެއް ބާއްވައިފި އެވެ.
ފިރިމީހާގެ ޖިންސީ އަނިޔާތަކުގެ ޝިކާރައަކަށްވީ މީހާގެ އާއިލާ އާއި ރަހުމަތްތެރިން އިންތިޒާމް ކޮށްގެން "ހޭލާ އަންހެނުން"ގެ ނަމުގައި ކުރިޔަށް ދިޔަ މި ހިނގާލުން ކުރިޔަށް ދިޔައީ ތިނަދޫ ބާސްކެޓް ކޯޓުން ފެށިގެން އެރަށުގެ ބޮޑެތި މަގުތަކުގަ އެވެ. އަދި ހިނގާލުމުގައި ދެ ޖިންސުގެވެސް 18 އަހަރުން މަތީ މީހުން ބައިވެރި ވާނެ ކަމަށް ހިނގާލުން އިންތިޒާމް ކުރި ފަރާތުން ވަނީ ބުނެފަ އެވެ.
މިއަދު ހަވީރު ހަތަރެއް ޖެހި އިރު ފެށި "ހޭލާ އަންހެނުން" ހިނގާލުމުގައި، އަންހެނުންގެ ހައްގުތަކާއި އެމީހުންނަށް ކުރާ އަނިޔާތައް ހުއްޓާލުމަށް ބުނާ ބެނާތައް ބޭނުންކުރި އެވެ. އަދި އަނިޔާ ލިބުނު ތޭންކްގޭގެ ޒިޔާދާ ނައީމަށް އަވަސް ޝިފާއަކަށް އެދި ދުއާ ކުރުމާއި އޭނާ އަށް ލިބުނު އަނިޔާތަކަށް އިންސާފު ހޯދައިދިނުމަ ގޮވާލި އެވެ.
މި ހިނގާލުމުގައި ރަށުގެ ގިނަ އަދަދެއްގެ ފިރިހެނުންނާއި އަންހެނުން ބައިވެރިވި އެވެ. އަދި ހިނގާލުން ނިމުނީ އިރުއޮއްސި 6:00 އެހާ ކަންހާ އިރުގަ އެވެ.
ތިނަދޫ ރައްޔިތުން މިފަދަ ހިނގާލުމެއް މިއަދު ބާއްވާފައިވާ އިރު ފިރިމީހާ އަނިޔާ ކުރި އަންހެން މީހާ މިހާރު ވަނީ އައިޖީއެމްއެޗްގެ އައިސީޔޫގަ އެވެ. އެހެން ނަމަވެސް ޑޮކްޓަރުން ބުނަމުން ދަނީ އޭނާގެ ހާލު ރަނގަޅު ވަމުން އަންނަ ކަމަށެވެ. އަދި މިކަމާ ގުޅިގެން ޖެންޑާ އިން ބުނެފައި ވަނީ އެ އަންހެން މީހާއަށް އިންސާފު ހޯދައިދޭން ކުރަންޖެހޭ ހުރިހާ މަސައްކަތެއް ކުރާނެ ކަމަށެވެ.
