ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީން ދެން ޖަލަށް ނުލެވޭނެ ކަމަށާއި އެމަނިކުފާނުގެ ހަށިކޮޅުގައި ދެން އަތް ނުލެވޭނެ ކަމަށް ވިދާޅުވެ އިދިކޮޅު ޕީއެންސީގެ ރައީސް އަބްދުއްރަހީމް އަބްދުﷲ އެމްޑީޕީއަށް ރައްދު ދެއްވައިފި އެވެ.
ރައީސް ޔާމީންގެ ދިފާއުގައި އަބްދުއްރަހީމް ވާހަކަފުޅު ދައްކަވާފައި މިވަނީ ކުރިއަށް އޮތް ރޯދަ މަހުގެ ކުރިން އެމަނިކުފާނު ހައްޔަރުކޮށް ޖަލަށްލާނެ ކަމަށް އެމްޑީޕީގެ ބައެއް އިސް ބޭފުޅުން ވިދާޅުވަމުން ގެންދަވަމުން ގެންދަވާ ވަގުތެއްގަ އެވެ.
އެމްޑީޕީގެ އިސް ބައެއް ބޭފުޅުން ރައީސް ޔާމީނާ މެދު މިވަގުތު އެންމެ ބޮޑަށް ނުރުހުންވެފައި ވަނީ ރާއްޖޭގައި ތިބި އިންޑިއާ ސިފައިން ފޭބުމަށް ގޮވާލައި ރައީސް ޔާމީން އިސްވެ ހުންނަވައިގެން ކުރިއަށް ގެންދަވާ "އިންޑިއާ އައުޓް" ކެމްޕޭނާ ގުޅިގެނެވެ. އެ ކެމްޕޭނަކީ ދެ ގައުމުގެ ސަލާމަތާއި ރައްކާތެރި ކަމަށް ހުރި ނުރައްކަލަކަށް ވާތީ އެ ކެމްޕޭން ހުއްޓުވާނެ ކަމަށްވެސް ސަރުކާރުން ކުރިން ބުނެފައިވެ އެވެ.
އެމްޑީޕީގެ އިސް ބޭފުޅުންނަށް ރައްދު ދެއްވާ އަބްދުއްރަހީމް ވާހަކަފުޅު ދެއްކެވީ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގައި ވާދަ ކުރައްވަމުން ގެންދަވާ ޕީޕީއެމްގެ ކެންޑިޑޭޓް މޫސާ ފަތުހީގެ ކެމްޕޭން ޖަލްސާގައި ށ. ކޮމަންޑޫގައި ރޭ ވާހަކަފުޅު ދައްކަވަމުންނެވެ.
އެމްޑީޕީގެ ޗެއާޕާސަން ހަސަން ލަތީފާއި އެމްޑީޕީގެ ނައިބު ރައީސް މުހައްމަދު ޝިފާޒުގެ ނަން ފާހަގަ ކުރައްވާ އަބްދުއްރަހީމް ވަނީ ރައީސް ޔާމީނާ ކުޅުއްވަން ނޫޅުއްވުމަށް އެބޭފުޅުންނަށް އިލްތިމާސް ކުރައްވާފަ އެވެ.
"ހަސަން ލަތީފެއް ކަމަކު ވެސް އެކަމެއް ނުކުރެއްވޭނެ. ޔާމީންގެ ގައިގައި ދެނެއް އަތެއް ނުލެވޭނެ. ދެނެއް ރައީސް ޔާމީން ޖަލަކަށް ވެސް ނުލެވޭނެ. ޝިފާޒަށް ވެސް ދަންނަވާލަން ބޭނުން ވަނީ ދެން އެކަމެއް ނުކުރެވޭނެއޭ،" އަބްދުއްރަހީމް ވިދާޅުވި އެވެ.
ރައީސް ޔާމީންގެ ވެރިކަމުގައި ކޮމަންޑޫ ދާއިރާގެ ރަށްތަކަށް އިހްމާލު ވެފައިވާ ކަމަަށް ވިދާޅުވެ އެމްޑީޕީގެ އިސް ބޭފުޅުން ދައްކަވަމުން ގެންދަވާ ވާހަކަތަކަށް ވެސް އަބްދުއްރަހީމް ވަނީ ރައްދު ދެއްވާފަ އެވެ.
އަބްދުއްރަހީމް ވިދާޅުވީ ކޮމަންޑޫ ދާއިރާގެ ރަށްތަކަށް ސަރުކާރަކުން ކަމެއް ކޮށްދީފައި އޮތް ނަމަ އެކަމެއް ކޮށްދެއްވީ ރައީސް ޔާމީންގެ ސަރުކާރުގައި ކަމަށެވެ. ކޮމަންޑޫގެ ރައްޔިތުންގެ ތެރެއިން ގޮނޑުދޮށާ ގާތުގައި ދިރިއުޅޭ ރައްޔިތުންނަށް އެ ދިމާލުން ރާޅު އަރާތީ ކުރިން ހަމަޖެހިލައިގެން ނުނިދޭ ކަމަށާއި އެމީހުންނަށް އެކަމުގައި ހިތްހަމަޖެހުމެއް ލިބުނީ ރައީސް ޔާމީން ކޮމަންޑޫގެ ބިން ހިއްކާ ދިނުމުން ވެސް ކަމަށްވެސް ވިދާޅުވި އެވެ. އެމްޑީޕީގެ ފުރަތަމަ ވެރިކަމުގައި ރައީސް މުހައްމަދު ނަޝީދަށް ވެސް އަދި މިހާރުގެ ވެރިކަމުގައި ރައީސް އިބްރާހީމް މުހައްމަދު ސޯލިހަށް ވެސް ކޮމަންޑޫ ދާއިރާގެ ރަށްތައް މީގެކުރިން ފެނިފައި ނުވާ ކަމަށާއި އެ ރަށްތަކަށް ކަމެއް ކޮށްދީފައި ވެސް ނުވާ ކަމަށްވެސް ވިދާޅުވި އެވެ.
"ކޮމަންޑޫ ދާއިރާގެ ރަށްތައް މިސަރުކާރަށް ފެނިގެން މިއުޅެނީ މި އިންތިހާބާ ގުޅިގެން ހަމަ ކުއްލިއަކަށް. އެހެންވެ ސަރުކާރުގެ ވަސީލަތްތައް ވެސް ނަހަމަ ގޮތުގައި ބޭނުންކޮށްގެން މަޝްރޫއުތަކެއް ވެސް އެ ހިންގަނީ،" އަބްދުއްރަހީމް ވިދާޅުވި އެވެ.
ކޮމަންޑޫ ދާއިރާގެ އިންތިހާބުގެ ކެމްޕޭންގެ ފޯރިގަދަވެފައިވާއިރު ސަރުކާރާއި އެމްޑީޕީގެ އިސްވެރިން އަދި އިދިކޮޅު ޕީޕީއެމްއާއި ޕީއެންސީގެ އިސް ގިނަ ބޭފުޅުންތަކެއް ވެސް މިވަގުތު ތިއްބެވީ ކޮމަންޑޫ ދާއިރާގެ ރަށްތަކުގަ އެވެ. އެމްއެންޕީގެ ކެމްޕޭން ވެސް މާލެ އާއި ކޮމަންޑޫ ދާއިރާގައި ކުރިއަށް އެބަދެ އެވެ.
އަންނަ މަހުގެ ފަސްވަނަ ދުވަހު ބާއްވާ އިންތިހާބުގައި ވާދަކުރައްވަނީ އެމްޑީޕީގެ ފަރާތުން މުހައްމަދު ރާޝިދާއި، ޕީޕީއެމްގެ ފަރާތުން މޫސާ ފަތުހީގެ އިތުރުން އެމްއެންޕީގެ ފަރާތުން އަބްދުލްހަންނާން އިދުރީސް އެވެ.