ކުރީގެ ރައީސް އަބްދުﷲ ޔާމީންގެ މައްޗަށް ރ. ފުއްގިރި މައްސަލައިގައި އުފުލައިފައިވާ ދެ ދައުވާގެ އަޑުއެހުންތަައް ނިންމައިލުމަށް ފަހު އަންނަ ޖޫން މަހުގެ 30 ވަނަ ދުވަހު ހުކުމް ކުރުމަށް ނިންމައި ވަކީލުންނަށް އަންގާފައިވާ ކަމަށް އެކަނިކުފާނުގެ ގާނޫނީ ވަކީލުންގެ ޓީމުން ވިދާޅުވެއްޖެ އެވެ.
ރައީސް ޔާމީންގެ މައްޗަށް ދައުލަތުން އުފުލާފައިވާ ދެ ދައުވާއަކީ ވެސް ރ. ފުއްގިރި ކުއްޔަށް ދޫކުރުމުގައި މަގާމުގެ ނުފޫޒު ބޭނުން ކޮށްގެން ރިޝްވަތު ނަގައި އަދި އެ ފައިސާ ބޭނުން ކޮށްގެން މަނީ ލޯންޑާ ކުރުމުގެ އަމަލު ހިންގަވާފައި ކަމަށް ބުނެ ކުރި ދެ ދައުވާ އެވެ. ރިޝްވަތުގެ ގޮތުގައި 1،117،000 އެމެރިކާ ޑޮލަރު ޔާމީން ނަންގަވާފައިވާ ކަމަށް ތުހުމަތު ކޮށްފައިވެ އެވެ.
މި މައްސަލަ ނިންމައި ހުކުމް ކުރުން އަންނަ ޖޫން މަހަށް ތާވަލުކޮށްފައިވާއިރު، ހަމަ އެ ދުވަހު އެމަނިކުފާނުގެ މައްޗަށް ވ. އާރަށުގައި ރިސޯޓެއް ތަރައްގީ ކުރަން ކުންފުންޏަކަށް އެރަށް ވިއްކާލައިގެން ލިބުނު ފައިސާ އަމިއްލަފުޅު އެކައުންޓަށް ޖަމާކޮށް ފައިސާ ލޯންޑާ ކުރުމުގެ ތުހުމަތުގައި ޔާމީންގެ މައްޗަށް ދައުލަތުން އުފުލައިފައި ދެ ދައުވާގެ ހުކުމް އިއްވުން ވެސް ވަނީ ތާވަލުކޮށްފަ އެވެ. އެ މައްސަލައިގައި ދައުލަތުން އެމަނިކުފާނުގެ މައްޗަށް އުފުލައިފައި ވަނީ މަނީ ލޯންޑްރިންގެ ދައުވާ އާއި ރިޝްވަތު ގަބޫލުކުރުމުގެ ކުށުގެ ދައުވާ އެވެ.
ރައީސް ޔާމީންގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ ގާނޫނީ ވަކީލް އާދަމް އާސިފް ވިދާޅުވީ، ފުއްގިރި މައްސަލައިގެ ހުކުމް އިއްވުމަށް ތާވަލުކޮށްފައި ވަނީ އެދުވަހުގެ 9:30 އަށް ކަމަށެވެ. އާރަށު މައްސަލައިގެ ހުކުމް އިއްވުމަށް ތާވަލުކޮށްފައި ވަނީ އެދުވަހުގެ މެންދުރުފަހު 1:30 ގައި ކަމަށެވެ.
އެކަން ޕްރޮސެކިއުޓާ ޖެނެރަލްގެ އޮފީހަށް އަންގާފައިވާ ކަމަށް އެ އޮފީހުގެ އޮފިޝަލަކު ވަނީ އަވަސްއަަށް ޔަގީންކޮށްދެއްވާފަ އެވެ.
ފުއްގިރި މައްސަލައިގެ ދައުވާގައިވާ ގޮތުން ރައީސް ޔާމީން ރިޝްވަތު ނަންގަވާފައި ވަނީ ފުއްގިރީގައި ރިސޯޓެއް ހަދަން އެރަށް ކުއްޔަށް ދޫކޮށްގެން މއ. ކުރިކީލަހިޔާ، އަހްމަދު ކްރިކް ރިޒާ މެދުވެރިކޮށެވެ. އަދި މަނީލޯންޑާ ކޮށްފައިވަނީ ސަން ކޮންސްޓްރަކްޝަން އެންޑް އިންޖިނިއަރިން އާއި ސަން އިންވެސްޓްމެންޓް ބޭނުން ކޮށްގެންނެވެ.
މި މައްސަލައިގެ އަޑުއެހުމެއް އެންމެ ފަހުން ކްރިމިނަލް ކޯޓުގައި ބާއްވާފައި ވަނީ މިދިޔަ އަަހަރުގެ ޑިސެމްބަރު ހަ ވަނަ ދުވަހު އެވެ. އެދުވަހުގެ އަޑުއެހުމުގައި ދައުލަތުން ވަނީ ރައީސް ޔާމީންގެ ޕާސްޕޯޓު ހިފަހައްޓައިދިނުމުގެ އަމުރަކަށް އެދިފަ އެވެ. އެކަމަކު އިސް ގާޒީ އަހުމަދު ޝަކީލް ނިންމެވީ އެ އަމުރު ނެރެނުދެއްވުމަށެވެ. މި މައްސަލައިގައި ކުރިއަށް ދަނީ އިބްތިދާއީ މަރުހަލާ އެވެ.
ރައީސް ޔާމީންގެ ދެ މައްސަލަ ވެސް ކްރިމިނަލް ކޯޓުގައި ބައްލަވަނީ އިސް ގާޒީ އަހުމަދު ޝަކީލް އެވެ.