ސިޔާސީ ޕާޓީތަކުގެ ހިސާބުތައް ބަަލަހައްޓާ މިންވަރު ދެނެގަތުމަށްޓަކައި ޕާޓީ ތަކުގެ އާމްދަނީއާއި ހަރަދުތަކުގެ ލިޔެކިޔުންތައް ބެލުމާ ގުޅޭ އުސޫލެެެއް އެކުލަވާލާ އަމަލުކުރަން ފަށައިފި އެވެ.
ސިޔާސީ ޕާޓީ ތަކުގެ 41 ވަނަ މާއްދާގެ ދަށުން އިލެކްޝަންސް ކޮމިޝަނުން އެކުލަވާލާފައިވާ މި އުސޫލަށް އަމަލުކުރަން ފެށީ މިމަހުގެ ދެވަނަ ދުވަހުން ފެށިގެންނެވެ.
ޕާޓީ ތަކުން ފައިސާގެ ހިސާބުތައް ބަލަހައްޓާ މިންވަރު ދެނެގަތުމަށްޓަކައި ޕާޓީތަކުގެ އޮފީސްތަކަށް ކޮމިޝަންގެ މުވައްޒަފުން ހާޒިރުވެ ޕާޓީ ތަކަށް ލިބޭ އާމްދަނީއާއި ކުރާ ހަރަދުތަކާ ބެހޭ ލިޔުންތައް ބެލުމުގެ ބާރު މިއުސޫލުގެ ދަށުން ކޮމިޝަނަށް ލިބިގެންވެ އެވެ.
އުސޫލުގެ ދަށުން ބަލާނެ ކަންކަން
- ސިޔާސީ ޕާޓީގެ މުދަލާއި ފައިސާގެ ހިސާބުތައް ބަލަހައްޓަމުން ގެންދަނީ، ދައުލަތުގެ މުދަލާއި ފައިސާގެ ހިސާބުތައް ބަލަހައްޓާ އުސޫލުންކަން ނުވަތަ ނޫންކަން
- ޕާޓީގެ ނަމުގައި ބޭންކު އެކައުންޓެއް ހުޅުވައި، އެ އެކައުންޓަށް ޕާޓީގެ ފައިސާ ޖަމާކޮށް ބަލަހައްޓާކަން ނުވަތަ ނޫންކަން
- ޕާޓީގެ މުދަލާއި ތަކެތީގެ އިންވެންޓްރީއެއް ހަދައި ބަލަހައްޓާކަން ނުވަތަ ނޫންކަން
- ލިބޭ މުދަލާއި ފައިސާގެ ތަފުސީލުތައް ލިޔެ ބަލަހައްޓާކަން ނުވަތަ ނޫންކަން
- އޮޑިޓާ ޖެނެރަލް ގަބޫލުކުރާ ފަރާތެއް މެދުވެރިކޮށް، އަހަރަކު އެއް ފަހަރު ފައިސާގެ ހިސާބުތައް އޮޑިޓްކުރާކަން ނުވަތަ ނޫންކަން
- އޮޑިޓް ރިޕޯޓު، ގަވާއިދުން ކޮމިޝަނަށް ހުށަހަޅާކަން ނުވަތަ ނޫންކަން
- ޕާޓީއަށް އެހީ ދޭ ފަރާތްތަކުގެ މައުލޫމާތު ލިޔެ ބަލަހައްޓާކަން ނުވަތަ ނޫންކަން
އުސޫލުގައިވާ ގޮތުން ސިޔާސީ ޕާޓީގެ މުދަލާއި ފައިސާގެ ހިސާބުތައް ބަލަހައްޓަމުން ގެންދަނީ ރަނގަޅަށްތޯ ބެލުމަށްޓަކައި މަދުވެގެން އަހަރަކު އެއް ފަހަރު ނުވަތަ ކޮމިޝަނުން ކަނޑައަޅާ ގޮތެއްގެ މަތިން ޕާޓީތަކުގެ އެންމެހާ ލިޔުންތައް ކޮމިޝަނަށް ބެލިދާނެ އެވެ.
ކޮމިޝަނުން ޕާޓީއެއްގެ އޮފީހަށް ދިއުމުގެ ކުރިން ތިން ދުވަހުގެ ނޯޓިސް ލިޔުމުން ދޭން ޖެހެ އެވެ. ލިޔެކިޔުންތައް ބެލުމުގައި އަމަލުކުރާނެ ތަރުތީބަކީ ސިޔާސީ ޕާޓީތައް ރަޖިސްޓްރީވެފައިވާ ތަރުތީބު ކަމަށްވެސް އުސޫލުގައިވެ އެވެ.
އިލެކްޝަންސް ކޮމިޝަނުން ބަލަހައްޓަމުން ގެންދާ ސިޔާސީ ޕާޓީތަކުގެ ދަފްތަރުގައި 11 ޕާޓީއެއް ހިމަނާފައިވެ އެވެ.