އިލެކްޝަންސް ކޮމިޝަން (އީސީ) ގެ މެންބަރު ކަމަށް އަބްދުލް ހަސީބު އިސްމާއީލް އައްޔަންކުރައްވައިފި އެވެ.
ގާނޫނުއަސާސީ އާއި އިލެކްޝަންސް ކޮމިޝަނުގެ ގާނޫނުގައިވާ ގޮތުގެ މަތީން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އީސީގެ މެންބަރު ކަމަށް އަބްދުލްހަސީބު އައްޔަން ކުރައްވާފައި ވަނީ މިއަދު އެވެ.
އީސީގެ މެންބަރު ކަމަށް ހަސީބު އައްޔަންކުރަން ރައްޔިތުންގެ މަޖިލީހުން ފާސްކުރީ މިދިޔަ މަހުގެ ފަސްވަނަ ދުވަހު އެވެ.
އެ ގޮތުން ހަސީބު އެ މަގާމަށް އައްޔަންކުރަން ފެންނަ ކަމަށް ފާސްވީ ވޯޓު ދެއްވި 67 މެންބަރުންގެ އިއްތިފާގުންނެވެ.
ހަސީބު ވަނީ އީސީގެ އެސިސްޓެންޓް ޑިރެކްޓަރުގެ މަގާމާއި އިސްލާމިކް މިނިސްޓްރީގެ ޕާމަނަންޓް ސެކްރެޓަރީގެ މަގާމުވެސް އަދާކުރައްވާފަ އެވެ.
އީސީގެ މެންބަރު ކަމަށް ހަސީބު ކުރިމަތިލެއްވީ އެ ކޮމިޝަންގެ ކުރީގެ ރައީސް ފުއާދު ތައުފީގުގެ ދައުރު ހަމަވާތީ މެންބަރު ކަމަށް ފުރުސަތު ހުޅުވާލުމުންނެވެ.
އިލެކްޝަންސް ކޮމިޝަންގައި ފުއާދުގެ ދައުރު ހަމަވީ މިދިޔަ ނޮވެމްބަރު 23 ވަނަ ދުވަހު އެވެ.