ށ. ފީވަށް ބަނދަރުގެ މަސައްކަތް ނިންމައިފި އެވެ.
ފީވަކު ބަނދަރު މަޝްރޫއު އެމްޓީސީސީއާ ހަވާލުކުރީ ސެޕްޓެމްބަރު 13، 2020 ގައެވެ. މިމަސައްކަތް ނިންމާފައިވަނީ މިދިޔަ މަހުގެ 29 ވަނަ ދުވަހު އެވެ.
ޕްލޭނިން މިނިސްޓްރީން އެމްޓީސީސީއާ ހަވާލުުކުރި ބަނދަރު ތަރައްގީކުރުމުގެ މަޝްރޫއަށް 67.6 މިލިއަން ރުފިޔާ ހޭދަކޮށްފައިވެ އެވެ.
ފީވަކު ބަނދަރު މަޝްރޫއުގެ ދަށުން 55،163 ކިއުބިކު މީޓަރުގެ ބަނދަރު ފުންކުރުމާއި، 474 މީޓަރުގެ އެއްގަމުތޮށި ލުމާއި، 356 މީޓަރުގެ ބޭރުތޮށި ލުމާއި، 182 މީޓަރުގެ ރިވެޓްމަންޓު ޖެހުމުގެ އިތުރުން 3،202 އަކަމީޓަރުގެ ސަރަހައްދެއްގައި ޕޭމަންޓު ހަދާފައިވެ އެވެ. އަދި ނެރުބައްތި އާއި މަގުބައްތި ހަރުކުރުމުގެ މަސައްކަތް ވެސް ކޮށްފައިވެ އެވެ.
އެމްޓީސީސީން ވަނީ މިސަރުކާރުގެ ތިން އަހަރުގައި ގިނަ ބަނދަރުތަކެއްގެ މަސައްކަތް މިހާތަނަށް ނިންމާފަ އެވެ. އަދި މިހާރު ވެސް ގިނަ ބަނދަރު ތަކެއްގެ މަސައްކަތް އެމްޓީސީސީން ދަނީ ކުރަމުންނެވެ.
ރައްޔިތުންގެ މަޖިލިސް މިއަހަރަށް ހުޅުވުމުގެ ގޮތުން ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް މިމަހުގެ ތިންވަނަ ދުވަހު އިއްވެވި ރިޔާސީ ބަޔާނުގައި ވިދާޅުވީ ޖުމްލަ 134 ރަށުގެ ބަނދަރުގެ މަސައްކަތް، އެކި މަރުހަލާގައި ހިނގަމުންދާ ކަމަށެވެ. އަދި މިސަރުކާރުގައި 28 ރަށުގެ ލަފާފުރުމުގެ މައްސަލަ ހައްލުކޮށްދެވިފައިވާ ކަމަށްވެސް ވިދާޅުވި އެވެ.