ތާރީހީ ތަރިކައެއްގެ ގޮތުގައި ދާރުލްއާސާރުގައި ބާއްވަން ހޯމް މިނިސްޓްރީއާއި މޯލްޑިވްސް ހެރިޓޭޖް ޑިޕާޓްމަންޓުން ގުޅިގެން ބަން ނަމޫނާ ކަޅުއޮއްފުއްމި ބާއްވާނެ ތަނެއް ދާރުލް އާސާރުގައި ހެދެންދެން، އޮޑި ފޭދޫ ފިނޮޅުގައި ބާއްވަން ހޯމް މިނިސްޓްރީން ނިންމައިފި އެވެ.
އުތީމު ތިން ތަކުރުފާނުންގެ ގައުމީ ޖިހާދުގެ ރަމްޒެއްގެ ގޮތުގައި ބެލެވޭ ކަޅުއޮއްފުއްމީގެ އާ ނަމޫނާ ބަނުމަށް ސަރުކާރުން އެއް މިލިއަން ރުފިޔާ ހަރަދުކުރި އެވެ. މިއަހަރުގެ ގައުމީ ދުވަހުގެ މުނާސަބާ އަށް އޮޑި އުތީމަށް ގެންދިޔުމަށްފަހު މާލެ ގެނައީ މި ދިޔަ ހުކުރު ދުވަހުއެވެ. މާލެ ގެނައުމަށްފަހު އާންމުންނަށް ދައްކާލުމަށް ދެ ދުވަހަށް އެއްނަންބަރު ފާލަމުގައި އޮޑި ބޭއްވި އެވެ. ނަމަވެސް ދާރުލްއާސާރުގައި ދޯނި ބާއްވާނެ ޖާގަ ނެތުމުން ހޯމް މިނިސްޓްރީން އިއްޔެ ވަނީ އެ އޮޑި ފޭދޫ ފިނޮޅަށް ބަދަލުކޮށްފަ އެވެ.
"އަވަސް" އަށް މައުލޫމާތުދެއްވަމުން ޑެޕިއުޓީ ހޯމް މިނިސްޓަރު (މާޒް) މުހައްމަދު ސަލީމް ވިދާޅުވީ، ނަމޫނާ ކަޅުއޮއްފުއްމި ދާރުލްއާސާރަށް މިއަދު ބަދަލުކުރަން ހަމަޖައްސާފަ އޮތް ނަމަވެސް، ދޯނި ބާއްވާ ސްޓޭޖް ހަދަން ނުފަށާތީ މިހާރުން މިހާރަށް ދޯނި ދާރުލްއާސާރަށް ބަދަލުކުރެވެން ނެތް ކަމަށެވެ. ކަޅުއޮއްފުއްމި ބާއްވާ ތަން ހަދަން ނުފެށިގެން އުޅެނީ ދޯނި ބާއްވާނެ ޖާގަ ފައިނަލް ނުވެގެން ކަމަށް ވެސް ސަލީމް ވިދާޅުވި އެވެ.
"ކަޅުއޮއްފުއްމި ބާއްވާނެ ތަނެއް އަދިވެސް އަޅުގަނޑުމެންނަށް ފައިނަލް އެއް ނުވޭ. ބޮޑު ޖާގައެއް ބޭނުންވާނެތޯ ދޯނި ބާއްވާނީ ދާރުލް އާސާރުގެ ބޭރުގައި ތަނެއް ހެދުމަށްފަހުތޯ ނޫނީ އެތެރޭގައިތޯ އެއީ އުފެދޭ ސުވާލެއް. ވަކި ގޮތަކަށް ނިންމުމަށްފަހު ޕްލެޓްފޯމް ހަދަން ފަށާނަން، އެހާތަނަށް އަޅުގަނޑުމެން އެ އޮޑި ބާއްވާނީ ފޭދޫ ފިނޮޅުގައި ރައްކާތެރިކަމާ އެކު،" ސަލީމް ވިދާޅުވި އެވެ.
އޭނާ ވިދާޅުވި ގޮތުގައި ކުރިއަށް އޮތް ދެ ހަފުތާއެއްހައި ދުވަހުގެ ތެރޭގައި ކަޅުއޮއްފުއްފި ބާއްވާ ތަނެއް ދާރުލްއާސާރުގައި ހަދައި، އެތަނަށް ދޯނި ބަދަލު ކުރާނެ އެވެ.
ކަޅުއޮއްފުންމި އަކީ ޕޯޗުގީޒުންގެ އަތްދަށުން ރާއްޖެ މިނިވަންކުރުމަށް އުތީމު ތިން ތަކުރުފާނުން ކުރެއްވި ޖިހާދުގައި ބޭނުންކުރެއްވި އުޅަނދެވެ. ދިގުމިނުގައި 51 ފޫޓު ހުންނަ ނަމޫނާ ކަޅުއޮއްފުންމި ބަނދެފައިވަނީ 120 ރުއް ކަނޑައި އޭގެ ލަކުޑީންނެވެ.