މިސްރުގެ ހުރްދަގާ ސިޓީގައި އޮންނަ ރެޑްސީ ރިސޯޓުގެ ބެއްލާ ވިސްޓާ ހޮޓަލަށް ދެ މީހަކު ވަޅި ހިފައިގެން ވަދެ ދިން ހަމަލާތަކުގައި ތިން ޓޫރިސްޓަކަށް ހަމަލާދީ ޒަހަމްކޮށްލައިފި އެވެ.
ހައްދުފަހަނައަޅާފައިވާ އައިއެސް ޖަމާއަތަށް ނިސްބަތްވާ ކަމަށް ތުހުމަތު ކުރެވޭ އެ ދެމީހުންގެ ހަމަލާތަކަށް ފަހު ފުލުހުން ވަނީ އެ ދެ މީހުން މަރާލާފަ އެވެ.
ރިޕޯޓްތައް ބުނާގޮތުގައި އެ ދެ މީހުން ހޮޓަލަށް ވަދެ ޓޫރިސްޓުން ރަހީނުކުރަން ވެސް މަސައްކަތް ކުރި އެވެ. އަދި އޭގެ ފަހުން އެސަރަހައްދުގައި އައިއެސްގެ ދިދަ ނަގާފައި ވުމުން މިސްރުގެ ސަލާމަތީ ފައުޖުތަކުން ދަނީ އަތުވެދާނެ ކުއްލި ނުރައްކަލަކުން ރައްކާތެރިވުމަށް ހާއްސަ އޮޕަރޭޝަންތައް ހިންގަމުންނެވެ. އަދި މިހާރު ހުރްގަދާގައި އެލާޓް ނެރެފައިވާއިރު ސިޓީއަށް ގޮސް، ނުކުމެ ހެދޭ މަގުތައްވަނީ ބަންދުކޮށްފަ އެވެ.
މިހަމަލާއާއި ގުޅިގެން އިނގިރޭސިވިލާތުގެ ދާހިލީ ވުޒާރާއިން ބުނީ "މިހަމަލާގެ ތަހުގީގުތައް ވަރަށް ބާރަށް ކުރިއަށްދާ" ކަމަށެވެ.
އައިއެސް ޖަމާއަތުން ދަނީ މުސްލިމް ގިނަ ގައުމުތަކުގައި ބޮޑެތި ޖަރީމާތައް ހިންގަމުންނެވެ. އޭގެ ސަބަބުން އެތައް މިލިއަން މީހުން ހާލުގައި ޖެހި ރެފިއުޖީންގެ ގޮތުގައި ހުޅަނގުގެ ގައުމުތަކަށް ދަނީ ހިޖުރަކުރަމުންނެވެ.