ގާނޫނާއި ގަވައިދާ ހިލާފަށް ހދ. ކުރިނބީ ގޮނޑުދޮށުން ވެލި ނެގި ދެ ބިދޭސީއަކު ޖޫރިމަނާކޮށްފި އެވެ.
ހުއްދަ ނުނަގާ ވެލި ނެގި މައްސަލައިގައި ޖޫރިމަނާކޮށްފައިވަނީ ކުރިނބީގައި މަސައްކަތް ކުރާ ބަންގްލަދޭޝްގެ ދެ މީހުންނެވެ.
އަވަސް އަށް މައުލޫމާތު ދެމުން ކުރިނބީ ކައުންސިލުން ބުނީ އެ ދެ މީހުން ގޮނޑުދޮށުން ވެލި ނަގަމުންދާ ކަމަށް ބުނެ ބަޔަކު އެ މައްސަލަ ކައުންސިލަށް ރިޕޯޓް ކުރީ މިދިޔަ ފެބްރުއަރީ 26 ވަނަ ދުވަހު ކަމަށެވެ.
ކައުންސިލްގެ މުވައްޒަފުން އެ ވަގުތު އެތަނަށް ދިޔައިރު ދެ ބިދޭސީން ގޯނިތަކަކަށް ވެލި އަޅަން ތިބުމުން ގޯނިތަކުގައި ހުރި ވެލިތައް އަނބުރާ އެތަނަށް އަޅާލުމަށްފަހު އެ ދެ ބިދޭސީން ކައުންސިލް އިދާރާ އަށް ހާޒިރުކޮށް ޖޫރިމަނާކުރާނެ ކަން އެންގުމަށްފަހު އެ ދުވަހު ފޮނުވާލީ ކަމަށެވެ.
ދެ ބިދޭސީންގެ ތެރެއިން ކޮންމެ މީހަކު 3،000 ރުފިޔާ އިން ޖޫރިމަނާކޮށް ތިން ދުވަހުގެ ތެރޭގައި ޖޫރިމަނާ ފައިސާ ދައްކަން ކައުންސިލުން އެންގީ އަންގާރަ ދުވަހު އެވެ.
ކައުންސިލުން ބުނީ ދީފައިވާ މުއްދަތުގެ ތެރޭގައި ޖޫރިމަނާ ފައިސާ ނުދައްކައިފިނަމަ އަޅަންޖެހޭ އިތުރު ފިޔަވަޅުތައް ކައުންސިލުން އަޅާނެ ކަމަށެވެ.
ކުރިނބީ ކައުންސިލުން އިތުރަށް ބުނީ އެރަށުގެ ގޮނޑުދޮށުން ވެލި ނެގުމަކީ މަނާކޮށްފައިވާ ކަމަކަށްވާތީ ރަށު ރައްޔިތުން އެ ނިންމުމަށް އިހްތިރާމުކޮށް ވެލި ނަގަމުން ނުދާ ކަމަށެވެ.