އޮސްޓްރޭލިއާގެ މަޝްހޫރު ފްރެންޗައިޒް ބްރޭންޑެއް ކަމަށްވާ، "ގްލޯރިއާ ޖީންސް ކޮފީ" ގެ އާ އައުޓުލެޓް ހުޅުވަން ތައްޔާރު ވެއްޖެ އެވެ.
މިއީ "ގްލޯރިއާ ޖީންސް ކޮފީ" ގެ ހަތަރުވަނަ އައުޓްލެޓެވެ. މިފަހަރުގެ އައުޓްލެޓް ހުޅުވަނީ ހުޅުމާލެ އަމީން އެވެނިއު ފުރަތަމަ ފަންގިފިލާގަ އެވެ. މިއީ ހުޅުމާލޭގައި ހުޅުވާ ދެވަނަ އައުޓްލެޓެވެ. މިވަގުތު އެއާޕޯޓާއި މާލޭގައި ވެލާނާގެ ކުރިމަތީން ވެސް "ގްލޯރިއާ ޖީންސް ކޮފީ" އައުޓްލެޓެއް ހުރެއެވެ. ހުޅުމާލޭގައި ބީޗް އޭރިއާގައި ވެސް އައުޓްލެޓެއް ހުރެއެވެ.
ކޮފީގެ އިތުރުން ތަފާތު ބާވަތްތަކުގެ ކެއުންތައް މި އައުޓްލެޓްވެސް ހެޔޮ އަގެއްގައި ލިބެން ހުންނާނެ އެވެ. އަދި ދިވެހީންގެ މެދުގައި މަގުބޫލް ޗައިނީސް ކެއުންތައް ވެސް މި އައުޓްލެޓުން ލިބެން ހުންނާނެ އެވެ.
މާދަމާ ރޭ ނުވައެއް ޖަހާއިރު މި އައުޓްލެޓް ހުޅުވުމާއެކު ކަސްޓަމަރުންނަށް ހާއްސަ ޑިސްކައުންޓް ޕެކޭޖްތަކެއް ތައާރަފު ކުރާނެ އެވެ.
120 މީހުންނަށް އެއް ފަހަރާ ހިދުމަތް ދެވޭ ގޮތަށް ތައްޔާރުކޮށްފައިވާ މި އައުޓްލެޓްގައި އެކި ހަފްލާތައް ބޭއްވުމަށް ފުރުސަތުވެސް ދޭނެ އެވެ. އަދި އޮފީސްތަކާއި ކުންފުނިތަކުގެ މުހިންމު މީޓިންތަކާއި އިވެންޓްތަކަށްވެސް އެތަން ކުއްޔަށް ދޭނެ އެވެ.
ގްލޯރިއާ ޖީންސް ކޮފީއަކީ ދުނިޔޭގެ އެންމެ ޒަމާންވީ އެއް ކޮފީ ޗެއިންނެވެ. ދުނިޔޭގެ 39 ގައުމެއްގައި މި ބްރޭންޑްގެ 800 އަށް ވުރެ ގިނަ އައުޓްލެޓް ހުރެއެވެ.