"ބަހޫބަލީ" ސީރީޒްގެ ދެ ފިލްމަކީ މިހާތަނަށް އިންޑިޔާގައި އުފައްދާފައިވާ އެންމެ ކާމިޔާބު ދެ ފިލްމެވެ. މި ދެ ފިލްމުގެ ކާމިޔާބާއެކު އެ ދެ ފިލްމުގައި ވެސް އެންމެ މުހިއްމު ރޯލެއް އަދާކުރި ޕްރަބާސްގެ މަޝްހޫރުކަން ވެސް އިންތިހާއަށް ދިޔަ އެވެ. އޭނާގެ ހެދިހުރި ބޮޑު ހަށިގަނޑާއި ރީތި ހިނިތުންވުން އަދި ހުނަރުވެރި އެކްޓިންގެ ސަބަބުންނެވެ. ޚާއްސަކޮށް އަންހެންކުދިންގެ މެދުގައި ޕްރަބާސް ވަރަށް މަގްބޫލު މީހަކަށްވެ އިންޑިޔާގެ ގިނަ އަންހެނުން އޭނާއާ ކައިވެނި ކުރުމުގެ ހުވަފެން ދެކެން ފެށި އެވެ.
އެ ދުވަސްވަރު ޕްރަބާސް އަށް ކައިވެނީގެ 5000 ޕްރޮޕޯޒަލް ލިބިފައި ވެއެވެ. ނަމަވެސް އޭނާ އޭރުވެސް އަދި މިހާރު ވެސް ބުނަނީ އެންމެ ވާހަކަ އެކެވެ. ކޮންމެ އިރަކުން ކުރިޔަސް ކައިވެނި ކުރާނަމަ ކުރާނީ އޭނާ އެމީހަކު ދެކެ ލޯބިވާ މީހަކާ އެވެ. ކިތަންމެ ވަރަކަށް އާއިލާއިން މަޖްބޫރު ކުރިޔަސް އާއިލާގެ މީހުން ހޯދާ އަންހެންކުއްޖަކާ އެރޭންޖް މެރިޖެއް ކުރާކަށް ޕްރަބާސް އެއްބަހެއް ނުވާނެ އެވެ.
"ބަހޫބަލީއަށް ފަހު 5000 މެރިޖް ޕްރޮޕޯޒަލް އައި. އަހަރެންނަށް އެކަމާ ހެދި ކުޑަކޮށް އޮޅުން އަރާ ގޮތްވި. ހަމަ ޔަގީނުން ވެސް އަހަރެން ކައިވެނި ކުރާނަން. ނަމަވެސް ކައިވެނި ކުރާނީ ކޮން އިރަކުން ކަމެއް ބުނާކަށް ނޭނގޭ،" ޕްރަބާސްގެ އެންމެ ފަހުގެ ރިލީޒް "ރާދޭ ޝާމް"ގެ ޕްރޮމޯޝަން އިވެންޓެއްގައި ވާހަކަ ދައްކަމުން ޕްރަބާސް ބުނެފައި ވެއެވެ.
"ރާދޭ ޝާމް"ގައި ޕްރަބާސް އާއެކު ލީޑް ރޯލު ކުޅެފައިވަނީ ޕޫޖާ ހެގްޅޭ އެވެ. މިއީ ޕްރަބާސް ކުރިން ކުޅެފައިވާ ފިލްމުތަކާ ވަރަށް ތަފާތު ރޮމެންޓިކް ފިލްމެކެވެ. އޭނާ ކުރިން އަބަދު ވެސް ކުޅެފައިވަނީ ވަރަށް ބާރުގަދަ ކެރެކްޓާތައް ހިމެނޭ އެކްޝަން ފިލްމުތަކެވެ.
ޕްރަބާސް ބުނި ގޮތުގައި މިފަހަރު ރޮމެންޓިކް ފިލްމެއް ކުޅުނީ ހަމަ ގަސްތުގައި އެކަމަށް ބޭނުން ވެގެންނެވެ. އަބަދު އެއް ކަހަލަ ފިލްމުތަކެއް ކުޅެކުޅެ ކޮންމެވެސް ބަދަލަކަށް ވަރަށް ބޮޑަށް ބޭނުން ވެގެންނެވެ.
"ރާދޭ ޝާމް" މިހާރު ވަނީ ސިނަމާތަކުގައި ރިލީޒް ކޮށްފަ އެވެ. އަދި ޕްރަބާސް ފޭނުން މި ފިލްމު ވަރަށް ރީތިވެގެން ސޯޝަލް މީޑިއާގައި އެވާހަކަ ވަރަށް ގަދަޔަށް ދައްކަމުން އެބަދެ އެވެ. ނަމަވެސް ފިލްމުތަކަށް ފާޑުކިޔާ ލިޔުންތެރިންގެ ނަޒަރުގައި މި ފިލްމު އެހާ ކަމަކު ނުދެ އެވެ. ގިނަ ރިވިއުޒްތަކުގައި މި ފިލްމަށް ދީފައިވަނީ ފަސް ތަރިން އެންމެ ދެ ތަރި އެވެ.