އިންޑިއާގެ ސޫތުކުޅިން ރާއްޖެ ގެންނަ ޕެރިޝަބަލް- އަވަހަށް ހަލާކުވާ ޒާތުގެ މުދާ- ބާލަން ފަސޭހަވާނެ ގޮތަކަށް ރަނގަޅަށް ބަންދުކޮށްފައި ބަހައްޓަން ރާއްޖޭން އެދިއްޖެ އެވެ.
ރޯދަމަހަށް ގެންނަ މުދާ އަވަހަށް ބޭލޭނެ އިންތިޒާމެއް ހަމަޖައްސަން އެމްޕީއެލްގެ ޓީމެއް ވަނީ އިންޑިއާގެ ސްތޫކުޅިއަށް ގޮޮސްފަ އެވެ. މި ދަތުރުގެ ބޭނުމަކީ ރާއްޖެއަށް އެންމެ ގިނައިން ޕެރިޝަބަލް -އަވަހަށް ހަލާކުވާޒާތުގެ މުދާ- ގެންނަ ސޫތުކުޅި ބަނދަރުން ރާއްޖެ އަށް މުދާ ގެނައުމުގައި ހަލާކުވެ ފެންވަރު ދަށްވެ މުދާ ބޭލުން ލަސްވާ މައްސަލަ ހައްލު ކުރުމެވެ.
މި ދަތުރާ ބެހޭ ގޮތުން. އެމްޕީއެލްގެ ސީއީއޯ ޝާހިދު އަލީ މިއަދު ބޭއްވި ނޫސްވެރިންގެ ބައްދަލުވުމުގައި ވިދާޅުވީ އެ ކުންފުނީގެ ޓީމެއް އިންޑިއާއަށް ދިއުމުގެ ބޭނުމަކީ ސޫތުކުޅިން ރާއްޖެ ގެންނަ މުދާ އެ ގައުމުގައި ބަންދުކޮށްފައި ހުންނަ ގޮތް ރަނގަޅުކޮށް މުދާ ކްލިއަ ކުރުން އަވަސް ކުރެވޭނެ ގޮތެއް ހޯދުމެވެ.
"މައިގަނޑު މަގުސަދަކީ ކާގޯ ލޯޑް [އިންޑިއާ އިން ބަރު] ކުރުމުގައި ކޮންސެލިޑޭޓް ކުރެވި ފަސޭހައިން [މާލެއަަށް] ބޭލޭނެ ގޮތަކަށް މުދާ ޕެކޭޖިން ހެދިފަ ހުރުން. އޭރުން މުދާ އަންނަ ގޮތަށް ވީހާއަވަހަށް ހުސްކޮށްލާފަ އަނބުރާ އޭތި [ބޯޓް] ފޮނުވާލެވޭނެ. ކާގޯ ލޯޑް ކުރާ ގޮތުން [މުދާ ބޯޓަށް އަރުވާ ގޮތުން] މުދާ ބާލަން ދަތިތަކެއް ހުރޭ. މުދާ ލޯޑު ކުރުމުގައި ސްޓޭންޑަޑް ތަކެއް ވެސް ހުރޭ،" ޝާހިދު ވިދާޅުވި އެވެ.
މި ދަތުރުގައި ބައިވެރިވި އެމްޕީއެލްގެ ޑެޕިއުޓީ ސީއީއޯ އިބްރާހިމް އަބްދުﷲ ވިދާޅުވީ މި ދަތުރުގައި ޕެރިޝަބަލް ހިފައިގެން އަންނަ ބޯޓުތައް ކުޅުދުއްފުށީ ބަނދަރަށް ގެންދިއުމާ ބެހޭ ގޮތުން މަޝްވަރާކުރެވުނު ކަމަށެވެ. ބޯޓުން މުދާ ބޭލުމާއި މުދަލަށް ގެންލުން ނުވެ ރާއްޖޭގެ ބާޒާރަށް ނެރެވޭނެ ގޮތްތަކާމެދު މަޝްވަރާ ކުރެވުނު ކަމަށެވެ.
"އެ ބޭފުޅުން މިކަމުގައި އިތުރަށް ވާހަކަ ދައްކަން ވަޑައިގަންނަވާނެ. އެހެންވެ ބެލެވެނީ އަންނަ އަހަރުގެ ސީޒަން ފެއްޓެންވާއިރަށް ޕެރިޝަބަލް އާއި ޖެނެރަލް ކާގޯ ގެންދަން މަސައްކަތް ކުރުން،" އިބްރާހިމް ވިދާޅުވި އެވެ.
އިންޑިއާގެ ސޫތުކުޅި ބަނދަރަކީ ރާއްޖެއަށް ޕެރިސަބަލްގެ ގިނަ ވައްތަރުތަކެއް ބަރު ކުރާ ތަނެކެވެ. ލަކުޑި ކުދި ބޯޓުގައި މިގޮތަށް ރާއްޖެ ގެންނަ އަވަހަށް ހަލާކުވާ ތަރުކާރީ އާއި މޭވާގެ ބާވަތްތައް ރާއްޖެ ގެންނަނީ ވަރަށް ފެންވަރުދަށް ކޮށެވެ. ހާއްސަކޮށް މި ބާވަތް އާއްމުކޮށް ގެންނަނީ ލަކުޑިން ބަނދެފައިވާ އިންޑިއާ އާއި ރާއްޖެއާ ދެމެދު ދަތުރުކުރާ ކުދި މި ބޯޓު ފަހަރުގެ ވަތުތެރެއަށް "އޮއްސައިގެން" ނެވެ. އެހެންވުމުން މި ބޯޓު ރާއްޖެ އައިސް ކްލިއަ ކުރަން ނަގާ ވަގުތު އިތުރުވެ އެވެ.