އޯލެވެލް އިމްތިހާން ހެދުމަށް ވިލިމާލެ އިން މާލެއަށް ދަތުރުކުރާ ވިލިމާލޭގެ ދަރިވަރުންނަށް ހުކުރު ދުވަހު ހާއްސަ ފެރީއެއް ބޭއްވުމަށް ނިންމައިފި އެވެ.
މާލެއާއި ވިލިމާލެއާ ދެމެދު ފެރީގެ ހިދުމަތް ގެންދާ އެމްޓީސީސީން ބުނީ މާދަމާ އިން ފެށިގެން އަންނަ މަހުގެ 24 ވަނަ ދުވަހަށް ކޮންމެ ހުކުރު ދުވަހު ހާއްސަ ފެރީ އޮންނާނެ ކަމަށެވެ.
ވިލިމާލެ އިން މާލެ އައުމަށް ފެރީ ފުރާނީ ކޮންމެ ހުކުރު ދުވަހަކު މެންދުރުފަހު 1:10 ގައެވެ.
ހާއްސަ ފެރީއެއް ބާއްވަން ނިންމީ މި އަހަރުގެ އޯލެވަލް އަދި އޭލެވަލް އިމްތިހާނު ހަދަމުންދާ ވިލިމާލޭގައި ދިރިއުޅޭ ދަރިވަރުން އިމްތިހާނުގައި ބައިވެރިވުމަށް މާލެ ދަތުރުކުރުމުގައި ލުއިފަސޭހަ ކޮށްދިނުމުގެ ގޮތުން ކަމަށްވެސް އެމްޓީސީސީން ބުނެފައިވެ އެވެ.
މިއަހަރު ބާއްވާ އޯލެވަލް އިމްތިހާން އިއްޔެ ވަނީ ފަށާފަ އެވެ. މި އިމްތިހާންގައި 239 ސެންޓަރަކުން 5،939 ދަރިވަރުން ވަނީ ބައިވެރިވެފަ އެވެ.
އޯލެވަލް އިމްތިހާނާ އެކު އޯލެވެލްއާއި އައިޖީސީއެސްއީގެ އިތުރުން އިސްލާމާއި ދިވެހި ހިމެނޭ އެސްއެސްއީ އިމްތިހާން ވެސް ކުރިއަށްދާނެ އެވެ.